МУРОЖААТНОМАДА АДЛИЯ ВАЗИРЛИГИГА АНИҚ ВАЗИФАЛАР ҚЎЙИЛДИ

Муҳтарам Президентимиз 2020 йил 29 декабрда Олий Мажлисга йўллаган мурожаатномасида 2021 йилда жамиятнинг ҳар бир соҳасида амалга оширилиши лозим бўлган вазифалар ҳақида тўхталар экан “ислоҳотларимиз самарасини ҳар бир инсон ўз ҳаётида ҳис этиши учун қабул қилинаётган ҳужжатлар ижросини ўз вақтида ва самарали таъминлаш лозим” – деб таъкидлади. Айниқса, статистик рақамлар бу масаланинг қанчалик долзарблигини кўрсатиб берди.

Мурожаатномада таъкидланганидек, сўнгги 4 йилда барча соҳаларда кенг кўламли ўзгаришларни амалга ошириш бўйича 150 та қонун, 2 мингга яқин Фармон ва Қарорлар қабул қилингани, лекин жойларда раҳбарлар ушбу ҳужжатлар мазмун-моҳиятини тушуниб, берилган имкониятлардан тўлиқ фойдаланмаганлиги, аҳоли ва тадбиркорларга зарур шарт-шароит яратиб бера олмаганлиги айтилди. Айтиш жоизки, Президентимизнинг 2018 йил 13 апрелдаги “Давлат ҳуқуқий сиёсатини амалга оширишда адлия органлари ва муассасалари фаолиятини тубдан такомиллаштириш чора-тадбирлари тўғрисида”ги ПФ-5415-сон Фармонида туман Адлия бўлимларига юклатилган асосий вазифаларнинг бири сифатида ҳокимларга ҳамда давлат органлари ва ташкилотларининг туманлар ва шаҳарлар тузилмаларига қонунлар ва бошқа норматив-ҳуқуқий ҳужжатларни қўллаш масалалари бўйича маслаҳатлар бериш белгиланган эди. Бироқ, Мурожаатномада таъкидлаб ўтилганидек, бу назорат тизими амалда кўпроқ формал тусга эга бўлиб қолди.

Шунинг учун Ўзбекистон Республикаси Адлия вазирлигига 2021 йилда бу борада янги иш тизимини жорий этиш вазифаси қўйилди. Яъни, эндиликда Адлия вазирлиги, унинг ҳудудий бошқарма ва бўлимларининг асосий вазифаси қабул қилинган ҳужжатларни масъулларга етказиш, тушунтириш, амалиётда қўллашга кўмаклашиш ва назорат қилишдан иборат бўлади. Шу мақсадда Адлия вазирлигига зарур ваколат ва ресурслар берилади.

Бу борада жамоатчилик иштироки ва назорати ҳам кенг йўлга қўйилади. Жумладан, “жамоатчилик эшитувлари” ва “жамоатчилик мониторинги” тизими жорий қилиниб, бу жараёнга фуқаролик жамияти институтлари, оммавий ахборот воситалари ва фуқаролар ҳам фаол жалб этилади. Бундан ташқари, таҳлиллар асосида ижрога халақит бераётган ортиқча вазифа ва функциялар қисқартирилади. Давлат идораларидаги ижро сифати ва ҳолатини вилоят, туман ва шаҳар халқ депутатлари Кенгашларида, республика даражасида эса – Вазирлар Маҳкамасида ҳар ойда танқидий муҳокама қилиб бориш амалиёти жорий этилади.

Мурожаатномага кўра Адлия вазирлигига  барча оммавий ахборот воситалари, жумладан, телевидение орқали  “Президент қарорлари – ҳаётда ва назоратда”, деган мавзуда кўрсатув ва чиқишлар ташкил этиш, халқимизга ислоҳотлар моҳияти ва натижаларини етказиб бориш тизимини жорий этиш вазифаси ҳам юклатилди.

Ўйлайманки, мазкур вазифаларнинг ижроси нафақат идора ва ташкилотларнинг маъсулиятини, балки фуқароларнинг ҳуқуқий билим ва маданиятини ҳам оширишга ҳам ёрдам беради. Жамоатчиликнинг фуқаролик позицияси, аҳолининг эса мамлакат келажагига дахлдорлик туйғуси мустаҳкамланади.

М.Матюсупов, Амударё туман Адлия бўлими бошлиғи.