“НАВОИЙ ЁДИ ИЛА ЯШАЙМИЗ МУДОМ” МАВЗУСИДА АДАБИЙ-МУСИҚИЙ ТАДБИР ЎТКАЗИЛДИ

Она тилимизга муҳаббат, унинг беқиёс бойлиги ва буюклигина англаш, туйғуси бизнинг онг-у шууримизга энг аввало адабиёт, адабий тил орқали кириб келади. Таъбир жоиз бўлса, нафақат ўзбек халқи, балки барча туркий тилли халқлар ҳам адабиётни, ўз тиллари жарангини Навоийнинг бетакрор асарлари орқали англаб олган бўлсалар не ажаб! Алишер Навоийнинг бебаҳо меросидан бугунги кунда бутун дунё халқлари маънавий озиқ олиб, жамиятда эзгу инсоний фазилатларни камол топтиришда қудратли маънавий қурол сифатида  фойдаланаётганлари бежиз эмас.

Чиндан ҳам, Навоийнинг қай бир асарини мутолаа қилсак, бу бебаҳо битикларда инсоний туйғулар, эзгу фазилатлар, ободончилик ва бунёдкорлик ҳақидаги фикрлар мужассамлашганини англаймиз.

Туманимиздаги 70-сонли умумтаълим мактабида буюк бобокалонимиз таваллудининг 580 йиллиги муносабати билан ташкиллаштирилган “Навоий ёди ила яшаймиз мудом” деб номланган адабий-бадиий мусиқий тадбирда ўқувчи-ёшлар буюк Навоий ҳақида фахрланиб сўзладилар. Навоий даҳосига чексиз эҳтиром руҳида ўтган тадбирни мактабнинг ўзбек тили ва адабиёти фани ўқитувчилари Райҳон Жуманиёзова, Ситиммат Ўрозбоев, Тозагул Ўринбоева ҳамда Юлдузхон Қодировалар ўзаро ҳамкорликда тайёрладилар.

Алишер Навоий ижоди, ҳаёти ва фаолиятининг барча қирраларини ўзида мужассам этган адабий-бадиий кечада, аввало, ўқувчи-ёшлар Навоийнинг болалиги, илк шеърий мисралари хусусидаги саҳна кўринишларини намойиш этиб, шоир ғазалларини, рубоий, маснавий ва туюқларини ифодали ўқиб бердилар.

Шуниси эътиборга моликки, ўқувчи-ёшлар шоирнинг ҳар бир ғазали, рубоий ҳамда туюқларининг мазмуни, маъносини шарҳқлаб, Навоий асарларидан олган таассуротларини, хулосаларини баён қилдилар.

Адабий-бадиий кечанинг  энг қизиқарли қисми савол-жавоблар, Навоий асарлари, ҳикматлари асосида тузилган бошқотирмалар устида ишлаш бўлди. Бу бошқотирмаларни ечишда мактабнинг барча қизиқувчи ўқувчилари иштирок этишди. Энг топқир, Навоий асарларининг билимдонларини аниқлаш мақсадида синфлараро беллашувлар ўтказилди. Ушбу беллашувда нафақат юқори синфлар ўқувчилари, балки Навоий ижодига қизиқувчи барча ёшлар иштирок этишди. Беллашув иштирокчилари талқинидаги “Навоий ва Лутфий”, “Навоий ва Ҳусайн Бойқаро” “Алишер Навоий давлат арбоби”, “Навоий ва Гули” каби кичик саҳна кўринишлари барчага завқ-шавқ бағишлади.

Шунингдек, тадбирда ўқувчилар улуғ Ҳазрат Навоийнинг юрт тинчлиги, Ватан ободлиги, халқ фаровонлиги учун ёшларни билим олишга, меҳнатсеварликка даъват этиб, бу комилликка  элтадиган йўл кўрсатувчи асарларидан парчалар ўқишди. Ёшларни билим олишга, ҳунар эгаллашга даъват этувчи

“Йигитликда йиғ илмнинг махзани,

Қарилиғ чоғи сарф қилғил ани” мисраларини жўр бўлиб ўқидилар ва барча тенгдошларини илм ўрганишга, касб-кор эгаллашга даъват этдилар.

“Навоий ёди ила яшаймиз мудом” мавзусида ўтказилган ушбу адабий-бадиий мусиқий тадбирда ўқувчилар Навоий ғазаллари билан айтиладиган мақом ашулаларидан парчалар куйлаб, рақсга тушдилар.

Тадбир барчада завқли таассурот уйғотиб, ҳар бир қалбда улуғ Навоий даҳосига эҳтиром туйғуси янада жўш урди.

Робия ЙЎЛДОШЕВА.