“NAVOIY YoDI ILA YaShAYMIZ MUDOM” MAVZUSIDA ADABIY-MUSIQIY TADBIR OʻTKAZILDI

Ona tilimizga muhabbat, uning beqiyos boyligi va buyukligina anglash, tuygʻusi bizning ong-u shuurimizga eng avvalo adabiyot, adabiy til orqali kirib keladi. Taʼbir joiz boʻlsa, nafaqat oʻzbek xalqi, balki barcha turkiy tilli xalqlar ham adabiyotni, oʻz tillari jarangini Navoiyning betakror asarlari orqali anglab olgan boʻlsalar ne ajab! Alisher Navoiyning bebaho merosidan bugungi kunda butun dunyo xalqlari maʼnaviy oziq olib, jamiyatda ezgu insoniy fazilatlarni kamol toptirishda qudratli maʼnaviy qurol sifatida  foydalanayotganlari bejiz emas.

Chindan ham, Navoiyning qay bir asarini mutolaa qilsak, bu bebaho bitiklarda insoniy tuygʻular, ezgu fazilatlar, obodonchilik va bunyodkorlik haqidagi fikrlar mujassamlashganini anglaymiz.

Tumanimizdagi 70-sonli umumtaʼlim maktabida buyuk bobokalonimiz tavalludining 580-yilligi munosabati bilan tashkillashtirilgan “Navoiy yodi ila yashaymiz mudom” deb nomlangan adabiy-badiiy musiqiy tadbirda oʻquvchi-yoshlar buyuk Navoiy haqida faxrlanib soʻzladilar. Navoiy dahosiga cheksiz ehtirom ruhida oʻtgan tadbirni maktabning oʻzbek tili va adabiyoti fani oʻqituvchilari Rayhon Jumaniyozova, Sitimmat Oʻrozboyev, Tozagul Oʻrinboyeva hamda Yulduzxon Qodirovalar oʻzaro hamkorlikda tayyorladilar.

Alisher Navoiy ijodi, hayoti va faoliyatining barcha qirralarini oʻzida mujassam etgan adabiy-badiiy kechada, avvalo, oʻquvchi-yoshlar Navoiyning bolaligi, ilk sheʼriy misralari xususidagi sahna koʻrinishlarini namoyish etib, shoir gʻazallarini, ruboiy, masnaviy va tuyuqlarini ifodali oʻqib berdilar.

Shunisi eʼtiborga molikki, oʻquvchi-yoshlar shoirning har bir gʻazali, ruboiy hamda tuyuqlarining mazmuni, maʼnosini sharhqlab, Navoiy asarlaridan olgan taassurotlarini, xulosalarini bayon qildilar.

Adabiy-badiiy kechaning  eng qiziqarli qismi savol-javoblar, Navoiy asarlari, hikmatlari asosida tuzilgan boshqotirmalar ustida ishlash boʻldi. Bu boshqotirmalarni yechishda maktabning barcha qiziquvchi oʻquvchilari ishtirok etishdi. Eng topqir, Navoiy asarlarining bilimdonlarini aniqlash maqsadida sinflararo bellashuvlar oʻtkazildi. Ushbu bellashuvda nafaqat yuqori sinflar oʻquvchilari, balki Navoiy ijodiga qiziquvchi barcha yoshlar ishtirok etishdi. Bellashuv ishtirokchilari talqinidagi “Navoiy va Lutfiy”, “Navoiy va Husayn Boyqaro” “Alisher Navoiy davlat arbobi”, “Navoiy va Guli” kabi kichik sahna koʻrinishlari barchaga zavq-shavq bagʻishladi.

Shuningdek, tadbirda oʻquvchilar ulugʻ Hazrat Navoiyning yurt tinchligi, Vatan obodligi, xalq farovonligi uchun yoshlarni bilim olishga, mehnatsevarlikka daʼvat etib, bu komillikka  eltadigan yoʻl koʻrsatuvchi asarlaridan parchalar oʻqishdi. Yoshlarni bilim olishga, hunar egallashga daʼvat etuvchi

“Yigitlikda yigʻ ilmning maxzani,

Qariligʻ chogʻi sarf qilgʻil ani” misralarini joʻr boʻlib oʻqidilar va barcha tengdoshlarini ilm oʻrganishga, kasb-kor egallashga daʼvat etdilar.

“Navoiy yodi ila yashaymiz mudom” mavzusida oʻtkazilgan ushbu adabiy-badiiy musiqiy tadbirda oʻquvchilar Navoiy gʻazallari bilan aytiladigan maqom ashulalaridan parchalar kuylab, raqsga tushdilar.

Tadbir barchada zavqli taassurot uygʻotib, har bir qalbda ulugʻ Navoiy dahosiga ehtirom tuygʻusi yanada joʻsh urdi.

Robiya YOʻLDOShEVA.