ИССИҚХОНАЛАРДА БАҲОР ТАРОВАТИ ҲУКМРОН

Мамлакатимиз аҳолисини хавфсиз ва тоза озиқ-овқат маҳсулотлари билан таъминлашда иссиқхоналар муҳим ўрин тутади. Шу боисдан ҳам йил сайин иссиқхоналар сони ва экин майдонларини кенгайтиришга улкан эътибор берилаяпти.

Бундай эътиборлар натижасида туманимизда ҳам ўз томорқа ерида сабзавот кўчатларини етиштириш, билан шуғулланишга киришаётганлар кўпчиликни ташкил этади.

Оқ олтин овулининг Жийдали қулон аҳоли пунктида истиқомат қилувчи аҳолининг деярли барчаси ўз томорқаларига экадиган эртаги экинлар кўчатларини ўзлари етиштиришади. Бундан ташқари, кўкатлар, эртаги экинларни етиштириб, бозорларимиз тўкинлигига ўз ҳиссаларини қўшмоқдалар.

Янгибой Қурбониёзов бир умр темир йўл соҳасида ишлаш билан бирга турмуш ўртоғи Робия Қурбониёзова ва фарзандлари кўмагида томорқасида мўл-кўл ҳосил ундириб, оиласини таъминлабгина қолмай, ортганини сотиб, фойда олиб келди. У нафақага чиққанидан сўнг, томорқасининг 2 сотих жойида қўлбола усулда иссиқхона қуриб, ўз томорқаси учун зарур эртаги экинлар кўчатларини етиштира бошлади. Ҳар йили кўчат учун ажратиладиган маблағ тежалиб, ўз эҳтиёжидан ортган кўчатларни сотишдан даромад ҳам олди.

Орадан ўтган 10 йилча вақт давомида Янгибой ака ва Робия опалар кўчат етиштириш бўйича улкан тажриба тўплашди. Ўтган йилнинг ўзида шу 2 сотихлик иссиқхонасида етиштирган кўчатларидан ўз томорқасига экканларидан ташқари олган фойдаси 10 млн. сўмдан зиёд бўлди.

Айни кунда уларнинг иссиқхонасида 80000 тупдан зиёд помидор, бодринг, булғор қалампири, бақлажон, манзарали гул кўчатлари очиқ далага кўчириб ўтқазишга тайёр ҳолга келай деб турибди. Улар аввало ўзларининг 8 сотихлик томорқасига кўчириб ўтқазилади, ортгани юртдошларимизга сотилади, иссиқхонага кирган одам қутичаларда кўм-кўк бўлиб турган экинлар кўчатларини кўриб, қиш заҳри кетмаган кунларда худди ҳақиқий баҳор тантанасини кўргандай бўлади.

Тажрибали деҳқон бу йил иссиқхонасида картошка етиштиришни ҳам йўлга қўйибди. Экин иссиқхона ерини «ўғирламаслиги» учун махсус қопларга эгатлар устига экилган.

Қўшни-қўшнидан эрта уйғонишни ўрганади деганларидай, Янгибой аканинг ён қўшниси Баҳром Ўрозимбетов ҳам иссиқхонадан мўл даромад олаётганлардан. У томорқасидаги 2 сотихлик қўлбола усулда қурилган иссиқхонасида помидор, бодринг, булғор қалампири, эртаги карам кўчатларини етиштириб келади.

Ойимжон Пиримбетова ҳам иссиқхонада кўчат етиштиришдан оила иқтисодини яхшилашга муваффақ бўлаётганларнинг бири. У 15 йилдан бери фарзандлари, келини кўмагида эртаги экинлар ва гул кўчатларини етиштириб келади. Ҳар йили кўкламда опанинг асраб-авайлаб ундирган гуллари жуда харидоргир бўлади.

Ҳаракатда – баракат, деганларидай, яхши яшаш, ўз турмушини ўзи обод, файзли қилишга интилган одам, албатта, мақсадига эришаверади.

О.РАЖАБОВА.