ISSIQXONALARDA BAHOR TAROVATI HUKMRON

Mamlakatimiz aholisini xavfsiz va toza oziq-ovqat mahsulotlari bilan taʼminlashda issiqxonalar muhim oʻrin tutadi. Shu boisdan ham yil sayin issiqxonalar soni va ekin maydonlarini kengaytirishga ulkan eʼtibor berilayapti.

Bunday eʼtiborlar natijasida tumanimizda ham oʻz tomorqa yerida sabzavot koʻchatlarini yetishtirish, bilan shugʻullanishga kirishayotganlar koʻpchilikni tashkil etadi.

Oq oltin ovulining Jiydali qulon aholi punktida istiqomat qiluvchi aholining deyarli barchasi oʻz tomorqalariga ekadigan ertagi ekinlar koʻchatlarini oʻzlari yetishtirishadi. Bundan tashqari, koʻkatlar, ertagi ekinlarni yetishtirib, bozorlarimiz toʻkinligiga oʻz hissalarini qoʻshmoqdalar.

Yangiboy Qurboniyozov bir umr temir yoʻl sohasida ishlash bilan birga turmush oʻrtogʻi Robiya Qurboniyozova va farzandlari koʻmagida tomorqasida moʻl-koʻl hosil undirib, oilasini taʼminlabgina qolmay, ortganini sotib, foyda olib keldi. U nafaqaga chiqqanidan soʻng, tomorqasining 2 sotix joyida qoʻlbola usulda issiqxona qurib, oʻz tomorqasi uchun zarur ertagi ekinlar koʻchatlarini yetishtira boshladi. Har yili koʻchat uchun ajratiladigan mablagʻ tejalib, oʻz ehtiyojidan ortgan koʻchatlarni sotishdan daromad ham oldi.

Oradan oʻtgan 10-yilcha vaqt davomida Yangiboy aka va Robiya opalar koʻchat yetishtirish boʻyicha ulkan tajriba toʻplashdi. Oʻtgan yilning oʻzida shu 2 sotixlik issiqxonasida yetishtirgan koʻchatlaridan oʻz tomorqasiga ekkanlaridan tashqari olgan foydasi 10 mln. soʻmdan ziyod boʻldi.

Ayni kunda ularning issiqxonasida 80000 tupdan ziyod pomidor, bodring, bulgʻor qalampiri, baqlajon, manzarali gul koʻchatlari ochiq dalaga koʻchirib oʻtqazishga tayyor holga kelay deb turibdi. Ular avvalo oʻzlarining 8 sotixlik tomorqasiga koʻchirib oʻtqaziladi, ortgani yurtdoshlarimizga sotiladi, issiqxonaga kirgan odam qutichalarda koʻm-koʻk boʻlib turgan ekinlar koʻchatlarini koʻrib, qish zahri ketmagan kunlarda xuddi haqiqiy bahor tantanasini koʻrganday boʻladi.

Tajribali dehqon bu yil issiqxonasida kartoshka yetishtirishni ham yoʻlga qoʻyibdi. Ekin issiqxona yerini «oʻgʻirlamasligi» uchun maxsus qoplarga egatlar ustiga ekilgan.

Qoʻshni-qoʻshnidan erta uygʻonishni oʻrganadi deganlariday, Yangiboy akaning yon qoʻshnisi Bahrom Oʻrozimbetov ham issiqxonadan moʻl daromad olayotganlardan. U tomorqasidagi 2 sotixlik qoʻlbola usulda qurilgan issiqxonasida pomidor, bodring, bulgʻor qalampiri, ertagi karam koʻchatlarini yetishtirib keladi.

Oyimjon Pirimbetova ham issiqxonada koʻchat yetishtirishdan oila iqtisodini yaxshilashga muvaffaq boʻlayotganlarning biri. U 15-yildan beri farzandlari, kelini koʻmagida ertagi ekinlar va gul koʻchatlarini yetishtirib keladi. Har yili koʻklamda opaning asrab-avaylab undirgan gullari juda xaridorgir boʻladi.

Harakatda – barakat, deganlariday, yaxshi yashash, oʻz turmushini oʻzi obod, fayzli qilishga intilgan odam, albatta, maqsadiga erishaveradi.

O.RAJABOVA.