СОБИҚ ИШЧИГА ТЎЛАНМАГАН ИШ ҲАҚЛАРИ УНДИРИБ БЕРИЛДИ

Ҳар қандай низони муроса ва тинчлик йўли билан ҳал қилиш халқимизга хос одатлардан саналади. Ота-боболаримиз азал-азалдан ўзаро келишмовчиликларни тинчлик йўли билан ҳал қилиб, ярашитириш чорасини кўриб келган. Миллатимизга хос бўлган бу эзгу фазилатлар қонунларимизда ҳам акс этган.

Фуқаролик ишлари бўйича Амударё туман суди томонидан кўрилган навбатдаги меҳнат низосига оид ишларнинг бири томонларнинг ўзаро келишуви билан якунланди.

Воқеага батафсилроқ тўхталадиган бўлсак, фуқаро М.Б. туман Адлия бўлимига ариза билан мурожаат қилиб, 2018-, 2019- ва 2020-йилларда Қипчоқ ўрмон хўжалигида ишлаганлигини, аммо иш берувчи ўша пайтда маош тўламаганлигини маълум қилди ва ушбу даврдаги меҳнат ҳақини ундириб беришни сўради.

Мурожаатни ўрганиш давомида ҳақиқатан ҳам фуқаро М.Б. туман Қипчоқ Давлат ўрмон хўжалигига 2018 йил 01 июнда 14-к-сонли буйруқ билан асаларичи вазифасига ишга қабул қилингани, бунга фуқаро ва иш берувчи ўртасида 2018 йил 1 июнда тузилган 28-сонли меҳнат шартномаси асос бўлгани аниқланди. Даъвогар билан тузилган меҳнат шартномаси 2020 йил 29 августда бекор қилингани маълум бўлди.

Ҳисоб-китобларга кўра М.Б.нинг 2018 йил 4 ойи учун, 2019 йил 7 ойи учун ва 2020 йил 7 ойи учун иш ҳақлари жами 15 млн. 868 минг 696 сўмни ташкил қилганлиги ва ушбу ойлик иш ҳақилари тўланманганлиги аниқланди.

Ваҳоланки, Ўзбекистон Республикаси Меҳнат кодексининг 161-моддасига биноан  меҳнатга ҳақ тўлаш муддатлари жамоа шартномаси ёки бошқа локал норматив ҳужжатда белгиланади ва ҳар ярим ойда бир мартадан кам бўлиши мумкин эмас.

Туман Адлия бўлими томонидан 2021 йил февраль ойида даъвогар М.Б. манфаатида жавобгар Қипчоқ Давлат ўрмон хўжалигига нисбатан иш ҳақи ва етказилган маънавий зарарларни ундириш ҳақида даъво ариза киритилди.
Суд муҳокамаси давомида ҳар икки томоннинг фикр ва мулоҳазалари тингланди. Ҳар икки тарафда ҳам меҳнат шартномасида белгиланган ҳуқуқ ва мажбуриятларини бажаришда камчиликлар борлиги аниқланди. Охир-оқибат томонлар ўзаро муроса йўлини танлаб, ўзаро келишув йўлини танлашди.

Даъвогар 15 млн. 868 минг 696 сўм ойлик иш ҳақининг ярмига даъво қилиб, қолган суммадан воз кечди. Шунга кўра Фуқаролик ишлари бўйича туман судининг томонларнинг келишув битимини тасдиқлаш ҳақидаги ажрими билан даъво қисман қаноатлантирилиб, даъвогар фойдасига жавобгар ташкилотдан 7,5 млн. сўм иш ҳақилари ундириб берилди.

М.Матюсупов, туман Адлия бўлими бошлиғи.