ОГОҲ БЎЛИНГ, КЎРИНМАС ЁВ – КОРОНАВИРУС ТОБОРА ФАОЛЛАШМОҚДА, ЎЗИНГИЗ ВА ЯҚИНЛАРИНГИЗ ҲАЁТИНИ ХАВФ-ХАТАРГА ҚЎЙМАНГ!

Пандемия туфайли кундалик турмуш тарзимизга киритилаётган айрим тартиб қоидалар, биринчи галда, халқимиз саломатлигини муҳофаза этишга, фаровонлиги ва дахлсизлигини таъминлашга қаратилгани билан ўта муҳим аҳамиятга эга. Негаки, инсон соғ-саломат бўлгандагина келажакни кўзлаб қабул қилинган режалар ижобий амалга оширилади, жамиятда тараққиёт, ривожланиш бўлади. Лекин сўнгги пайтларда карантин қоидалари бироз юмшатилиб, мамлакатимизда коронавирус инфекцияси билан зарарланиш ҳолатлари камайгани кўпчиликнинг назарида энди бу касаллик чекиниб, вирус орамиздан бутунлай кетгандай туюлди ва карантин қоидаларига амал қилишнинг оддийгина талабларидан бири – ниқоб тақишни ҳам унутиб қўйишди. Ваҳоланки, март ойига келиб нафақат бутун дунёда, балки мамлакатимизда ҳам коронавирус билан зарарланиш бўйича кўрсаткичлар юқори даражада ошди. Ҳатто бу борада ўлим ҳолатларининг ҳам кун сайин ошиб бораётгани ҳар бир инсондан эҳтиёдкорлик билан ҳаракат қилишни тақозо этмоқда.

Мамлакатимизда вирус билан зарарланиш ҳолатлари кунлик кўрсаткичи жорий йилнинг апрель ойи биринчи ўн кунлигида ўртача 100-200 нафарга яқинлашганидан аёнки, халқимиз соғлигини хавф-хатардан асраш мақсадида жорий этилган карантин қоидаларига амал қилиш ҳар биримизнинг зиммамиздаги масъулиятли вазифадир. Шу боис, 2021 йилнинг 8 апрель санасида туманимизга коронавирус инфекциясининг янги штамми кириб келиши ва тарқалишининг олдини олиш мақсадида Манғит деҳқон бозори ва бир неча тўйхоналарда туман Санитария-эпидемиология осойишталик ва жамоат саломатлиги бўлими, Ички ишлар бўлими ва Миллий гвардия ходимлари ҳамкорлигида қўшма рейд тадбири ўтказилди.

Рейд давомида Манғит деҳқон бозори ҳудудида қатор сотувчи ва ҳаридорларга карантин қоидаларига амал қилишлари, яъни ниқобсиз кўчага чиқмаслик, ижтимоий масофани сақлаш, қўл бериб ва қучоқ очиб саломлашмаслик ҳамда шаҳсий гигиена қоидаларига риоя қилишлари кераклиги ҳақида тушунтиришлар олиб борилди. Ниқобсиз юрган фуқароларга ниқоб тақишнинг короновирус инфекциясидан сақланишдаги аҳамияти, ўзининг ва оила аъзоларининг саломатлигига беэтибор бўлмаслиги ҳамда карантин қоидаларини бузганлик бўйича Низомда белгиланган тартибда тегишли маъмурий жазога тортилишлари тўғрисида огоҳлантиришлар берилди.

Тўйҳоналарда ўтказилган рейд тадбирида тўйҳона эгаларига 2021 йилнинг 1 апрелидан кучга кирган вақтинчалик Низомга кўра, ўтказиладиган тўй тадбирида фуқаролар сони 100 кишидан ортиқ бўлмаслиги, тадбирга келганлар ниқобда бўлишлари ҳамда тўйҳона ичкарисига киришдан олдин фуқароларни назоратдан ўтказиш, яъни тана ҳароратини ўлчаш, қўлларни дезинфекцияловчи антицептик воситалар билан ишлов бериш, тана ҳарорати 37 даража ва ундан юқори бўлган фуқароларни тўй тадбирига қўймаслик ва бу ҳолат юзасидан тез тиббий ёрдамга мурожаат қилишлари, фуқароларнинг шаҳсий гигиена қоидаларига риоя қилишлари учун қўл ювиш жиҳозлари, суюқ совун ва бир марталик қоғоз солфеткалар билан таъминланиши, ижтимоий масофани сақлаган ҳолда ўриндиқларни жойлаштиришлари кераклиги тўғрисида тавсиялар берилди.

Албатта, масъул ташкилотлар ходимлари иштирокида амалга оширилаётган бу каби назорат тадбирлари орқали коронавирус инфекциясини бутунлай жиловлаш бирмунча қийин кечиши табиий. Энг асосийси, бу борада ҳар бир инсоннинг шахсий ташаббуси ва ҳатти-ҳаракати муҳим аҳамиятга эга. Шахсий гигиена қоидаларига қатъий амал қилиб, ишда, жамоат жойларида ниқоб тақиш, ижтимоий масофани сақлаган ҳолда антисептик воситалардан мунтазам фойдаланиш орқали биз кўринмас душманни енга оламиз. Шунинг учун халқимиздан қатъий илтимос қиламиз, мамлакатимизда жорий этилган юқоридаги вақтинчалик чекловларни тўғри қабул қилиб, иложи борича, зарурат бўлмаса кўчага чиқмасликни, жорий этилган карантин қоидаларига қатъий амал қилишларини сўраймиз.

Қадрли юртдошлар! Огоҳ бўлинг, вируснинг янада фаоллашиб бораётганини унутманг, кўринмас ёв орамизда юрибди. Ўзингизни ва яқинларингиз ҳаётини хавф-хатарга қўйманг!

Туман СЭО ва жамоат саломатлиги бўлими,

Миллий гвардия ҳамда туман ИИБ.

Робия ЙЎЛДОШЕВА, www.amunews.uz мухбири.