OGOH BOʻLING, KOʻRINMAS YoV – KORONAVIRUS TOBORA FAOLLAShMOQDA, OʻZINGIZ VA YaQINLARINGIZ HAYoTINI XAVF-XATARGA QOʻYMANG!

Pandemiya tufayli kundalik turmush tarzimizga kiritilayotgan ayrim tartib qoidalar, birinchi galda, xalqimiz salomatligini muhofaza etishga, farovonligi va daxlsizligini taʼminlashga qaratilgani bilan oʻta muhim ahamiyatga ega. Negaki, inson sogʻ-salomat boʻlgandagina kelajakni koʻzlab qabul qilingan rejalar ijobiy amalga oshiriladi, jamiyatda taraqqiyot, rivojlanish boʻladi. Lekin soʻnggi paytlarda karantin qoidalari biroz yumshatilib, mamlakatimizda koronavirus infektsiyasi bilan zararlanish holatlari kamaygani koʻpchilikning nazarida endi bu kasallik chekinib, virus oramizdan butunlay ketganday tuyuldi va karantin qoidalariga amal qilishning oddiygina talablaridan biri – niqob taqishni ham unutib qoʻyishdi. Vaholanki, mart oyiga kelib nafaqat butun dunyoda, balki mamlakatimizda ham koronavirus bilan zararlanish boʻyicha koʻrsatkichlar yuqori darajada oshdi. Hatto bu borada oʻlim holatlarining ham kun sayin oshib borayotgani har bir insondan ehtiyodkorlik bilan harakat qilishni taqozo etmoqda.

Mamlakatimizda virus bilan zararlanish holatlari kunlik koʻrsatkichi joriy yilning aprel oyi birinchi oʻn kunligida oʻrtacha 100-200 nafarga yaqinlashganidan ayonki, xalqimiz sogʻligini xavf-xatardan asrash maqsadida joriy etilgan karantin qoidalariga amal qilish har birimizning zimmamizdagi masʼuliyatli vazifadir. Shu bois, 2021-yilning 8-aprel sanasida tumanimizga koronavirus infektsiyasining yangi shtammi kirib kelishi va tarqalishining oldini olish maqsadida Mangʻit dehqon bozori va bir necha toʻyxonalarda tuman Sanitariya-epidemiologiya osoyishtalik va jamoat salomatligi boʻlimi, Ichki ishlar boʻlimi va Milliy gvardiya xodimlari hamkorligida qoʻshma reyd tadbiri oʻtkazildi.

Reyd davomida Mangʻit dehqon bozori hududida qator sotuvchi va haridorlarga karantin qoidalariga amal qilishlari, yaʼni niqobsiz koʻchaga chiqmaslik, ijtimoiy masofani saqlash, qoʻl berib va quchoq ochib salomlashmaslik hamda shahsiy gigiyena qoidalariga rioya qilishlari kerakligi haqida tushuntirishlar olib borildi. Niqobsiz yurgan fuqarolarga niqob taqishning koronovirus infektsiyasidan saqlanishdagi ahamiyati, oʻzining va oila aʼzolarining salomatligiga beetibor boʻlmasligi hamda karantin qoidalarini buzganlik boʻyicha Nizomda belgilangan tartibda tegishli maʼmuriy jazoga tortilishlari toʻgʻrisida ogohlantirishlar berildi.

Toʻyhonalarda oʻtkazilgan reyd tadbirida toʻyhona egalariga 2021-yilning 1-aprelidan kuchga kirgan vaqtinchalik Nizomga koʻra, oʻtkaziladigan toʻy tadbirida fuqarolar soni 100 kishidan ortiq boʻlmasligi, tadbirga kelganlar niqobda boʻlishlari hamda toʻyhona ichkarisiga kirishdan oldin fuqarolarni nazoratdan oʻtkazish, yaʼni tana haroratini oʻlchash, qoʻllarni dezinfektsiyalovchi antitseptik vositalar bilan ishlov berish, tana harorati 37 daraja va undan yuqori boʻlgan fuqarolarni toʻy tadbiriga qoʻymaslik va bu holat yuzasidan tez tibbiy yordamga murojaat qilishlari, fuqarolarning shahsiy gigiyena qoidalariga rioya qilishlari uchun qoʻl yuvish jihozlari, suyuq sovun va bir martalik qogʻoz solfetkalar bilan taʼminlanishi, ijtimoiy masofani saqlagan holda oʻrindiqlarni joylashtirishlari kerakligi toʻgʻrisida tavsiyalar berildi.

Albatta, masʼul tashkilotlar xodimlari ishtirokida amalga oshirilayotgan bu kabi nazorat tadbirlari orqali koronavirus infektsiyasini butunlay jilovlash birmuncha qiyin kechishi tabiiy. Eng asosiysi, bu borada har bir insonning shaxsiy tashabbusi va hatti-harakati muhim ahamiyatga ega. Shaxsiy gigiyena qoidalariga qatʼiy amal qilib, ishda, jamoat joylarida niqob taqish, ijtimoiy masofani saqlagan holda antiseptik vositalardan muntazam foydalanish orqali biz koʻrinmas dushmanni yenga olamiz. Shuning uchun xalqimizdan qatʼiy iltimos qilamiz, mamlakatimizda joriy etilgan yuqoridagi vaqtinchalik cheklovlarni toʻgʻri qabul qilib, iloji boricha, zarurat boʻlmasa koʻchaga chiqmaslikni, joriy etilgan karantin qoidalariga qatʼiy amal qilishlarini soʻraymiz.

Qadrli yurtdoshlar! Ogoh boʻling, virusning yanada faollashib borayotganini unutmang, koʻrinmas yov oramizda yuribdi. Oʻzingizni va yaqinlaringiz hayotini xavf-xatarga qoʻymang!

Tuman SEO va jamoat salomatligi boʻlimi,

Milliy gvardiya hamda tuman IIB.

Robiya YOʻLDOShEVA, www.amunews.uz muxbiri.