Жайхун илҳомлари

Янги Ўзбекистон (Мустақилликнинг 30 йиллигига)

Минг йиллик тарихсан, минг йиллик бўстон,

Қадим Сўғд, Хоразм, Турон, Туркистон.

Янгиланаётган ҳур Ўзбекистон

Теран илдизлардан унган чинорим,

Қутлуғ бўлсин ўттизинчи баҳоринг!

Бетакрор ҳуснингга олам маҳлиё,

Сен муқаддас замин, қутлуғ қадамжо.

Жамолинг, камолинг кўзга тўтиё,

Мадҳинг куйлаб ёзаман дил хуморин,

Гўзал Ватан, Ўзбекистон – диёрим!

Бошингга бахт қуши қўнгани ростдир,

Бугунги жамолинг жаннатга хосдир.

Диллар обод, турмушимиз бадастир,

Шу боис айтаман дилдаги борин,

Сенга Ватан, Ўзбекистон – диёрим!

Янги Ўзбекистон, дилларда достон,

Шеър келар қаламни қўлга олган он.

Ижод аҳли сени қилар эҳтиром,

Достонларда куйлаб, азм-у қарорин,

Маънавият бешигисан диёрим!

Раҳбарли халқ омон бўлгани ростдир,

Фозил ва ҳур замон бўлгани ростдир.

Ўттиз йиллик тўйинг нур устига нур,

Бағрингда бахтлиман, йўқдир армоним,

Янги Ўзбекистон –  янги давроним!

Тожибой ДЎСОНОВ, шифокор.

Аёлга

“Аёлга бахт беринг, саодат беринг”,

Бир зум ўзи учун ҳаловат беринг.

Кўкларга кўтаринг аёл шаънини,

Умрига етгудек муҳаббат беринг.

Кўнгли ўксимасин аёл зотининг,

Кўрғони бўлинг сиз, посбони бўлинг.

Булбулга айлансин чаманзор ичра,

Умрига битилган достони бўлинг.

Турмуш ташвишидан чарчаган чоғда,

Бир тоғи бўлинг сиз, суянчи бўлинг.

Дардининг чорасин тополмаганда,

Эртангги кунининг ишончи бўлинг.

Не яхшилик қилсак арзир аёлга,

Аёллар, мусаффо бир осмон бўлинг.

Биз таъзим қиламиз, ҳар бир аёлга,

Аёллар ҳамиша сиз омон бўлинг!

Муҳайё ЎРИНБОЕВА, 70-сонли мактаб ўқитувчиси.

Боғларда

Боғларда баҳорнинг нафаси,

Мастона уфуриб туради.

Қолдириб қаламим қафасин,

Қоғозда қофия қуради.

Барчанинг кутгани бу кунлар,

Қаламим машқида нақшланди.

Жумбоқли, ечилмас тугунлар,

Қалб ҳисси ёзила бошланди.

Гуллардан ясанган боғларим,

Сатрлар устида қаламим.

Боримни баҳорга боғладим,

Шеър ёзиб тарқади аламим.

Жумабой ҲИДОЯТОВ, Қизилчоли маҳалласи.

Онажон

Ғанимларим тошлар отар бўлса-да,

Танам ёқиб, ўтга тутар бўлса-да.

Вақтим етиб паймоним ҳам тўлса-да,

Мени қўллаб турсангиз бас, Онажон!

Қанча қийин кунлар ўтди бошимдан,

Муз юраклар эриди кўз ёшимдан.

Кўз ёшимни яширдим сирдошимдан,

Мени қўллаб турсангиз бас, Онажон!

Ўлимимни тилаб турса ағёрим,

Ногоҳ мендан кечиб кетса ул ёрим.

Йиқилсам-у ҳеч қолмаса мадорим,

Мени қўллаб турсангиз бас, Онажон!

Унутиб юборсам, ғам-аламларни,

Атрофимга йиғсам дўст одамларни.

Ўтказсам ҳаётда ширин дамларни,

Мени қўллаб турсангиз бас, Онажон!

Эркинбой Юсупов, 13-сонли мактаб ўқитувчиси.