Jayxun ilhomlari

Yangi Oʻzbekiston (Mustaqillikning 30 yilligiga)

Ming yillik tarixsan, ming yillik boʻston,

Qadim Soʻgʻd, Xorazm, Turon, Turkiston.

Yangilanayotgan hur Oʻzbekiston

Teran ildizlardan ungan chinorim,

Qutlugʻ boʻlsin oʻttizinchi bahoring!

Betakror husningga olam mahliyo,

Sen muqaddas zamin, qutlugʻ qadamjo.

Jamoling, kamoling koʻzga toʻtiyo,

Madhing kuylab yozaman dil xumorin,

Goʻzal Vatan, Oʻzbekiston – diyorim!

Boshingga baxt qushi qoʻngani rostdir,

Bugungi jamoling jannatga xosdir.

Dillar obod, turmushimiz badastir,

Shu bois aytaman dildagi borin,

Senga Vatan, Oʻzbekiston – diyorim!

Yangi Oʻzbekiston, dillarda doston,

Sheʼr kelar qalamni qoʻlga olgan on.

Ijod ahli seni qilar ehtirom,

Dostonlarda kuylab, azm-u qarorin,

Maʼnaviyat beshigisan diyorim!

Rahbarli xalq omon boʻlgani rostdir,

Fozil va hur zamon boʻlgani rostdir.

Oʻttiz yillik toʻying nur ustiga nur,

Bagʻringda baxtliman, yoʻqdir armonim,

Yangi Oʻzbekiston –  yangi davronim!

Tojiboy DOʻSONOV, shifokor.

Ayolga

“Ayolga baxt bering, saodat bering”,

Bir zum oʻzi uchun halovat bering.

Koʻklarga koʻtaring ayol shaʼnini,

Umriga yetgudek muhabbat bering.

Koʻngli oʻksimasin ayol zotining,

Koʻrgʻoni boʻling siz, posboni boʻling.

Bulbulga aylansin chamanzor ichra,

Umriga bitilgan dostoni boʻling.

Turmush tashvishidan charchagan chogʻda,

Bir togʻi boʻling siz, suyanchi boʻling.

Dardining chorasin topolmaganda,

Ertanggi kunining ishonchi boʻling.

Ne yaxshilik qilsak arzir ayolga,

Ayollar, musaffo bir osmon boʻling.

Biz taʼzim qilamiz, har bir ayolga,

Ayollar hamisha siz omon boʻling!

Muhayyo OʻRINBOYeVA, 70-sonli maktab oʻqituvchisi.

Bogʻlarda

Bogʻlarda bahorning nafasi,

Mastona ufurib turadi.

Qoldirib qalamim qafasin,

Qogʻozda qofiya quradi.

Barchaning kutgani bu kunlar,

Qalamim mashqida naqshlandi.

Jumboqli, yechilmas tugunlar,

Qalb hissi yozila boshlandi.

Gullardan yasangan bogʻlarim,

Satrlar ustida qalamim.

Borimni bahorga bogʻladim,

Sheʼr yozib tarqadi alamim.

Jumaboy HIDOYaTOV, Qizilcholi mahallasi.

Onajon

Gʻanimlarim toshlar otar boʻlsa-da,

Tanam yoqib, oʻtga tutar boʻlsa-da.

Vaqtim yetib paymonim ham toʻlsa-da,

Meni qoʻllab tursangiz bas, Onajon!

Qancha qiyin kunlar oʻtdi boshimdan,

Muz yuraklar eridi koʻz yoshimdan.

Koʻz yoshimni yashirdim sirdoshimdan,

Meni qoʻllab tursangiz bas, Onajon!

Oʻlimimni tilab tursa agʻyorim,

Nogoh mendan kechib ketsa ul yorim.

Yiqilsam-u hech qolmasa madorim,

Meni qoʻllab tursangiz bas, Onajon!

Unutib yuborsam, gʻam-alamlarni,

Atrofimga yigʻsam doʻst odamlarni.

Oʻtkazsam hayotda shirin damlarni,

Meni qoʻllab tursangiz bas, Onajon!

Erkinboy Yusupov, 13-sonli maktab oʻqituvchisi.