ЁШЛАР ФЕСТИВАЛИ ДОИРАСИДАГИ ТАДБИРЛАР ЁШЛАР ҚАЛБИДАГИ ВАТАНПАРВАРЛИК ТУЙҒУЛАРИНИ ЯНАДА МУСТАҲКАМЛАДИ

“Янги Ўзбекистон ёшлари, бирлашайлик!” шиори остида Амударё туманида ўтказилган “Ёшлар фестивали” тадбирларида туманимиз ёшлари кўтаринки руҳда қатнашдилар.

Фестиваль доирасида туман Маданият ва истироҳат боғида давлат хавфсизлик хизмати чегара қўшинларига қарашли ҳарбий қисм ҳарбийлари томонидан ёш авлод қалбида Ватан тақдирига дахлдорлик, бурчга садоқат, ватанпарварлик каби эзгу туйғуларни мустаҳкамлаш ва юксалтириш мақсадида тадбирлар ташкил этилди. Ёшлар ҳарбий хизматчи Санжар Тошматов иштирокидаги давра суҳбатида давлатимиз томонидан ҳарбийлар учун яратилган шарт-шароитлар, имкониятлар, шунингдек, ҳарбийлик касби ҳақидаги маълумотларга эга бўлдилар.

Шу билан бирга, ҳарбий хизматчилар томонидан ҳарбий соҳада эришилаётган ютуқлар ҳам тилга олиниб ўтилди. Тадбир давомида ҳарбий қисмга тегишли қурол-яроғ, ҳарбий техникалар, алоқа воситалари, тиббий анжомлар ҳамда таъминот турларидан  ташкил этилган кўргазма ва кўргазмали машғулотлар намойиш этилди. Кўргазмада ҳарбий хизматчилар қуролларни ёйиш ва йиғишни амалда кўрсатдилар. Шунингдек, ўқ отиш, саф тайёргарликлари, оммавий қирғин қуролларидан ҳимояланиш усуллари бўйича назарий ва амалий тушунчалар берилди.

Ҳарбий қисм хизматчиси Ҳамза Хўжаниёзов ҳарбий техникалар, қурол-аслаҳалардан ҳамда машғулотларда иштирок этган хизмат ҳайвонларидан давлат чегарасини қўриқлашда қандай фойдаланилиши тўғрисида ёшларга сўзлаб берди. Хизмат ҳайвонлари бўлган от ва итлар билан шуғулланиш, улар билан ўтказиладиган ҳарбий машғулотлар ҳақидаги маълумотлар ва ўтказилган кўргазмали машғулотлар ёшлар учун жуда қизиқарли бўлди. Ҳарбий қисм ҳаёти, ҳарбий хизматчилар учун яратилган шарт-шароитлар ҳамда саф  ва ўқ отиш тайёргарлиги элементлари ҳақида батафсил тушунчаларга эга бўлган ёшларда ушбу тадбир катта таассурот қолдирди.

Тадбирдан сўнг, туман Маданият бўлими томонидан тайёрланган “Ёшлар овози” номли гала концерт бошланди. Фестиваль иштирокчилари дастлаб тумандаги ёш хунармандларнинг бичиш-тикиш,  рассомчилик намуналари, ёғоч ва темирдан ишланган буюмларидан ташкил қилинган кўргазма билан танишдилар.

Ватан равнақи йўлида ёшларни бирлаштириш, уларнинг фаоллигини ошириш, ташаббускор ёшларни рағбатлантириш мақсадида ўтказилган “Янги Ўзбекистон ёшлари бирлашайлик!” шиори остидаги “Ёшлар овози” гала концертини туман ҳокими Султонбой Йўлдашев очиб берди ва барча ёшларни ушбу тантана билан табриклади. Туман ҳокими юртимизда ёшлар тарбияси, уларни бахтли, баркамол авлод қилиб тарбиялашга катта эътибор берилаётганига алоҳида тўхталди ва фаровон юртимиз келажаги  ёшлар иқтидори ва интилишлари билан боғлиқлигини айтиб, уларга катта ишонч билдирди.

Шундан сўнг, “Янги Ўзбекистон ёшлари, бирлашайлик!” шиори остида ўтказилган ёшлар фестивали доирасидаги мусобақаларда ғолибликни қўлга киритган ёшлар ва фаол ўқувчиларни тақдирлаш маросими ўтказилди. Ғолиблар фахрий ёрлиқ, диплом ва совғалар билан рағбатлантирилди.

Фестиваль иштирокчилари эътиборига туманимиз халқ жамоалари,  таниқли хушовоз  ёш эстрада хонандалари, рақс дасталари  иштирокида тайёрланган катта гала концерт дастури ҳавола этилди. Дастур давомида томошабинлар Ватан мадҳи, муҳаббат ва садоқат, бахтли болалик тараннум этилган қўшиқлар, дилрабо рақслар ижросидан янада хушнуд бўлдилар.

Маълумки, жорий йил июнь ойи давомида барча ҳудудларда «Янги Ўзбекистон ёшлари, бирлашайлик!» шиори остида «Ёшлар ойлиги» ўтказилмоқда. Ойлик доирасида мамлакатимиз бўйлаб 4 миллион 300 мингдан зиёд ёшларни қамраб олиш режалаштирилган.

Бу йил илк маротаба мазкур ойлик доирасида барча туман ва шаҳарларда 1 июндан 30 июнга қадар турли йўналишлар бўйича танловлар, фестиваллар, интеллектуал ўйинлар, спорт мусобақалари ўтказилади.

Ойлик доирасидаги тадбирлар давом этмоқда.

Озода Худойберганова.