YoShLAR FESTIVALI DOIRASIDAGI TADBIRLAR YoShLAR QALBIDAGI VATANPARVARLIK TUYGʻULARINI YaNADA MUSTAHKAMLADI

“Yangi Oʻzbekiston yoshlari, birlashaylik!” shiori ostida Amudaryo tumanida oʻtkazilgan “Yoshlar festivali” tadbirlarida tumanimiz yoshlari koʻtarinki ruhda qatnashdilar.

Festival doirasida tuman Madaniyat va istirohat bogʻida davlat xavfsizlik xizmati chegara qoʻshinlariga qarashli harbiy qism harbiylari tomonidan yosh avlod qalbida Vatan taqdiriga daxldorlik, burchga sadoqat, vatanparvarlik kabi ezgu tuygʻularni mustahkamlash va yuksaltirish maqsadida tadbirlar tashkil etildi. Yoshlar harbiy xizmatchi Sanjar Toshmatov ishtirokidagi davra suhbatida davlatimiz tomonidan harbiylar uchun yaratilgan shart-sharoitlar, imkoniyatlar, shuningdek, harbiylik kasbi haqidagi maʼlumotlarga ega boʻldilar.

Shu bilan birga, harbiy xizmatchilar tomonidan harbiy sohada erishilayotgan yutuqlar ham tilga olinib oʻtildi. Tadbir davomida harbiy qismga tegishli qurol-yarogʻ, harbiy texnikalar, aloqa vositalari, tibbiy anjomlar hamda taʼminot turlaridan  tashkil etilgan koʻrgazma va koʻrgazmali mashgʻulotlar namoyish etildi. Koʻrgazmada harbiy xizmatchilar qurollarni yoyish va yigʻishni amalda koʻrsatdilar. Shuningdek, oʻq otish, saf tayyorgarliklari, ommaviy qirgʻin qurollaridan himoyalanish usullari boʻyicha nazariy va amaliy tushunchalar berildi.

Harbiy qism xizmatchisi Hamza Xoʻjaniyozov harbiy texnikalar, qurol-aslahalardan hamda mashgʻulotlarda ishtirok etgan xizmat hayvonlaridan davlat chegarasini qoʻriqlashda qanday foydalanilishi toʻgʻrisida yoshlarga soʻzlab berdi. Xizmat hayvonlari boʻlgan ot va itlar bilan shugʻullanish, ular bilan oʻtkaziladigan harbiy mashgʻulotlar haqidagi maʼlumotlar va oʻtkazilgan koʻrgazmali mashgʻulotlar yoshlar uchun juda qiziqarli boʻldi. Harbiy qism hayoti, harbiy xizmatchilar uchun yaratilgan shart-sharoitlar hamda saf  va oʻq otish tayyorgarligi elementlari haqida batafsil tushunchalarga ega boʻlgan yoshlarda ushbu tadbir katta taassurot qoldirdi.

Tadbirdan soʻng, tuman Madaniyat boʻlimi tomonidan tayyorlangan “Yoshlar ovozi” nomli gala kontsert boshlandi. Festival ishtirokchilari dastlab tumandagi yosh xunarmandlarning bichish-tikish,  rassomchilik namunalari, yogʻoch va temirdan ishlangan buyumlaridan tashkil qilingan koʻrgazma bilan tanishdilar.

Vatan ravnaqi yoʻlida yoshlarni birlashtirish, ularning faolligini oshirish, tashabbuskor yoshlarni ragʻbatlantirish maqsadida oʻtkazilgan “Yangi Oʻzbekiston yoshlari birlashaylik!” shiori ostidagi “Yoshlar ovozi” gala kontsertini tuman hokimi Sultonboy Yoʻldashev ochib berdi va barcha yoshlarni ushbu tantana bilan tabrikladi. Tuman hokimi yurtimizda yoshlar tarbiyasi, ularni baxtli, barkamol avlod qilib tarbiyalashga katta eʼtibor berilayotganiga alohida toʻxtaldi va farovon yurtimiz kelajagi  yoshlar iqtidori va intilishlari bilan bogʻliqligini aytib, ularga katta ishonch bildirdi.

Shundan soʻng, “Yangi Oʻzbekiston yoshlari, birlashaylik!” shiori ostida oʻtkazilgan yoshlar festivali doirasidagi musobaqalarda gʻoliblikni qoʻlga kiritgan yoshlar va faol oʻquvchilarni taqdirlash marosimi oʻtkazildi. Gʻoliblar faxriy yorliq, diplom va sovgʻalar bilan ragʻbatlantirildi.

Festival ishtirokchilari eʼtiboriga tumanimiz xalq jamoalari,  taniqli xushovoz  yosh estrada xonandalari, raqs dastalari  ishtirokida tayyorlangan katta gala kontsert dasturi havola etildi. Dastur davomida tomoshabinlar Vatan madhi, muhabbat va sadoqat, baxtli bolalik tarannum etilgan qoʻshiqlar, dilrabo raqslar ijrosidan yanada xushnud boʻldilar.

Maʼlumki, joriy yil iyun oyi davomida barcha hududlarda «Yangi Oʻzbekiston yoshlari, birlashaylik!» shiori ostida «Yoshlar oyligi» oʻtkazilmoqda. Oylik doirasida mamlakatimiz boʻylab 4 million 300 mingdan ziyod yoshlarni qamrab olish rejalashtirilgan.

Bu yil ilk marotaba mazkur oylik doirasida barcha tuman va shaharlarda 1-iyundan 30-iyunga qadar turli yoʻnalishlar boʻyicha tanlovlar, festivallar, intellektual oʻyinlar, sport musobaqalari oʻtkaziladi.

Oylik doirasidagi tadbirlar davom etmoqda.

Ozoda Xudoyberganova.