АМУДАРЁДА 221 ТОННА “КУМУШ ТОЛА” ХИРМОНИ БУНЁД ЭТИЛДИ

Туманимизда жорий деҳқончилик йилининг илк ҳосил хирмони бунёд этилди. Амударёлик пиллакорлар 221 тонналик юқори сифатли хом ашё етиштириб, зиммаларидаги шартномавий режаларини ортиғи билан бажарадилар.

Пиллачилик – сермашаққат соҳа. Бу соҳада муваффақиятга эришиб, мўл ҳосил олишнинг ўзи бўлмайди. Шу сабабли амударёлик пиллакорлар жорий йилги ипак қурти боқиш мавсумига ҳам пухта ҳозирлик кўрдилар.

Аввало, ипак қурти уруғини жонлантириш учун 16 та инкубаторий зарур жиҳозлар билан таъминланиб, ҳар бир инкубаторийга тажрибали ва ўз касбининг билимдонлари бўлган мутахассислар ишга жалб этилди. 3960 қути ипак қурти уруғи агротехника қоидаларига риоя қилган ҳолда жонлантирилиб, 1607 нафар касанчиларга 1703 қути, фермер хўжаликларига 2257 қути ипак қурти уруғи шартнома асосида тарқатиб берилди ва ипак қуртини парваришлаш, озиқлантириш жараёнлари малакали мутахассислар томонидан қатъий назорат қилиб борилди.

Бундан ташқари, мавсум давомида тут барги тақчиллигининг олдини олиш мақсадида касаначилар ва фермер хўжаликлари қарамоғидаги мавжуд тутзорларда март ойи бошиданоқ зарур агротехник тадбирлар амалга оширилиб, “Jayxun silk” масъулияти чекланган жамияти корхонаси томонидан янги тутзорлар барпо этилди ва бу янги тутзорларга 334,8 минг туп серҳосил тут кўчатлари ўтқазилди.

Ипак қурти уруғини тарқатиш жараёнида касаначи-пиллакорларга ҳар бир қути ипак қурти уруғи учун олдиндан 250 минг сўмдан бўнак пуллари берилди. Шу билан бирга мавсум ишларини сифатли ва уюшқоқлик билан ўтказиш мақсадида малакали мутахассислар қуртхоналарда тез-тез бўлишиб, жараённи тўлиқ назорат қилиб боришлари учун шароитлар яратилди. Натижада туманимиздаги барча қуртхоналарда мўл ва сифатли пилла ҳосили етиштирилди. Пиллакорларимиз жорий йилнинг 29 май санасида ўзлари етиштирган йилимизнинг биринчи ҳосили – пилла топширишни бошлаб юбордилар.

Шуни алоҳида қайд этиш жоизки, “Манғит Пилла” масъулияти чекланган жамиятига қарашли Манғит ва Хитой пилла қабул қилиш масканлари мавсумга ўз вақтида тахт қилиб қўйилгани туфайли пиллани қабул қилиш жараёни узлуксиз олиб борилишига эришилди. Бунинг учун Манғит пилла қабул қилиш масканига 50 нафар, Хитой пиллахонасига 20 нафар мавсумий ишчилар ишга қабул қилиниб, уларнинг меҳнати билан қабул қилиб олинган пилла ҳосили пешма-пеш қуритилиб, ўз вақтида ғумбагидан сифатли ажратиб олинишига алоҳида эътибор қаратилмоқда. Мазкур пилла қабул қилиш масканларида яратилган шарт-шароитлардан пиллакорлар ҳам мамнун.

Пиллачиликни етти хазинанинг бири, дейишади. Шу билан бирга ўта нозик ва эътиборталаб соҳа. Етиштирилган ҳосилнинг сифати эса пиллакорнинг фидойи меҳнатига боғлиқ. Фидойилик билан қилинган меҳнат эса ҳар томонлама эътироф этилиб, рағбатлантириб борилгани боис, пиллакорларнинг жорий йилги мавсум якунидан кайфиятлари баланд. Чунки режадан ташқари етиштирилган ҳар бир килограмм пилла учун пиллани қабул қилиш масканининг ўзидаёқ 25 минг сўмдан иш ҳақи берилгани, режадаги пилла ҳосилининг ҳар бир килограмми учун 22 минг 440 сўмдан ҳисоб-китоб қилиниши  пиллакорлар меҳнатига муносиб рағбат бўлди.

Ўз касбининг билимдонлари бўлган соҳа мутахассислари ва моҳир пиллакорлар меҳнати туфайли шартномавий режадаги 221 тонна ўрнига 223,7 тонна юқори сифатли пилла ҳосили йиғилиштириб олиниб, бу борадаги режа 101,2 фоизга ортиғи билан адо этилди. Етиштирилган ҳосилнинг 163,9 тоннаси Манғит, 59,8 тоннаси Хитой пилла қабул қилиш масканлари томонидан қабул қилиниб, айни пайтда пиллани сифатли қуритиш, саралаш ва ўз вақтида ғумбагидан ажратиш каби мавсум ишлари уюшқоқлик билан олиб борилмоқда.

Робия Йўлдошева.