“ТОЗА ҚЎЛЛАР ВА ТЎҒРИ НАФАС ОЛИШ” АКЦИЯСИ ДОИРАСИДА ТАДБИРЛАР ЎТКАЗИЛДИ

Республикамизда 13-22 июль кунлари “Тоза қўллар ва тўғри нафас олиш” акцияси муносабати билан тадбирлар  ўтказилди. Акция даволаш профилактика муассасаларида даволанаётган ёки бир марталик текширувга келган фуқаролар ўртасида ўтказилди. Уни ўтказишда ёшлар, кекса ёшли фуқаролар, спортчилар, ибратли оила вакиллари, волонтёрлар жалб этилди ва масофа сақлаган ҳолда истироҳат боғлари, маҳаллалар ва бозорларда олиб борилди.

24 июль куни Амударё туманида ҳам туман Тиббиёт бирлашмасида  Бирлашма бошлиғи Фахриддин Абдуллаев, Саломатлик бўлими шифокори Жумабой Явкашев иштирокида  акция муносабати тиббий ходимлари ўртасида якуний тадбир ташкил этилди. Унда кўп тармоқли марказий поликлиника, оилавий поликлиника, оилавий шифокорлик пунктлари ва марказий шифохона бўлимларнинг 72 нафар  мудирлари, бош мутахассислари қатнашдилар. Тадбир давомида Бирлашма бошлиғи Фахриддин Абдуллаев ва Саломатлик бўлими шифокори Жумабой Явкашевлар, спорт тарғиботчиси Ибодулла Нуримбетовлар 13-22 июль кунлари оралиғида “Тоза қўллар ва тўғри нафас олиш” шиори остида ўтказилган тадбирлар хусусида маълумот бериб ўтишди.

Бу акцияни ўтказишдан мақсад, аҳоли орасида кун сайин кўпайиб бораётган коронавирус инфекцияси билан боғлиқ касалликларнинг олдини олиш, профилактика қилиш эканлигини таъкидлашди.

Ундан ташқари, "Тоза қўллар" акцияси нафақат инсонни соғлом ва тетик бўлишида, ҳозирги коронавирус пандемияси даврида санитария-гигиена қоидаларига амал қилган ҳолда, касалликларни профилактика қилишда, соғлом турмуш тарзи асосини ташкил қилган соғлом овқатланиш, жисмоний фаолликка ундовчи чора-тадбирларни тарғиб қилишда жуда муҳим ўрин тутгани ҳақида айтиб ўтилди. Акция тумандаги барча ҳудудларда ўтказилиб, унга аҳолининг барча қатлами жалб этилгани, фуқаролар катта қизиқиш билан қатнашишгани, бундан кейин ушбу тадбирларни мунтазам равишда йўлга қўйиб, узвий давом эттириш кераклиги тўғрисида сўз юритилди.

Тадбирда таъкидланганидек, акция доирасида 122 та суҳбатлар уюштирилган, турли тадбирлар ўтказилиб, уларда 612 нафар фуқаро қатнашган. Фаол юриш тадбирларида, нафис гимнастика бўйича кўргазмали чиқишларда Тиббиёт бирлашмаси ва Навоий номли маҳалладан 144 нафар фуқаро иштирок этган.

Акция доирасида аҳолини антропометрик кўрсаткичлари қайта ўлчаб чиқилди. Шундан сўнг, "Соғлом" ва "Таянч" гуруҳларга ажратилиб, маҳалла йиғинларида ташкил этилган тиббий бригадалар томонидан "Соғлом ҳаёт" дастури доирасида "Саломатлик мактаби", "Эъзозли аёллар", "Нуронийлар” клуби, вазни 100 килограммдан юқори бўлган фуқаро ва аёллар учун "Чиройли қоматлар" клуби ташкил этилиб, клуб аъзоларига маҳаллаларда ташкил этиладиган соғлом овқатланиш бурчагида соғлом турмуш тарзи, соғлом овқатланиш қоидалари бўйича маҳорат дарслари ташкил этилди.

Тиббиёт бирлашмасининг Саломатлик бўлими томонидан фитобар ҳам ташкил этилиб, унда шифокор-мутахассислар аҳолига соғлом овқатланишни йўлга қўйиш, сабзавотлар ва мевалар, доривор гиёҳлардан қандай тартибда фойдаланиш, саломатлик майдончаларида тонгги бадантарбия, жисмоний фаолликка ундовчи машқларни бажариш бўйича ўз маслаҳат ва тавсияларини бериб бордилар.

Соғлиқни сақлаш вазирининг тавсиясига асосан, Республикамизда коронавирус инфекцияси билан боғлиқ мавжуд эпидемиологик ҳолатни инобатга олган ҳолда касалликлар профилактикаси ва реабилитация қилиш мақсадида соғлиқни сақлаш тизимидаги барча даволаш-профилактика муассасаларида, маҳалла ва ташкилотларда ўтказилган мазкур акция доирасидаги тадбирлар аҳолининг соғлом турмуш тарзи ҳақидаги тушунчаларини, билимларини мустаҳкамлашда муҳим аҳамият касб этди.

О. Худойберганова.