“TOZA QOʻLLAR VA TOʻGʻRI NAFAS OLISh” AKTsIYaSI DOIRASIDA TADBIRLAR OʻTKAZILDI

Respublikamizda 13-22-iyul kunlari “Toza qoʻllar va toʻgʻri nafas olish” aktsiyasi munosabati bilan tadbirlar  oʻtkazildi. Aktsiya davolash profilaktika muassasalarida davolanayotgan yoki bir martalik tekshiruvga kelgan fuqarolar oʻrtasida oʻtkazildi. Uni oʻtkazishda yoshlar, keksa yoshli fuqarolar, sportchilar, ibratli oila vakillari, volontyorlar jalb etildi va masofa saqlagan holda istirohat bogʻlari, mahallalar va bozorlarda olib borildi.

24-iyul kuni Amudaryo tumanida ham tuman Tibbiyot birlashmasida  Birlashma boshligʻi Faxriddin Abdullayev, Salomatlik boʻlimi shifokori Jumaboy Yavkashev ishtirokida  aktsiya munosabati tibbiy xodimlari oʻrtasida yakuniy tadbir tashkil etildi. Unda koʻp tarmoqli markaziy poliklinika, oilaviy poliklinika, oilaviy shifokorlik punktlari va markaziy shifoxona boʻlimlarning 72 nafar  mudirlari, bosh mutaxassislari qatnashdilar. Tadbir davomida Birlashma boshligʻi Faxriddin Abdullayev va Salomatlik boʻlimi shifokori Jumaboy Yavkashevlar, sport targʻibotchisi Ibodulla Nurimbetovlar 13-22-iyul kunlari oraligʻida “Toza qoʻllar va toʻgʻri nafas olish” shiori ostida oʻtkazilgan tadbirlar xususida maʼlumot berib oʻtishdi.

Bu aktsiyani oʻtkazishdan maqsad, aholi orasida kun sayin koʻpayib borayotgan koronavirus infektsiyasi bilan bogʻliq kasalliklarning oldini olish, profilaktika qilish ekanligini taʼkidlashdi.

Undan tashqari, "Toza qoʻllar" aktsiyasi nafaqat insonni sogʻlom va tetik boʻlishida, hozirgi koronavirus pandemiyasi davrida sanitariya-gigiyena qoidalariga amal qilgan holda, kasalliklarni profilaktika qilishda, sogʻlom turmush tarzi asosini tashkil qilgan sogʻlom ovqatlanish, jismoniy faollikka undovchi chora-tadbirlarni targʻib qilishda juda muhim oʻrin tutgani haqida aytib oʻtildi. Aktsiya tumandagi barcha hududlarda oʻtkazilib, unga aholining barcha qatlami jalb etilgani, fuqarolar katta qiziqish bilan qatnashishgani, bundan keyin ushbu tadbirlarni muntazam ravishda yoʻlga qoʻyib, uzviy davom ettirish kerakligi toʻgʻrisida soʻz yuritildi.

Tadbirda taʼkidlanganidek, aktsiya doirasida 122 ta suhbatlar uyushtirilgan, turli tadbirlar oʻtkazilib, ularda 612 nafar fuqaro qatnashgan. Faol yurish tadbirlarida, nafis gimnastika boʻyicha koʻrgazmali chiqishlarda Tibbiyot birlashmasi va Navoiy nomli mahalladan 144 nafar fuqaro ishtirok etgan.

Aktsiya doirasida aholini antropometrik koʻrsatkichlari qayta oʻlchab chiqildi. Shundan soʻng, "Sogʻlom" va "Tayanch" guruhlarga ajratilib, mahalla yigʻinlarida tashkil etilgan tibbiy brigadalar tomonidan "Sogʻlom hayot" dasturi doirasida "Salomatlik maktabi", "Eʼzozli ayollar", "Nuroniylar” klubi, vazni 100 kilogrammdan yuqori boʻlgan fuqaro va ayollar uchun "Chiroyli qomatlar" klubi tashkil etilib, klub aʼzolariga mahallalarda tashkil etiladigan sogʻlom ovqatlanish burchagida sogʻlom turmush tarzi, sogʻlom ovqatlanish qoidalari boʻyicha mahorat darslari tashkil etildi.

Tibbiyot birlashmasining Salomatlik boʻlimi tomonidan fitobar ham tashkil etilib, unda shifokor-mutaxassislar aholiga sogʻlom ovqatlanishni yoʻlga qoʻyish, sabzavotlar va mevalar, dorivor giyohlardan qanday tartibda foydalanish, salomatlik maydonchalarida tonggi badantarbiya, jismoniy faollikka undovchi mashqlarni bajarish boʻyicha oʻz maslahat va tavsiyalarini berib bordilar.

Sogʻliqni saqlash vazirining tavsiyasiga asosan, Respublikamizda koronavirus infektsiyasi bilan bogʻliq mavjud epidemiologik holatni inobatga olgan holda kasalliklar profilaktikasi va reabilitatsiya qilish maqsadida sogʻliqni saqlash tizimidagi barcha davolash-profilaktika muassasalarida, mahalla va tashkilotlarda oʻtkazilgan mazkur aktsiya doirasidagi tadbirlar aholining sogʻlom turmush tarzi haqidagi tushunchalarini, bilimlarini mustahkamlashda muhim ahamiyat kasb etdi.

O. Xudoyberganova.