Газета – ҳаётим бўлаги

Олийгоҳни тугатганимдан кейинги илк иш фаолиятимни мен учун азиз даргоҳ - "Амударё ҳақиқати” газетаси таҳририятидан бошладим. Олийгоҳда ўқиш давомида олган билимларимни бу даргоҳдаги устозларим Алламберган ака Жуманиёзов, Хонимжон опа Ражабова, Саъдулла ака Хўжаниёзов, Робия опа Йўлдошева, Ойгул опа Ражабовалардан тажриба ўрганиб, янада бойитишга, уларга муносиб шогирд бўлишга ҳаракат қилдим. Ваҳоланки, устозларимнинг ҳар бири ўзига хос иш услуби, етук тажриба, маҳорат мактабига эга иқтидорли, эл олдида ўз номи билан танилган журналистлар эди. Шу ўринда таъкидлашим жоизки, Алламберган ака Жуманиёзовдан ташаббускорлик, Хонимжон опа Ражабовадан кузатувчанлик, дадиллик, Саъдулла ака Хўжаниёзовдан талабчанлик, мулоҳазакорлик, Робия опа Йўлдошевадан жўшқинлик, самимийлик, Ойгул опа Ражабовадан эса вазминлик, интилувчанлик каби хислатларни, энг муҳими, уларнинг ҳар биридан фидойиликни ўргандим.

Таҳририятда иш бошлаган йилларим газета ҳаётида ўзига хос давр бўлди. Чунки шу йилларда бу ердаги журналистлар ташаббуси билан газета чоп этишнинг эски босма усулидан янги технологиялар асосида, яъни компьютерда саҳифалашга ўтила бошлаганди. Дастлаб газетанинг байрам сонлари, кейинчалик Алламберган ака Жуманиёзов ташаббуси ҳамда журналистлар жамоасининг ижодий қўллаб-қувватлаши билан "Юлдуз" ҳиссадорлик жамияти муассислигида ташкил этилган "Ҳамроз” газетаси ҳам компьютер ёрдамида тайёрланди. У пайтларда таҳририятда компьютер бўлмаганлиги сабабли марказга, Нукус шаҳридаги "Нукус полиграфкомбинати” МЧЖга бориб ишлашга тўғри келарди. Бу ўз ўрнида анча машаққат, қийинчилик туғдирса ҳам биз журналистлар газетани сифатли тайёрлаб, обуначиларга ўз вақтида етказиб беришга ҳаракат қилардик. Зеро, ҳар бир сонни тайёрлаш журналистлардан жуда катта матонат, меҳнат талаб қилар эди. Албатта, газетани йиллар давомида мухлислар назаридан қолдирмасликка ҳаракат қилиш ҳам оз меҳнат эвазига келмайди.

"Амударё ҳақиқати”нинг "Тараққиёт кўзгуси”га айланиши, унинг шу кунга қадар етиб келишида туманимиздаги ҳар бир журналистнинг машаққатли меҳнати, сабр-у бардоши, матонати, ҳиссаси бор. Ўз ўрнида мен ҳам мана шундай шарафли ишда журналист сифатида иштирок этганлигимдан фахрланаман.

Таҳририятда мен илк иш фаолиятимни бошладим ва ўзига хос ҳаёт тарзини – халқ учун, Ватан учун, жамият учун фидокор бўлишни ўргандим ҳамда ўз йўлимни топдим. Шу боис, таҳририятни, газетани ҳаётимнинг бир бўлаги деб биламан ва қадрлайман.

Озода Худойберганова,

журналист.