Ўзбекистон “Адолат” социал-демократик партияси туман кенгашининг VI пленуми бўлиб ўтди

Жорий йилнинг 17 август санасида туман ҳокимлигининг мажлислар залида Ўзбекистон “Адолат” социал-демократик партияси туман кенгашининг VI пленуми бўлиб ўтди. Пленумда партия фаоллари, бошланғич партия аъзолари, депутатлар иштирок этдилар. Йиғилишда жорий йилнинг биринчи ярмида “Адолат” социал-демократик партияси туман кенгаши томонидан партия сайловолди дастурида белгиланган вазифаларни амалга ошириш юзасидан туман кенгаши раиси Ўктам Йўлдашевнинг ҳисоботи тингланди.

Ҳисоботда таъкидланганидек, “Адолат” социал-демократик партиясининг асосий мақсади – ҳуқуқий-демократик давлат, ижтимоий йўналтирилган бозор иқтисодиётига асосланган кучли адолатли фуқаролик жамиятини барпо этиш ҳамда Ўзбекистон ҳудудида яшаётган барча миллат ва элатларнинг умумий манфаатларига мос келадиган, фуқароларнинг қонун олдида тенглиги, бирдамлиги, конституциявий ҳуқуқ ва эркинликлари таъминланган маънавий жипслашган жамиятни тараққий топтиришда фаол иштирок этишдир.

Шунингдек қайд этилишича, Ўзбекистон “Адолат” социал-демократик партияси Амударё тумани кенгаши ўз фаолиятини партиянинг 2020-2024 йилларга мўлжалланган сайловолди дастурида белгиланган вазифаларни амалга ошириш бўйича ишлаб чиқилган “Йўл харита”сига мувофиқ олиб бормоқда.

2021 йилнинг биринчи ярим йиллигидаги фаолияти давомида Ўзбекистон “Адолат” социал-демократик партияси Амударё тумани кенгаши ҳамда партиянинг маҳаллий кенгашлари томонидан қатор лойиҳалар асосида самарали ишлар амалга оширилган.

Жумладан, “Муаммо билан юзма-юз” лойиҳаси доирасида партиянинг ишчи гуруҳ аъзолари томонидан жами 49 та маҳаллада 23 та хонадон ва 5 та хўжалик юритувчи субъектлар ўрганилган. Учрашувлар мобайнида аҳоли томонидан 17 та мурожаатлар келиб тушган бўлиб, улар юзасидан мутасадди ташкилотларга 2 та депутатлик сўровлари юборилган ҳамда 15 та масала тегишли ташкилотларни жалб этган ҳолда ижобий ечимини топган. Барча мурожаатлар ҳуқуқий маслаҳатлар бериш орқали ҳал этилган.

Шу билан бирга “Сиёсий-ҳуқуқий билимларни мустаҳкамлаш – демократик жамият пойдевори” лойиҳаси доирасида партия лекторлари томонидан жами 24 маротаба сиёсий ўқувлар ташкил этилиб, 147 нафар иштирокчилар қамраб олинган.

Партиянинг “Бир ойда бир иш ўрни” лойиҳаси доирасида Ўзбекистон “Адолат” социал-демократик партияси Амударё тумани Кенгаши ва Халқ депутатлари туман Кенгашидаги партия депутатлик гуруҳи ташаббуси билан жами 3 нафар фуқаролар, 1 нафар ёш, 2 нафари аёллар ишга жойлаштирилган.

Партия туман кенгаши томонидан олиб борилган шу каби самарали ишлар натижасида партия аъзолари сони тобора ортиб бормоқда.

Йиғилишда партиянинг туман кенгаши конференсиясини чақириш тўғрисидаги масала ҳам муҳокама қилиниб, тегишли қарор қабул қилинди.

Шунингдек, ҳисобот юзасидан иштирокчиларнинг саволларга тегишли жавоблар берилиб, фикр-мулоҳасилар, таклифлар тингланди ҳамда Ўзбекистон “Адолат” социал-демократик партияси туман кенгашининг VI пленуми қарори қабул қилинди.

Туман ҳокимлигининг Ахборот хизмати.