Бадиий гимнастика бўйича Амударё тумани БЎСМ очиқ чемпионати бўлиб ўтди

Мамлакатимизда ёшларга қаратилаётган эътиборни янада кучайтириш, уларни маданият, санъат, жисмоний тарбия ва спортга кенг жалб этиш, уларга ахборот технологияларидан фойдаланиш кўникмаларини сингдириш, ёшлар ўртасида китобхонликни тарғиб қилиш, хотин-қизлар бандлигини ошириш мақсадида Ўзбекистон Республикаси Президенти томонидан илгари сурилган бешта муҳим ташаббус ёшларга оид давлат сиёсатида муҳим аҳамиятга эга бўлиб келмоқда.

Жойларда давлатимиз раҳбари томонидан илгари сурилган бешта муҳим ташаббусни амалга ошириш борасида тизимли ишлар қилинмоқда. Хусусан, Амударё тумани Болалар-ўсмирлар спорт мактаби ушбу бешта муҳим ташаббуснинг иккинчи ташаббуси - ёшларни жисмоний чиниқтириш, уларнинг спорт соҳасида қобилиятини намоён қилишлари борасида самарали фаолият олиб бормоқда.

Жорий йилнинг 19 сентябрь санасида туман Халқ таълими бўлимига қарашли 1-сонли мактабда бадиий гимнастика бўйича Болалар-ўсмирлар спорт мактаби очиқ чемпионати ўтказилди.

Мусобақада Қорақалпоғистон Республикасининг Тўрткўл, Чимбой, Тахятош, Халқабод ҳамда Амударё туманларидан 2008 - 2017 йилларда туғилган, турли ёш тоифасидаги жами 128 нафар бадиий гимнастикачи қизлар иштирок этдилар. Мусобақа жуда қизғин бахс-мунозарага бой тарзда ўтди.

Муросасиз кечган беллашувларда 10 нафар ҳакамлар иштирокчиларни баҳолаб бордилар. Мусобақанинг якуний натижаларига кўра энг юқоли балларни эгаллаган 70 нафар бадиий гимнастикачи қизлар энг олий ўринга муносиб кўрилдилар, 32 нафар иштирокчилар 2-ўрин соҳиби бўлдилар, 23 нафар қизлар эса 3-ўринни эгалладилар. Мусобақа совриндорлари диплом ҳамда турли эсдалик совғалари билан тақдирландилар.

Қайд этиш жоизки, бугунги кунда туман Болалар-ўсмирлар спорт мактабининг бадиий гимнастика тўгараги шуғулланувчилари қатор мусобақаларда совринли ўринларни қўлга киритиб келмоқдалар. Айни пайтда тўгаракда жами 78 нафар болажонлар бадиий гимастика спорт тури билан шуғулланиб келмоқдалар. Мактабнинг бадиий гимнастика тўгарагида тўрт нафар тажрибали мураббийлар ўқувчиларига ушбу спорт тури сир-асрорларини ўргатиб келмоқдалар. Устозларнинг машаққатли меҳнатлари самараси шогирдлар қўлга киритиб келаётган ютуқларида намоён бўлмоқда.

Бадиий гимнастика тўгараги шуғулланувчиларининг жорий йилда эришган ютуқларини таҳлил қиладиган бўлсак, улар Тошкент шаҳрида ўтказилган “Ёш юлдузчалар” турнирида 5 та олтин, 4 та кумуш, 3 та бронза медалларни қўлга киритганлар. “Қиш эртаги” турнирида 8 та олтин, 5 та кумуш, 1 та бронза медаллар гимнастикачи қизларимиз ҳисобига ёзилган.

Шунингдек, тўгарак шуғулланувчилари Хоразм вилояти Боғот тумани очиқ биринчилигида, Навоий шаҳрида ўтказилган очиқ турнирда фахрли 1-ўринни қўлга киритганлар. Қолаверса, 15 август санасида бадиий гимнастика бўйича Тошкент шаҳар очиқ биринчилигида туман Болалар-ўсмирлар спорт мактаби бадиий гимнастикачи қизлари фахрли 1-ўринни эгаллаб, диплом ҳамда эсдалик совғалари билан қайтдилар.

Айтиш керакки, бугунги кунда мамлакат аҳолисининг 30 фоизини 14 ёшдан 30 ёшгача бўлган йигит-қизлар ташкил этиб, уларнинг таълим олиши, касб-ҳунар эгаллаши, ўз қобилият ҳамда иқтидорларини намоён этишлари учун барча имкониятлар, кенг шарт-шароитлар яратилган. Ёшларнинг бўш вақтларини мазмунли ўтказишни ташкил этишга йўналтирилган бешта муҳим ташаббус ғояси бу борадаги ишларни янги бошқичга кўтармоқда.

 Чарос Арслонова.