Badiiy gimnastika boʻyicha Amudaryo tumani BOʻSM ochiq chempionati boʻlib oʻtdi

Mamlakatimizda yoshlarga qaratilayotgan eʼtiborni yanada kuchaytirish, ularni madaniyat, sanʼat, jismoniy tarbiya va sportga keng jalb etish, ularga axborot texnologiyalaridan foydalanish koʻnikmalarini singdirish, yoshlar oʻrtasida kitobxonlikni targʻib qilish, xotin-qizlar bandligini oshirish maqsadida Oʻzbekiston Respublikasi Prezidenti tomonidan ilgari surilgan beshta muhim tashabbus yoshlarga oid davlat siyosatida muhim ahamiyatga ega boʻlib kelmoqda.

Joylarda davlatimiz rahbari tomonidan ilgari surilgan beshta muhim tashabbusni amalga oshirish borasida tizimli ishlar qilinmoqda. Xususan, Amudaryo tumani Bolalar-oʻsmirlar sport maktabi ushbu beshta muhim tashabbusning ikkinchi tashabbusi - yoshlarni jismoniy chiniqtirish, ularning sport sohasida qobiliyatini namoyon qilishlari borasida samarali faoliyat olib bormoqda.

Joriy yilning 19-sentyabr sanasida tuman Xalq taʼlimi boʻlimiga qarashli 1-sonli maktabda badiiy gimnastika boʻyicha Bolalar-oʻsmirlar sport maktabi ochiq chempionati oʻtkazildi.

Musobaqada Qoraqalpogʻiston Respublikasining Toʻrtkoʻl, Chimboy, Taxyatosh, Xalqabod hamda Amudaryo tumanlaridan 2008 - 2017-yillarda tugʻilgan, turli yosh toifasidagi jami 128 nafar badiiy gimnastikachi qizlar ishtirok etdilar. Musobaqa juda qizgʻin baxs-munozaraga boy tarzda oʻtdi.

Murosasiz kechgan bellashuvlarda 10 nafar hakamlar ishtirokchilarni baholab bordilar. Musobaqaning yakuniy natijalariga koʻra eng yuqoli ballarni egallagan 70 nafar badiiy gimnastikachi qizlar eng oliy oʻringa munosib koʻrildilar, 32 nafar ishtirokchilar 2-oʻrin sohibi boʻldilar, 23 nafar qizlar esa 3-oʻrinni egalladilar. Musobaqa sovrindorlari diplom hamda turli esdalik sovgʻalari bilan taqdirlandilar.

Qayd etish joizki, bugungi kunda tuman Bolalar-oʻsmirlar sport maktabining badiiy gimnastika toʻgaragi shugʻullanuvchilari qator musobaqalarda sovrinli oʻrinlarni qoʻlga kiritib kelmoqdalar. Ayni paytda toʻgarakda jami 78 nafar bolajonlar badiiy gimastika sport turi bilan shugʻullanib kelmoqdalar. Maktabning badiiy gimnastika toʻgaragida toʻrt nafar tajribali murabbiylar oʻquvchilariga ushbu sport turi sir-asrorlarini oʻrgatib kelmoqdalar. Ustozlarning mashaqqatli mehnatlari samarasi shogirdlar qoʻlga kiritib kelayotgan yutuqlarida namoyon boʻlmoqda.

Badiiy gimnastika toʻgaragi shugʻullanuvchilarining joriy yilda erishgan yutuqlarini tahlil qiladigan boʻlsak, ular Toshkent shahrida oʻtkazilgan “Yosh yulduzchalar” turnirida 5 ta oltin, 4 ta kumush, 3 ta bronza medallarni qoʻlga kiritganlar. “Qish ertagi” turnirida 8 ta oltin, 5 ta kumush, 1 ta bronza medallar gimnastikachi qizlarimiz hisobiga yozilgan.

Shuningdek, toʻgarak shugʻullanuvchilari Xorazm viloyati Bogʻot tumani ochiq birinchiligida, Navoiy shahrida oʻtkazilgan ochiq turnirda faxrli 1-oʻrinni qoʻlga kiritganlar. Qolaversa, 15-avgust sanasida badiiy gimnastika boʻyicha Toshkent shahar ochiq birinchiligida tuman Bolalar-oʻsmirlar sport maktabi badiiy gimnastikachi qizlari faxrli 1-oʻrinni egallab, diplom hamda esdalik sovgʻalari bilan qaytdilar.

Aytish kerakki, bugungi kunda mamlakat aholisining 30 foizini 14 yoshdan 30 yoshgacha boʻlgan yigit-qizlar tashkil etib, ularning taʼlim olishi, kasb-hunar egallashi, oʻz qobiliyat hamda iqtidorlarini namoyon etishlari uchun barcha imkoniyatlar, keng shart-sharoitlar yaratilgan. Yoshlarning boʻsh vaqtlarini mazmunli oʻtkazishni tashkil etishga yoʻnaltirilgan beshta muhim tashabbus gʻoyasi bu boradagi ishlarni yangi boshqichga koʻtarmoqda.

 Charos Arslonova.