МАШҲУР СПОРТЧИЛАР АМУДАРЁДА СПОРТЧИ-ЁШЛАР БИЛАН УЧРАШИБ, МАҲОРАТ ДАРСЛАРИНИ ЎТКАЗИШДИ

21 октябрь куни дзю-до бўйича Ўзбекистон терма жамоаси бош тренери, “Токио - 2020” олимпия ўйинлари иштирокчилари ва бошқа нуфузли меҳмонлар Амударё тумани Болалар-ўсмирлар спорт мактабида спортчи ёшлар билан учрашиб, маҳорат дарсларини ўтказдилар.

Жорий йилнинг 21 октябрь санасида уч карра жаҳон чемпиони ва совриндори, дзю-до бўйича Ўзбекистон терма жамоаси бош тренери, машҳур спортчи Иляс Иладис, жаҳон чемпионати совриндори, “Токио - 2020” олимпия ўйинлари бронза медали соҳиби Давлат Бабанов, Халқаро турнирлар ғолиби, “Токио - 2020” олимпия ўйинлари иштирокчиси Бекмурат Олтибоев, “Рио - 2016” олимпия ўйинлари бронза медали соҳиби Диёрбек Ўрозбоев, Ўзбекистон терма жамоаси бош тренери Улуғбек Азизов, Ўзбекистон терма жамоаси тренери Фарҳод Тўраев, Жаҳон  чемпионати кумуш медали соҳиби Шарофиддин Лутфуллаев, Халқаро турнирлар ғолиби Муҳаммадкрим Хуррамов, Ўзбекистон Дзю-до Федерацияси раиси ўринбосари Элдор Қаҳҳоров ҳамда ҳамюртимиз, Халқаро турнирлар ғолиби, “Токио - 2020” олимпия ўйинлари иштирокчиси Шарофаддин Болтабоевлар Амударё туманига ташриф буюрдилар.

Машҳур спортчилар гуруҳини туман ҳокими Султонбой Йўлдашев  ва бошқа масъуллар самимий кутиб олдилар.

Айтиш керакки, амударёлик дзю-до кураши устаси, дзю-до бўйича Ўзбекистон терма жамоаси аъзоси, Халқаро турнирлар ғолиби ва “Токио - 2020” олимпия ўйинлари иштирокчиси Шарофаддин Болтабоев жаҳоннинг турли ҳудудларида бўлиб ўтган мусобақаларда ғалабаларга эришган спортчилардан бири. Унинг ғалабалари шарафига жаҳоннинг энг нуфузли шаҳарларида бўлиб ўтган мусобақаларда Ўзбекистон байроғи кўтарилганини нафақат Ўзбекистон, балки жаҳон дзю-до ишқибозлари жуда яхши билишади.

Шарофаддин Болтабоев спортдаги илк қадамини туман Болалар-ўсмирлар спорт мактаби тўгаракларидан бошлаган. Унинг учун бу маскан ҳамиша қадрли. Айни пайтда Ўзбекистон терма жамоаси таркибида фаолият юритаётган Шарофаддин Болтабоев ҳар гал ўзи туғлиб ўсган она шаҳри – Манғитга келганида Болалар-ўсмирлар спорт мактаби тўгаракларида шуғулланаётган спортчи-ёшлар билан учрашиб, маҳорат дарсларини ташкил этади. Шарофаддиннинг бу галги ташрифи нафақат унинг ўзи, балки Болалар-ўсмирлар спорт мактаби мураббийлари ва дзю-до кураши тўгараги аъзолари учун ҳам ёрқин таассуротларга бой бўлди.

Спортчиларни кутиб олиш маросимида туман Болалар-ўсмирлар спорт мактаби директори Чоршам Тожимуродов, туманимизнинг фахрий спортчилари ва ёшлар иштирок этишди.

Туман ҳокими Султонбой Йўлдашев туманимизга ташриф буюрган машҳур спортчиларни “Токио - 2020” олимпия ўйинларидаги ғалабалари, муваффақиятли иштирок этганлари ҳамда халқаро турнирларда эришган ютуқлари билан табриклади.

Шундан сўнг, меҳмонлар туман Болалар-ўсмирлар спорт мактаби спортчилари эришаётган ютуқлар акс этган кўргазма билан яқиндан  танишдилар ва туманимиздан етишиб чиққан турли халқаро турнирлар ва жаҳон чемионатлари совриндорлари бўлган фахрий спортчилар ҳамда  спорт мактаби тарбияланувчилари  билан самимий суҳбатда бўлдилар.

Фахрий спортчилар ва Болалар-ўсмирлар спорт мактаби тарбияланувчилари меҳмонларга ўзларини қизиқтирган саволлар билан мурожаат қилдилар. Қизиқарли савол-жавоблар ва самимий суҳбатдан сўнг меҳмон спортчилар Болалар-ўсмирлар спорт мактаби дзю-до спорти тўгараклари шуғулланувчилари учун маҳорат дарсларини ўтказишди.

Маҳорат дарслари жараёнида спорт мактаби тарбияланувчилари дзю-до спорти сирлари билан янада яқинроқ танишдилар. Шу билан бирга, жаҳон чемпионати совриндори, “Токио - 2020” олимпия ўйинлари бронза медали соҳиби Давлат Бабанов, Жаҳон чемпионати кумуш медали соҳиби Шарофиддин Лутфуллаев, “Рио – 2016”  олимпия ўйинлари бронза медали соҳиби Диёрбек Ўрозбоевларнинг кураш усуллари ҳақида маълумотга эга бўлдилар.

Айниқса, уч карра жаҳон чемпиони, олимпия  ўйинлари чемпиони ва совриндори, Ўзбекистон терма жамоаси бош тренери Иляс Илиадис, Ўзбекистон ёшлар терма жамоаси бош тренери Улуғбек Азизов, Ўзбекистон терма жамоаси тренери Фарҳод Тўраев, Ўзбекистон дзю-до Федерацияси раиси ўринбосари Элдор Қаҳҳоров, таниқли спортчилар Муҳаммадкарим Хуррамов ва Бекмурат Олтибоев, шунингдек, ҳамюртимиз Шарофаддин Болтабоевлар билан дилдан, самимий суҳбат қурдилар.

Маҳорат дарсларидан сўнг машҳур спортчиларга туман ҳокимининг совғалари топширилди.

Бўлиб ўтган учрашув ва маҳорат дарслари Болалар-ўсмирлар спорт мактабининг ёш спортчиларида катта таассуротлар қолдирди.

Робия ЙЎЛДОШЕВА.