САЙЛОВ УЧАСТКАЛАРИДА ХАЛҚИМИЗ УЮШҚОҚЛИК БИЛАН ЎЗЛАРИ ТАНЛАГАН НОМЗОДЛАРГА ОВОЗ БЕРМОҚДАЛАР
24 октябрь тонги юртимизда ўзгача шукуҳ ва кўтаринки руҳда қарши олинди. Бунинг боиси, юртдошларимиз зиммаларидаги юксак масъулиятни чуқур ҳис қилган ҳолда ўз яшаш ҳудудларидаги Ўзбекистон Республикаси Президенти сайловини ўтказувчи сайлов участкаларига бориб, ўзлари муносиб деб билган номзодга овоз беришга шошилмоқдалар.
Бу йилги Президент сайлови илк бора Сайлов Кодекси асосида янгича шароитда, демократик тамойилларга тўла амал қилинган ҳолда ўтмоқда. Сайлов участкаларида сайловчиларнинг бемалол келиши, овоз бериши учун зарур шароитлар яратилди, махсус жиҳозланган хоналар, транспорт, алоқа воситалари ва юқори тезликда ишлайдиган интернет тармоғига уланиш имконияти билан таъминланди. Қисқаси, сайловни миллий сайлов қонунчилиги талаблари, очиқлик ва ошкоралик, шаффофлик тамойилларига тўла амал қилган ҳолда ўтказиш учун барча шароитлар яратилди.
Манғит шаҳри марказида, туман Маданият бўлими биносида жойлашган 88-сонли сайлов участкасида ҳам муҳим сиёсий тадбир – Ўзбекистон Президенти сайловига пухта тараддуд кўрилди. Махсус хоналар, овоз бериш кабиналари тахт қилиб қўйилгани айни сайлов кунида сайловчиларнинг ўзлари муносиб деб билган номзодга овоз бериш жараёнини қонун талаблари асосида ўтказиш имконини бермоқда.
Участкада жами 2422 нафар сайловчи овоз беради. Шуларнинг 98 нафари илк бора сайловда иштирок этадиган ёшлардир. Сайловдан олдин ҳудудда яшайдиган турли миллат вакилларидан иборат зиёли, обрў-эътиборли кишилардан сайланган участка сайлов комиссияси аъзолари ушбу муҳим ва масъулиятли тадбир ҳақида кенг тушунтириш, тарғибот ишларини олиб боришгани ўзининг ижобий самараларини берди.
Эрталабданоқ сайловчилар юксак масъулиятни ҳис қилган ҳолда сайлов участкасига келиб, муносиб номзодга овоз бера бошладилар.
Мазкур сайлов участкасида 5 нафар сайловчи маълум сабабларга кўра муддатидан олдин сайлов қонунчилигимизга амал қилган ҳолда овоз беришди. Сайлов куни ҳудуддаги кекса ва бемор кишиларнинг хонадонларига бориб, уларнинг ҳам сайловда овоз беришини таъминлаш чоралари кўрилади.
Айни пайтда сайлов участкасида овоз бериш жараёни давом этмоқда.
Ойгул Ражабова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
