ТУМАН ҲОКИМИ СУЛТОНБОЙ ЙЎЛДАШЕВ ПРЕЗИДЕНТ САЙЛОВИДА ЎЗИ ТАНЛАГАН НОМЗОДГА ОВОЗ БЕРДИ
24 октябрь куни эрталабки соат 8:00 дан Президент сайловида овоз бериш бошланди. Амударё туманида ҳам Президент сайлови бўйича сайлов участкалари 8:00 дан очилди. Биринчи сайловчилар сайлов участкалари очилмасиданоқ ташриф буюра бошлашди.
Анъанага кўра, сайлов участкалари иши Ўзбекистон давлат мадҳияси ижроси билан бошланди.
Манғит шаҳрининг Дўстлик маҳалласидаги 2-сонли касб-ҳунар мактабида ташкил этилган 91-сонли сайлов участкасида ҳам карантин қоидаларига риоя этилган ҳолда сайлов жараёнлари бошлаб юборилди.
Участка ҳудудидаги Дўстлик маҳалласида 3653 нафар фуқаро яшайди. Рўйхатга 2318 нафар сайловчи киритилган. Улардан 54 нафари сайловда илк марта иштирок этаётганлар бўлса, 5 нафари кекса ёшдаги ва ногиронлиги бўлган фуқаролардир.
Мазкур маҳаллада яшовчи Амударё тумани ҳокими Султонбой Йўлдашев ҳам ушбу сайлов участкасига ўз конституциявий ҳуқуқидан фойдаланиб, Президент сайловида иштирок этиш ва ўзи танлаган номзодга овоз бериш мақсадида ташриф буюрди ва карантин қоидаларига амал қилган ҳолда овоз берди.
Сайлов участкасида сайловчиларнинг тана ҳароратини ўлчаш, антисептик суюқлиги, ва ҳимоя ниқоблари бўлмаганларга ҳимоя воситалари бериш йўлга қўйилган. Шунингдек, тиббиёт кабинетлари, она ва бола хоналари ташкил этилган. Сайловчилар учун яширин овоз бериш хоналаридан тортиб, кўчма овоз бериш қутиларигача тайёрлаб қўйилган.
Айниқса, имконияти чекланган, яъни ногиронлик аравачасидан фойдаланувчи сайловчилар учун бинога кириш жойида ногиронлар аравачасига мослаштирилган нишаб йўлкалари белгиланган талаблар асосида ўрнатилган. Яширин овоз бериш кабиналаридан бири ҳам худди шу каби сайловчилар учун мўлжаллаб ўрнатилган.
Сайловчилар участкада барча шароитлар яратилганидан, ўз конституциявий ҳуқуқларини амалга ошираётганларидан ниҳоятда мамнун.
Сайлов участкасида овоз бериш жараёни давом этмоқда.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
