Амударё туманида “Ватанпарвар” ташкилоти ташкил қилинганининг 30 йиллиги муносабати билан мусобақа ўтказилди

Ўзбекистон Республикаси мудофаасига кўмаклашувчи “Ватанпарвар” ташкилоти мамлакат аҳолиси, айниқса, ёшларни ҳарбий-ватанпарварлик, Ватанга садоқат руҳида тарбиялаш, уларнинг бўш вақтларини мазмунли ўтказишини таъминлаш, спортнинг техник ва амалий турларига жалб қилиш орқали улар ўртасида соғлом турмуш тарзини тарғиб қилиш ҳамда оммавий техник касбларга тайёрлаш бўйича муҳим вазифаларни адо этиш билан бир қаторда эҳтиёжманд оилалар фарзандларининг бўш вақтини мазмунли ўтишини таъминлаб келмоқда.

Яқинда “Ватанпарвар” ташкилоти Қорақалпоғистон Республикаси Кенгаши томонидан “Ёшлар дафтари” ва “Темир дафтар”лар рўйхатига киритилган Беруний, Тўрткўл ва Элликқалъа ёшлари ўртасида пневматик милтиқдан ўқ отиш, биатлон ва дуатлон спорт турлари Қорақалпоғистон биринчилиги баҳслари ўтказилди.

Амударё туманидаги ўқув-спорт техника клубида “Ватанпарвар” ташкилоти ташкил топганининг 30 йиллиги байрами муносабати билан ўтказилган мазкур мусобақа ёшлар ўртасида спортнинг техник ва амалий турларини тарғиб этиш, уларни соғлом турмуш тарзига ўргатиш ҳамда етакчилик қобилиятини шакллантириш мақсадида ташкил этилди.

Таъкидлаш жоизки, ташкилот томонидан бугунги кунда Ёшлар ишлари агентлиги ҳамда Бандлик ва меҳнат муносабатлари вазирлиги билан ҳамкорликда мамлакатимизда “Ёшлар дафтари” ва “Темир дафтар”га киритилган ёшлар ва эҳтиёжманд оилалар фарзандларини оммавий техник касбларга имтиёз асосида ўқитилиши йўлга қўйилди.

Президентимизнинг 2021 йил 20 апрелдаги Фармонига мувофиқ, “Ватанпарвар” ташкилотининг “Автомототранспорт ҳайдовчиларини тайёрлаш курслари”да эндиликда Меҳрибонлик уйлари тарбияланувчилари ҳам имтиёз асосида таҳсил олиши мумкин бўлди. Ана шундай имтиёзлардан фойдаланган Хўжайли туманидаги 1-сонли Меҳрибонлик уйи тарбияланувчиларнинг 25 нафар жорий йилда Нукус шаҳридаги ўқув-спорт техника клубида биринчилар қаторида таҳсил олиш бахтига муяссар бўлди.

Мусобақада фаол иштирок этган ёшлар ўрта масофага югуриш, велосипед ҳайдаш ҳамда пневматик милтиқдан ўқ отиш шартларини бажаришди. Иштирокчилардаги шижоат, ғалабага бўлган кучли иштиёқ беллашувларнинг сўнгги сонияларигача сезилиб турди.

Мусобақада Ўзбекистон Республикаси мудофаасига кўмаклашувчи “Ватанпарвар” ташкилоти марказий Кенгаши раиси ўринбосари Ҳасанбой Маҳмудов ҳамда ташкилотнинг Қорақалпоғистон Республикаси Кенгаши раиси Қувватбой Разбеков иштирок этди.

Якуний натижаларга кўра умумжамоа ҳисобида Қорақалпоғистон Республикаси биринчилиги баҳсларида Беруний тумани ёшлари шоҳсупанинг юқори поғонасидан жой олди. Элликқалъа тумани шарафини ҳимоя қилган ёшлар мусобақада иккинчи ўринни қўлга киритди. Учинчи ўринга тўрткўллик ёшлар жамоаси лойиқ деб топилди.

Ғолиб ва совриндор ёшларга ҳамда жамоаларга диплом, эсдалик совғалари топширилди. Беллашувларда биринчи ўринларни қайд этган ёшлар эндиликда мусобақаларнинг навбатдаги босқичларига йўлланмани қўлга киритишди. 

Шимоли-ғарбий ҳарбий округ матбуот хизмати