ХАЛҚ ДЕПУТАТЛАРИ ТУМАН КЕНГАШИДА БЎШАБ ҚОЛГАН ЎРИНГА ДЕПУТАТ САЙЛОВИ БЎЛИБ ЎТДИ

Амударё туманининг Бобур номли овулида 28 ноябрь куни халқ депутатлари Амударё туман Кенгашида бўшаб қолган ўринга депутат сайлови бўлиб ўтди.

Депутат – халқ вакили! У ўзи сайланган ҳудуд сайловчилари турмуши билан  яқиндан танишиб, муаммоларини аниқлаб, ечимига жон куйдирадиган, ривожланиш, янгиланишларга йўл очадиган, шу элнинг фарзандидай эртаги кун истиқболи учун жон куйдирадиган инсон. Албатта, шу боисдан ҳам  сайловчилар  миллий сайлов қонунчилигимизга кўра, ўзлари энг муносиб деб билган номзодга овоз берадилар.

Депутат сайлови Ўзбекистон Республикасининг Сайлов Кодексига тўла мувофиқ равишда ўтказилди. Унда рўйхатига киритилган 4221 нафар сайловчиларнинг 76,8 фоизи иштирок этдилар ва ўзлари танлаган номзодга овоз бердилар.

Округдаги мавжуд 3 та участка сайлов комиссияларининг баённомаларига асосан, энг кўп овоз олишга эришган, Ўзбекистон Экология партиясидан кўрсатилган номзод Янгибоев Шавкат Исломович Бобур номли  сайлов округидан халқ депутатлари туман Кенгаши депутатлигига сайланди.

Янгибоев Шавкат Исломович Ўзбекистон Республикаси Сайлов кодексининг 20- ва 97-моддаларига мувофиқ халқ депутатлари Амударё туман Кенгашига сайлов ўтказувчи туман сайлов комиссиясининг шу йил 28 ноябрь кунги 31-сонли қарорига кўра, Бобур сайлов округидан туман Кенгаши депутати қилиб рўйхатга олинди.

Шуни алоҳида таъкидлаш лозимки, сайлов кунигача аҳоли орасидан зиёли, обрў-эътиборли кишилар участка сайлов комиссияси аъзолигига сайлангани, улар сайловолди тарғибот-ташвиқот ишларини намунали олиб боришгани ҳам  муҳим аҳамиятга эга бўлди. Сайловдан олдин округ ҳудудида бўйича сиёсий партиялардан кўрсатилган номзодларнинг бир неча марта сайловчилар билан учрашувлари  ўтказилиб, аҳоли уларнинг ҳаёти, меҳнат фаолияти ва сайловолди дастури билан яқиндан таништирилди.

Шунингдек, сайлов кунида сайловчиларнинг  сайлов участкаларида ўзлари танлаган номзодларга эмин-эркин, демократик тамойилларга тўла риоя этилган ҳолда овоз беришларига тўла шароитлар яратилди.

Сайланган депутат – Ўзбекистон Экологик партияси аъзоси, “Манғит деҳқон бозори” масъулияти чекланган жамияти директори Янгибоев Шавкат Исломович келгусида сайловчиларининг ишончини оқлайди, деган умиддамиз.

О.РАЖАБОВА.