XALQ DEPUTATLARI TUMAN KENGAShIDA BOʻShAB QOLGAN OʻRINGA DEPUTAT SAYLOVI BOʻLIB OʻTDI

Amudaryo tumanining Bobur nomli ovulida 28-noyabr kuni xalq deputatlari Amudaryo tuman Kengashida boʻshab qolgan oʻringa deputat saylovi boʻlib oʻtdi.

Deputat – xalq vakili! U oʻzi saylangan hudud saylovchilari turmushi bilan  yaqindan tanishib, muammolarini aniqlab, yechimiga jon kuydiradigan, rivojlanish, yangilanishlarga yoʻl ochadigan, shu elning farzandiday ertagi kun istiqboli uchun jon kuydiradigan inson. Albatta, shu boisdan ham  saylovchilar  milliy saylov qonunchiligimizga koʻra, oʻzlari eng munosib deb bilgan nomzodga ovoz beradilar.

Deputat saylovi Oʻzbekiston Respublikasining Saylov Kodeksiga toʻla muvofiq ravishda oʻtkazildi. Unda roʻyxatiga kiritilgan 4221 nafar saylovchilarning 76,8 foizi ishtirok etdilar va oʻzlari tanlagan nomzodga ovoz berdilar.

Okrugdagi mavjud 3 ta uchastka saylov komissiyalarining bayonnomalariga asosan, eng koʻp ovoz olishga erishgan, Oʻzbekiston Ekologiya partiyasidan koʻrsatilgan nomzod Yangiboyev Shavkat Islomovich Bobur nomli  saylov okrugidan xalq deputatlari tuman Kengashi deputatligiga saylandi.

Yangiboyev Shavkat Islomovich Oʻzbekiston Respublikasi Saylov kodeksining 20- va 97-moddalariga muvofiq xalq deputatlari Amudaryo tuman Kengashiga saylov oʻtkazuvchi tuman saylov komissiyasining shu yil 28-noyabr kungi 31-sonli qaroriga koʻra, Bobur saylov okrugidan tuman Kengashi deputati qilib roʻyxatga olindi.

Shuni alohida taʼkidlash lozimki, saylov kunigacha aholi orasidan ziyoli, obroʻ-eʼtiborli kishilar uchastka saylov komissiyasi aʼzoligiga saylangani, ular saylovoldi targʻibot-tashviqot ishlarini namunali olib borishgani ham  muhim ahamiyatga ega boʻldi. Saylovdan oldin okrug hududida boʻyicha siyosiy partiyalardan koʻrsatilgan nomzodlarning bir necha marta saylovchilar bilan uchrashuvlari  oʻtkazilib, aholi ularning hayoti, mehnat faoliyati va saylovoldi dasturi bilan yaqindan tanishtirildi.

Shuningdek, saylov kunida saylovchilarning  saylov uchastkalarida oʻzlari tanlagan nomzodlarga emin-erkin, demokratik tamoyillarga toʻla rioya etilgan holda ovoz berishlariga toʻla sharoitlar yaratildi.

Saylangan deputat – Oʻzbekiston Ekologik partiyasi aʼzosi, “Mangʻit dehqon bozori” masʼuliyati cheklangan jamiyati direktori Yangiboyev Shavkat Islomovich kelgusida saylovchilarining ishonchini oqlaydi, degan umiddamiz.

O.RAJABOVA.