Амударё тумани ҳокими С.Йўлдашевнинг Конституция куни муносабати билан ташкил қилинган тантанали тадбирдаги табрик нутқи

Ассалому алайкум, қадрли ватандошлар!

Аввало, Сизларни, сизлар орқали бутун туманимиз аҳлини миллий давлатчилигимиз тарихидаги муҳим сана – Ўзбекистон Республикаси Конституцияси қабул қилинганининг 29 йиллик байрами билан чин қалбимдан самимий муборакбод этиб, барчангизга ўзимнинг юксак ҳурмат-эҳтиромим ва эзгу тилакларимни билдираман.

Қадрли дўстлар!

1992 йил 8 декабрда Ўзбекистон Республикаси Олий Кенгашининг ўн биринчи сессиясида мустақил Ватанимиз тарихида аҳамияти ва нуфузи жиҳатдан муҳим ҳужжат – бош қомусимиз – Ўзбекистон Республикаси Конституцияси қабул қилинган эди.

Ўтган қисқа даврда жамиятимизнинг сиёсий-ҳуқуқий ва ижтимоий-иқтисодий қиёфаси, одамларимизнинг дунёқараши бутунлай ўзгаргани, ҳар бир юртдошимиз мамлакатимизнинг тараққиётига муносиб ҳисса қўшаётгани Бош қомусимизнинг ҳаётбахш қудрати ва улкан салоҳиятидан далолат беради.

Ана шу улкан салоҳиятга таяниб, халқимиз бугунги кунда мураккаб синовларни мардона енгиб, юртимизда эркин, обод ва фаровон ҳаёт – янги Ўзбекистонни барпо этиш йўлида фидокорона меҳнат қилмоқда.

Кейинги йилларда ҳурматли Президентимиз томонидан “Халқ давлат ҳокимиятининг бирдан-бир манбаидир” деган конституциявий норма асосида мамлакатимизда халқ давлат органларига эмас, давлат органлари халқимизга хизмат қиладиган, Конституция ва қонун устувор бўлган самарали ва барқарор тизим шаклланмоқда.

Конституциямиз моҳиятига чуқур сингдирилган демократия ва ижтимоий адолатга садоқат ҳамда инсонпарварлик тамойилларини таъминлаш бўйича мамлакатимизда тизимли ва ортга қайтмайдиган демократик ислоҳотлар амалга оширилмоқда.

Бош Қомусимиз юртимизда озод демократик жамият барпо этишнинг, амалга оширилаётган кенг кўламли ислоҳотларнинг мустаҳкам қонуний асоси, обод ва фаровон ҳаётимизнинг кафолати бўлиб хизмат қилмоқда.

Қадрли дўстлар!

Бугун қайси соҳани олиб қарамайлик, тараққиёт ва ривожланиш, янгиланиш ва ўзгаришларга гувоҳ бўламиз. Буларнинг барчаси Асосий қомусимизнинг 2-моддасида мустаҳкамлаб қўйилган “Давлат халқ иродасини ифода этиб, унинг манфаатларига хизмат қилади. Давлат органлари ва мансабдор шахслар жамият ва фуқаролар олдида масъулдирлар” деган тамойилнинг амалий ифодасидир.

Туманимизда ҳам барча соҳаларда амалга оширилаётган ислоҳотлар туфайли барқарор ўсиш суръатлари қайд қилиниб, юксак натижаларга эришилмоқда. Биргина жорий йилда туманимизда 7 та умумтаълим мактабларида 12 млрд 860 млн сўмлик, 4 та мактабгача таълим ташкилотларида 4 млрд 436 млн сўмлик, 8 та маҳалла фуқаролар йиғинлари биноларида 3 млрд 310 млн сўмлик янги қурилиш, капитал ва жорий таъмирлаш ишлари олиб борилди.

Давлатимиз томонидан тадбиркор ва ишбилармонларни қўллаб-қувватлаш ва улар учун шарт-шароит яратиш борасида олиб бораётган ишлар туфайли, туманда жорий йилда 279 та кичик бизнес субектлари янгидан ташкил этилди.

Энг асосийси, жорий йилнинг ўтган 11 ойида туман бўйича 684 та янги иш ўринлари яратилди. Бунинг асосий қисми хотин-қизлар ва ёшлар ҳиссасига тўғри келди.

Эришган марраларимизнинг энг муҳими мамлакатимизни ислоҳ этиш ва демократлаштириш йўлидан дадил бораётганимиз, энг асосийси бугунги кунда юртимизда яратилаётган шарт-шароитлар қаторида инсон учун олий неъмат – тинчлик ва осойишталикнинг таъминланаётганидир. Буларнинг барчаси Конституциямизда белгилаб қўйилган адолатли ва демократик тамойилларнинг изчиллик билан ҳаётга татбиқ қилинаётганининг ёрқин мисолидир.

Азиз ва муҳтарам юртдошлар!

Сиз, азизларни, Сизнинг тимсолингизда бутун туманимиз аҳлини Конституция куни байрами билан яна бир бор чин қалбимдан табриклаб, барчангизга сиҳат-саломатлик, оилавий бахт, шахсий ва ижтимоий ҳаётда катта муваффақиятлар тилайман.

Хонадонларимизни, гўзал юртимизни тинчлик-осойишталик, файз-у барака асло тарк этмасин!