Amudaryo tumani hokimi S.Yoʻldashevning Konstitutsiya kuni munosabati bilan tashkil qilingan tantanali tadbirdagi tabrik nutqi

Assalomu alaykum, qadrli vatandoshlar!

Avvalo, Sizlarni, sizlar orqali butun tumanimiz ahlini milliy davlatchiligimiz tarixidagi muhim sana – Oʻzbekiston Respublikasi Konstitutsiyasi qabul qilinganining 29-yillik bayrami bilan chin qalbimdan samimiy muborakbod etib, barchangizga oʻzimning yuksak hurmat-ehtiromim va ezgu tilaklarimni bildiraman.

Qadrli doʻstlar!

1992-yil 8-dekabrda Oʻzbekiston Respublikasi Oliy Kengashining oʻn birinchi sessiyasida mustaqil Vatanimiz tarixida ahamiyati va nufuzi jihatdan muhim hujjat – bosh qomusimiz – Oʻzbekiston Respublikasi Konstitutsiyasi qabul qilingan edi.

Oʻtgan qisqa davrda jamiyatimizning siyosiy-huquqiy va ijtimoiy-iqtisodiy qiyofasi, odamlarimizning dunyoqarashi butunlay oʻzgargani, har bir yurtdoshimiz mamlakatimizning taraqqiyotiga munosib hissa qoʻshayotgani Bosh qomusimizning hayotbaxsh qudrati va ulkan salohiyatidan dalolat beradi.

Ana shu ulkan salohiyatga tayanib, xalqimiz bugungi kunda murakkab sinovlarni mardona yengib, yurtimizda erkin, obod va farovon hayot – yangi Oʻzbekistonni barpo etish yoʻlida fidokorona mehnat qilmoqda.

Keyingi yillarda hurmatli Prezidentimiz tomonidan “Xalq davlat hokimiyatining birdan-bir manbaidir” degan konstitutsiyaviy norma asosida mamlakatimizda xalq davlat organlariga emas, davlat organlari xalqimizga xizmat qiladigan, Konstitutsiya va qonun ustuvor boʻlgan samarali va barqaror tizim shakllanmoqda.

Konstitutsiyamiz mohiyatiga chuqur singdirilgan demokratiya va ijtimoiy adolatga sadoqat hamda insonparvarlik tamoyillarini taʼminlash boʻyicha mamlakatimizda tizimli va ortga qaytmaydigan demokratik islohotlar amalga oshirilmoqda.

Bosh Qomusimiz yurtimizda ozod demokratik jamiyat barpo etishning, amalga oshirilayotgan keng koʻlamli islohotlarning mustahkam qonuniy asosi, obod va farovon hayotimizning kafolati boʻlib xizmat qilmoqda.

Qadrli doʻstlar!

Bugun qaysi sohani olib qaramaylik, taraqqiyot va rivojlanish, yangilanish va oʻzgarishlarga guvoh boʻlamiz. Bularning barchasi Asosiy qomusimizning 2-moddasida mustahkamlab qoʻyilgan “Davlat xalq irodasini ifoda etib, uning manfaatlariga xizmat qiladi. Davlat organlari va mansabdor shaxslar jamiyat va fuqarolar oldida masʼuldirlar” degan tamoyilning amaliy ifodasidir.

Tumanimizda ham barcha sohalarda amalga oshirilayotgan islohotlar tufayli barqaror oʻsish surʼatlari qayd qilinib, yuksak natijalarga erishilmoqda. Birgina joriy yilda tumanimizda 7 ta umumtaʼlim maktablarida 12 mlrd 860 mln soʻmlik, 4 ta maktabgacha taʼlim tashkilotlarida 4 mlrd 436 mln soʻmlik, 8 ta mahalla fuqarolar yigʻinlari binolarida 3 mlrd 310 mln soʻmlik yangi qurilish, kapital va joriy taʼmirlash ishlari olib borildi.

Davlatimiz tomonidan tadbirkor va ishbilarmonlarni qoʻllab-quvvatlash va ular uchun shart-sharoit yaratish borasida olib borayotgan ishlar tufayli, tumanda joriy yilda 279 ta kichik biznes subektlari yangidan tashkil etildi.

Eng asosiysi, joriy yilning oʻtgan 11 oyida tuman boʻyicha 684 ta yangi ish oʻrinlari yaratildi. Buning asosiy qismi xotin-qizlar va yoshlar hissasiga toʻgʻri keldi.

Erishgan marralarimizning eng muhimi mamlakatimizni isloh etish va demokratlashtirish yoʻlidan dadil borayotganimiz, eng asosiysi bugungi kunda yurtimizda yaratilayotgan shart-sharoitlar qatorida inson uchun oliy neʼmat – tinchlik va osoyishtalikning taʼminlanayotganidir. Bularning barchasi Konstitutsiyamizda belgilab qoʻyilgan adolatli va demokratik tamoyillarning izchillik bilan hayotga tatbiq qilinayotganining yorqin misolidir.

Aziz va muhtaram yurtdoshlar!

Siz, azizlarni, Sizning timsolingizda butun tumanimiz ahlini Konstitutsiya kuni bayrami bilan yana bir bor chin qalbimdan tabriklab, barchangizga sihat-salomatlik, oilaviy baxt, shaxsiy va ijtimoiy hayotda katta muvaffaqiyatlar tilayman.

Xonadonlarimizni, goʻzal yurtimizni tinchlik-osoyishtalik, fayz-u baraka aslo tark etmasin!