Халқ депутатлари Амударё туман Кенгашининг 43-сессияси тўғрисида ахборот

2021 йил 17 декабрь куни Халқ депутатлари Амударё туман Кенгашининг 43-сессияси бўлиб ўтди.

Сессия ишида туман Кенгашин депутатлари, секторлар раҳбарлари, ҳоким ўринбосарлари, ҳокимлик масъул ходимлари, ҳуқуқ-тартибот органлари, бўлимлар, жамоат ташкилотлари раҳбарлари ҳамда оммавий ахборот воситалари вакиллари иштирок этди.

Сессия котиблигига 14-Пахтакор сайлов округидан депутат Тамара Юсупова сайланди.

Сессия кун тартибига туман ҳокимининг 2021 йил давомида туманни ижтимоий-иқтисодий ривожлантириш якунлари ҳамда келгуси 2022 йилги режаларга бағишланган мурожаати тўғрисидаги масала ҳавола қилинади.

Маълумки, амалдаги қонунчиликка мувофиқ йил якунида халқ депутатлари маҳаллий Кенгашлари сессияларини ўтказиш ҳамда ушбу сессияларда ҳокимларнинг тегишли ҳудудларни жорий йилда ижтимоий-иқтисодий ривожлантириш якунлари ва келгуси йилги режалар тўғрисида мурожаат қилишлари белгиланган.

Сенат тавсиясига кўра сессияга Кенгаш депутатлардан бири раислик қилиши тавсия қилинган. Шунга асосан туман Кенгашининг 8-Бўстон сайлов округидан депутати Махсуд Садуллаев сессияни очди ва олиб борди.

Сессия кун тартибидаги масала юзасидан Амударё тумани ҳокими Султонбой Йўлдашев сўзга чиқди ва мурожаат йўллади.

Мурожаатда туман ҳокими 2021 йилда юртдошларимизнинг фидокорона меҳнати натижасида барча соҳаларда салмоқли натижаларга эришилганини таъкидлаб ўтди.

Йил якунлари бўйича ўтган йил билан солиштирганда саноат маҳсулотларини ишлаб чиқариш 108 фоизга, қишлоқ хўжалиги маҳсулотларини етиштириш 103,8 фоизга, инвестициялар 106,7 фоизга, қурилиш ишлари 105,1 фоизга, чакана савдо 106 фоизга ва хизматлар кўрсатиш 123,1 фоизга ўсиши кутилаётгани қайд этилди.

Тадбиркорлик соҳасининг ҳар томонлама қўллаб-қувватланиши натижасида жорий йилнинг 1 декабрь ҳолатига 272 та кичик бизнес субъектлари ҳамда 449 та якка тартибдаги тадбиркорлар янгидан фаолият бошлади.

“Ҳар бир оила тадбиркор” дастури доирасида 11 ой давомида 1603 та жисмоний ва юридик шахсларга 42 млрд. сўм миқдорида тижорат банклари томонидан имтиёзли кредитлар ажратилди.

Туманни ижтимоий-иқтисодий ривожлантириш дастури доирасида 97,1 млрд. сўмлик 67 та лойиҳалар ишга туширилиб, 2041 та янги иш ўринлари яратилди.

Ўтган 11 ой давомида  6,1 млн. АҚШ доллари миқдорида тўғридан-тўғри хорижий инвестициялар ўзлаштирилиб, ўтган йилнинг мос даврига нисбатан 122 фоиз ўсиш суръати қайд қилинди. 11 ой давомида 9 млн. АҚШ доллари миқдорида маҳсулотлар экспорт қилинди.  

Ўтган 11 ойи давомида аҳоли бандлигига кўмаклашиш маркази томонидан 3954 нафар фуқаролар ишга жойлаштирилган.

Тиббиёт муассасаларига тиббий асбоб-ускуналар олиш учун 297,4 млн. сўм, биргина декабр ойининг ўзида маҳаллий бюжет маблағлари ҳисобидан 1,5 млрд сўм маблағ ажратилган.

Туман ҳокими ўз мурожаатида “Темир дафтар”, “Аёллар дафтари” ва “Ёшлар дафтари”да турга эҳтиёжманд фуқаролар ва оилаларнинг даромад манбаларини яратиш, уларни манзилли қўллаб-қувватлаш бўйича амалга оширилаётган ишлар хусусида ҳам тўхталиб ўтди.

Якунига етаётган йилда 29 та мактаблар биноларида 18,4 млрд сўмлик, 2 та мактабгача таълим ташкилотларида 4,9 млрд. сўмлик қурилиш-тамирлаш ишлари амалга оширилгани таъкидланди. Маҳаллий бюджет маблағлари ҳисобидан 5 та умумтаълим мактабларида 2,6 млрд сўмлик жорий таъмирлаш ишлари амалга оширилган.

Аҳолини уй-жой билан таъминлаш мақсадида Манғит шаҳрининг “Гулзор” массивида умумий қиймати 16,1 млрд. сўмлик 150 хонадонли 5 қаватли 3 та арзонлаштирилган уй-жойлар қурилмоқда. Шунингдек, тадбиркорлар томонидан янги тартиб асосида 2 та 5 қаватли 30 хонадонли кўп қаватли турар-жойлар қурилмоқда.

Туман ҳокими Султонбой Йўлдашев туманни 2022-2026 йилларда ижтимоий-иқтисодий ривожлантириш борасида амалга ошириладиган ишлар ҳақида ҳам батафсил тўхталиб ўтди.

Жумладан, келгуси йилларда умумий қиймати 2,7 трлн. сўм бўлган 217 та лойиҳалар амалга оширилади ва 5 714 та янги иш ўринлари яратилади. Экспорт ҳажми 143,5 млн. долларга, импорт ўрнини босувчи маҳсулотларни ишлаб чиқариш ҳажми 69,6 млн. долларга, бюджетга тушумлар 172,5 млрд. сўмга етказилади.

Келгуси йиллар давомида 32 та мактаб, 21 та мактабгача таълим ташкилоти бинолари, тиббиёт бирлашмасига қарашли 6 та бинолар реконструкция қилинади ва 44 та кўп қаватли уй-жойлар қурилади. “Обод қишлоқ” дастури доирасида 277 млрд сўмлик ишлар амалга оширилади.

Мазкур ишларни амалга ошириш натижасида 5 йил давомида 20,8 минг нафар аҳоли бандлиги таъминланади, мактаблар қуввати 4,3 минг ўринга оширилади, мактабгача ёшдаги боллар қамров даражаси 80 фоизга етказилади. Барча йўналишлар бўйича жами 9 992 нафар ишсиз фуқароларнинг бандлиги таъминланади.

Туман ҳокимининг мурожаатидан кейин депутатлар саволлар билан мурожаат қилдилар. Доимий комиссиялар раислари, фаол депутатлар сўзга чиқиб, туман ҳокимининг мурожаати бўйича фикрларини баён қилдилар.

Савол-жавоблар ва муҳокамалардан кейин кун тартибидаги масала бўйича қарор лойиҳаси ўқиб эшиттирилди. Туман ҳокимининг 2021 йил давомида туманни ижтимоий-иқтисодий ривожлантириш якунлари ҳамда келгуси 2022 йилги режаларга бағишланган мурожаати бўйича халқ депутатлари туман Кенгашининг қарори лойиҳаси ўқиб эшиттирилди ва депутатлар томонидан тасдиқланиб, қабул қилинди.

Сессия кун тартибига киритилган масала атрофлича кўриб чиқилди ва шу билан туман Кенгашининг 43-сессияси ўз ишини якунлади.

Сессиядан кейин Амударё тумани ҳокими Султонбой Йўлдошевнинг халққа мурожаати бўйича брифинг ташкил қилинди.

Брифингда секторлар раҳбарлари, туман ҳокими ўринбосарлари, ҳокимлик масъуллари ҳамда оммавий ахборот воситалари вакиллари қатнашди.

Брифингда “Тараққиёт кўзгуси” газетаси масъул котиби Озода Худойберганова келгуси йилда “Обод қишлоқ” дастурига киритилган ҳудудларда қандай ишлар амалга оширилиши режалаштирилгани ҳақида, блогер Фотима Эшимбетова маҳаллий бюджет маблағларининг сарфланиши ва “Фуқаролар учун очиқ бюджет” лойиҳасининг бюджет маблағларини адолатли ва шаффоф тақсимлашдаги аҳамияти ҳақида, “Менинг оилам” газетаси махсус мухбири Робия Йўлдошева очиқ электрон танлов орқали ижара ҳуқуқи асосида ер бериш жараёни қанчалик шаффоф бўлиши ва бериладиган ерлар қанчалик манзилли бўлиши ҳақида, Амударё телевидениеси махсус мухбири Комронбек Камолов келгуси йилларда туман ҳудудида қуриладиган уй-жойлар аҳолининг қандай қатламига берилиши ҳақида саволлар билан мурожаат қилдилар.

Туман ҳокими Султонбой Йўлдашев саволларга батафсил жавоб берди.

Шунинг билан брифинг ниҳоясига етди.

Амударё тумани ҳокимлигининг ахборот хизмати.