“ОБОД МАҲАЛЛА”да ҳовли тўйлари

Хушхабар яхши-да, одамнинг дилини яйратиб юборади. Таниш-у нотаниш ҳамюртларимизнинг қувончлари, ҳаётларидаги ўзгаришлар, турмуш тарзига монанд янгиланишлар ҳақидаги хушхабарлар бизни ҳамиша сафарга чорлайди. Айниқса, байрам саналари яқинлашганда таҳририятимизга ҳар куни ҳеч бўлмаганда икки-учта қувончли хабар келади. Ахир тўйга тўёналар тайёрлаш халқимиз учун бобомерос анъана-ку, - деймиз-да, юртдошларимизнинг яхши кунларида бирга бўлиш учун ижодий сафарга отланамиз.

Бугун ҳам шундай бўлди. Мустақиллик байрами арафасида "Амударё сув қурилиш бошқармаси” МЧЖ қурувчилари 10 та намунали уй-жойлар калитини эгаларига топширишни бошлагани, намунали уй-жойларда ҳовли тўйлари ўтказилаётгани ҳақида мақола тайёрлаш учун Манғит шаҳрининг "Тақир қалъа” мавзесига йўл олдик.

"Тақир қалъа”, дедик. Бу мавзе, агар "тақир” деган атамадан келиб чиқиб нисбат берадиган бўлсак, кечаги тап-тақир дала-даштдан асар ҳам топа олмайсиз. Нисбатан қисқа давр – 4 йил ичида бу ҳудуд ҳақиқий обод ва гўзал масканга айлантирилди. Давлатимиз томонидан яратиб берилган имкониятлардан, қулай шарт-шароитлардан баҳраманд яшаётган ўнлаб янги хонадон соҳиб ва соҳибаларининг қувончлари чексиз.

Яқиндагина, 2014 йилнинг 30 июль куни Қорақалпоғистон Республикаси Жўқорғи Кенгеси Президиумининг "Амударё туманидаги айрим географик объектларнинг номларига ўзгартиш киритиш ҳақида”ги 288-сонли қарорига асосан Манғит шаҳрининг бу янги мавзесига "Обод маҳалла” номи берилди.

- Обод, деса обод, дегулик, - дейди янги уйга кўчиб ўтган янги хонадон бекаси Санобархон Фирсик. – Ҳамма шарт-шароитлар муҳайё. Табиий газ, иссиқ-совуқ сув билан таъминланган, канализация тизимига эга. Бунақа қулайлик аввал биз учун хаёлий орзу эди.

- Орзуларингиз ҳаётингизга айланибди-да, муборак бўлсин! – қувончларига шерик бўлдик Санобарнинг.

Хонадон бекаси қувона-қувона уй хоналарини кўрсатади.

- Мана буниси меҳмонхона, - дейди кенг ва ёруғ, пешайвонли хона эшикларини очиб.

Меҳмонхонанинг ошхонага, ваннахонага яқин жойлашгани уй бекаси учун ҳам, меҳмонлар учун ҳам қулай. Айланма шаклдаги долон эса қаторасига жойлашган оромхоналар ва болалар учун мўлжалланган қўшимча хона ҳавосини мўътадиллаштириб туради. Барча қулайликларга эга ошхонанинг кенглигидан Санобар ҳам, унинг умр йўлдоши Азимбой Чоршамов ҳам хурсанд.

- Кузгача томорқа еримизни экишга тайёрлаб қўйсак, узум, анор, олма кўчатларини ўтқазаман, - дейди Азимбой. – Ҳовли-жойларимизни келаси йил танимай қоласиз. Боғли ҳовли қиламиз ҳали!

Биз борган кунимиздан бир кун аввал ҳовли тўйи ўтказган Азимбой билан Санобарнинг қувончи чексиз. "Ҳасан-Ҳусан ветеринария сервис” МЧЖ раиси Азимбой Чоршамовнинг, МЧЖнингҳар бир ишига масъулият билан қараб, умр йўлдошига ҳамиша қўл-қанот бўлиб келаётган Санобар Фирсикнинг ва бу аҳил оила фарзандларининг ҳаётига кириб келган қувончга ошно бўлиб, чиройли турмуш шароитига чин дилдан ҳавас қилдик.

- Аввалги уйимиз жудаям эскирган эди, - дейди Санобар. – Жиддий таъмирлаш ҳолатига келиб қолганди. Ўйлаб қарасак, таъмирлаш ишлари учун кетадиган маблағни намунали уй-жойлардан бири учун ўтказсак, қолган қисми узоқ муддатли банк кредити эвазига битиб қоларкан. Ўзаро маслаҳатлашиб, бир қарорга келдик-да, ҳужжатларни расмийлаштирдик. Бир йилнинг нари-берисида янги ҳовли-жойли бўлдик. Энг асосийси, югур-югурдан, асаббузарликлардан қутулдик, қурувчиларга раҳмат!

Бугун "Обод маҳалла”да ҳар куни бир ҳовли тўйи, ҳар куни бир бахтли оила янги ҳовли-жойга кўчиб ўтаётир. Озод ва обод, фаровон ҳаётимизнинг қувончлари, мустақил Ватаннинг фароғатга тўла тароватли лаҳзалари "Обод маҳалла” тонгларида ўз аксини топаётир. Ана, "Обод маҳалла”нинг яна бир обод хонадонида шўх-шодон кулгулар саси - яна бир оиланинг ҳовли тўйига чорлов!Бундай шодликлар, чорловлар мангу бўлсин!

Робия ЙЎЛДОШЕВА.