ТОМОРҚА ЕРЛАРДАН ФОЙДАЛАНИШ БЎЙИЧА СЕМИНАР БЎЛИБ ЎТДИ

Юртимизда кичик бизнес ва оилавий тадбиркорликни ривожлантириш, томорқадан унумли фойдаланиш учун кенг имкониятлар яратилган. Аҳоли томорқасидан самарали фойдаланишга қаратилган эътибор сабаб, нафақат озиқ-овқат маҳсулотлари етиштириш ҳажми ортмоқда, балки оилаларнинг турмуш фаровонлиги, даромади ҳам юксалмоқда. Мамлакатимизда экин ерларидан самарали фойдаланиш, фермер, деҳқон хўжаликлари ва томорқа ер эгалари фаолиятининг самарадорлигини янада ошириш, ҳуқуқларини ҳимоя қилиш, қулай имкониятлар яратиш бўйича қатор чора-тадбирлар амалга оширилмоқда.

2021 йилнинг 30 декабрь куни Амударё тумани ҳокимлигининг катта мажлислар залида томорқа ерлардан фойдаланишда самарадорликни янада ошириш мавзусида семинар ташкил этилди. Семинарни Ўзбекистон фермер, деҳқон хўжалиги ва томорқа ер эгалари Кенгаши ходимлари Баҳодир Хақназаров, Зафар Файзуллаев, Элмурод Бозоров ва бошқалар олиб борди ва ҳозирги кунда соҳа бўйича амалга оширилаётган чора-тадбирлар хусусида маълумот берди. Шунингдек семинарда, Амударё туманидаги фермер хўжаликлари раислари, тегишли ташкилот вакиллари ҳамда томорқа ер эгалари иштирок этишди.

Семинарда маълум қилинишича, Амударё туманида 39 406 нафар томорқа ер эгалари ихтиёрида 6 минг 652 гектар экин ери мавжуд бўлиб, ҳудудий дастурга асосан аҳоли томорқаларига экилиши белгиланган 1484 гектар “тўқсонбости” экинларини тўлиқ экилиб, 1632 гектар томорқа ерларига ушбу экинлар экилган. Шунингдек, Амударё туманидаги “Амударё томорқа хизмат” масъулияти чекланган жамияти томонидан “Бир маҳалла – бир маҳсулот” тамойили асосида Тўлқин, Оқ олтин, Хизр эли, Қипчоқ, Қангли овулларидаги 1247 та хонадонларнинг жами 7,8 гектар томорқа ерлари шудгорланиб, 450 кг пиёз, 30 кг сабзи, 20 кг карам уруғлари ва мевали дарахт кўчатлари етказиб берилган. Бундан ташқари, йил давомида тумандаги барча худудларида “Яшил макон” акцияси доирасида узум, мевали ва манзарали дарахт кўчатлари экиш юзасидан самарали ишлар амалга оширилиб, аҳоли томорқаларига 406,1 минг дона турли хилдаги мевали дарахт кўчатлари экилган.

Семинарда қайд этилишича, кам таъминланган ва боқувчисини йўқотган оилаларга илғор фермерлар бириктирилиб, уларга томорқа ерларига ишлов бериш, экин экиш ва парваришлаш бўйича ёрдам берилди ва бу ишлар тизимли равишда давом эттирилади. Бу жараёнларнинг барчаси депутатлар томонидан назорат қилиб борилиши белгиланган.

Шунингдек семинарда, йилига камида 3 марта ҳосил олишни йўлга қўйиб, томорқаларидан 45-50 млн сўмгача даромад олаётган амударёлик фаол деҳқонларнинг тажрибалари кенг тарғиб қилиш лозимлиги таъкидланди.  

Дарҳақиқат, бугунги кунда одамларнинг ерга бўлган муносабати тубдан ўзгариб, томорқадан самарали фойдаланиш маданияти юксалмоқда. Томорқа ерлардан самарали фойдаланиш орқали нафақат аҳоли бандлиги таъминланади, балки томорқаларда етиштирилган озиқ-овқат маҳсулотлари ички ва ташқи бозорни тўлдириб, дастурхонларимиз тўкинлигига, нарх-наво барқарорлигига ҳисса бўлиб қўшилади. Шу сабабли ҳам томорқадан унумли фойдаланиш кенг тарғиб қилинмоқда.

Фотима Эшимбетова.