TOMORQA YeRLARDAN FOYDALANISh BOʻYIChA SEMINAR BOʻLIB OʻTDI
Yurtimizda kichik biznes va oilaviy tadbirkorlikni rivojlantirish, tomorqadan unumli foydalanish uchun keng imkoniyatlar yaratilgan. Aholi tomorqasidan samarali foydalanishga qaratilgan eʼtibor sabab, nafaqat oziq-ovqat mahsulotlari yetishtirish hajmi ortmoqda, balki oilalarning turmush farovonligi, daromadi ham yuksalmoqda. Mamlakatimizda ekin yerlaridan samarali foydalanish, fermer, dehqon xoʻjaliklari va tomorqa yer egalari faoliyatining samaradorligini yanada oshirish, huquqlarini himoya qilish, qulay imkoniyatlar yaratish boʻyicha qator chora-tadbirlar amalga oshirilmoqda.
2021-yilning 30-dekabr kuni Amudaryo tumani hokimligining katta majlislar zalida tomorqa yerlardan foydalanishda samaradorlikni yanada oshirish mavzusida seminar tashkil etildi. Seminarni Oʻzbekiston fermer, dehqon xoʻjaligi va tomorqa yer egalari Kengashi xodimlari Bahodir Xaqnazarov, Zafar Fayzullayev, Elmurod Bozorov va boshqalar olib bordi va hozirgi kunda soha boʻyicha amalga oshirilayotgan chora-tadbirlar xususida maʼlumot berdi. Shuningdek seminarda, Amudaryo tumanidagi fermer xoʻjaliklari raislari, tegishli tashkilot vakillari hamda tomorqa yer egalari ishtirok etishdi.
Seminarda maʼlum qilinishicha, Amudaryo tumanida 39 406 nafar tomorqa yer egalari ixtiyorida 6 ming 652 gektar ekin yeri mavjud boʻlib, hududiy dasturga asosan aholi tomorqalariga ekilishi belgilangan 1484 gektar “toʻqsonbosti” ekinlarini toʻliq ekilib, 1632 gektar tomorqa yerlariga ushbu ekinlar ekilgan. Shuningdek, Amudaryo tumanidagi “Amudaryo tomorqa xizmat” masʼuliyati cheklangan jamiyati tomonidan “Bir mahalla – bir mahsulot” tamoyili asosida Toʻlqin, Oq oltin, Xizr eli, Qipchoq, Qangli ovullaridagi 1247 ta xonadonlarning jami 7,8 gektar tomorqa yerlari shudgorlanib, 450 kg piyoz, 30 kg sabzi, 20 kg karam urugʻlari va mevali daraxt koʻchatlari yetkazib berilgan. Bundan tashqari, yil davomida tumandagi barcha xududlarida “Yashil makon” aktsiyasi doirasida uzum, mevali va manzarali daraxt koʻchatlari ekish yuzasidan samarali ishlar amalga oshirilib, aholi tomorqalariga 406,1 ming dona turli xildagi mevali daraxt koʻchatlari ekilgan.
Seminarda qayd etilishicha, kam taʼminlangan va boquvchisini yoʻqotgan oilalarga ilgʻor fermerlar biriktirilib, ularga tomorqa yerlariga ishlov berish, ekin ekish va parvarishlash boʻyicha yordam berildi va bu ishlar tizimli ravishda davom ettiriladi. Bu jarayonlarning barchasi deputatlar tomonidan nazorat qilib borilishi belgilangan.
Shuningdek seminarda, yiliga kamida 3-marta hosil olishni yoʻlga qoʻyib, tomorqalaridan 45-50 mln soʻmgacha daromad olayotgan amudaryolik faol dehqonlarning tajribalari keng targʻib qilish lozimligi taʼkidlandi.
Darhaqiqat, bugungi kunda odamlarning yerga boʻlgan munosabati tubdan oʻzgarib, tomorqadan samarali foydalanish madaniyati yuksalmoqda. Tomorqa yerlardan samarali foydalanish orqali nafaqat aholi bandligi taʼminlanadi, balki tomorqalarda yetishtirilgan oziq-ovqat mahsulotlari ichki va tashqi bozorni toʻldirib, dasturxonlarimiz toʻkinligiga, narx-navo barqarorligiga hissa boʻlib qoʻshiladi. Shu sababli ham tomorqadan unumli foydalanish keng targʻib qilinmoqda.
Fotima Eshimbetova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
