ЯНГИ ЙИЛ КЕЧАСИДА

Ер-у осмон бирлашди, қор гуллари базмида,
Диллар шодон сирлашди, васл-у дийдор азмида.
Дўст-у ёрон жамлашди, шижоат бор жазмида,
Сўз ила нур қоришди, аҳли ашъор назмида –
Янги йилнинг завқидан ороланди ёвонлар.

Арчазорлар ифорин симирганда гул диёр,
Ёзиб кўнгил хуморин, дил тўлғонди бахтиёр.
Қор тагида баҳорни кўрганида неча бор,
Заминга бериб бағрин, халқим туйди ифтихор –
Ватаннинг қор, қишидан зиёланди давронлар.

Минг хилга дўнди қаранг, маҳаллалар ораста,
Сочилди ажиб жаранг, куй, яллалар пайваста.
Боғ-у роғлар кумушранг, қор гуллар даста-даста,
Анов чолларга қаранг, йигитлардай барваста –
“Омон-ей, омон”лардан зеболанди айвонлар.

“Лазги”дан бўлс-и-ин!” – дея қайроғин шақиллатиб,
Чўгирма бошда қия, бармоғин қарсиллатиб.
Ўзга этиб маҳлиё, жон-у танни титратиб,
“Лазги” тушди қария, воҳ-воҳ-ей, қойиллатиб,
Ажаб! Куйлар сеҳридан жилоланди ҳар ёнлар.

Безанди бошдин-оёқ Ватаннинг ҳар гўшаси,
Бўлди тун-у кун порлоқ, йилнинг зўр томошаси.
Жўшиб меҳр-у иштиёқ, юракларнинг иншоси –
“Қор хат”лар ёзилган чоғ тошди кўнгил чашмаси:
Сипқориб дил чашмидан ҳаёланди забонлар.

Созанда-ю гўянда, аҳли ашъор бир тараф,
Навоий, Бобур дилда, шеър битди неча салаф.
Бир ён ғазал, бадиҳа, бир ёнда наво талаб,
Наволарнинг мавжида раққосалар сафма-саф,
Ўйнади қийиб-қийиб, ҳеч қолмади армонлар.

Келинг, бу дам яхшилар, даврани кенгдан олиб,
Меҳр – қалбни нақшлар, оқибат бўлгай ғолиб.
Достон айтган бахшилар, куйларига чулғаниб,
Юраклар сел, эшилар, мудроқ диллар уйғониб –
Маънавият нуридан жилваланди имконлар.

Кўрдингизми, қир ошиб, келди тожик ёронлар,
Қардошлик тузин тотиб, жам бўлди қадрдонлар.
Неча фарсаҳ йўл босиб, қозоқ, қирғиз, туркманлар,
Келдилар қучоқ очиб, илдизи бир меҳмонлар –
Минг йиллик оқибатдан садоланди Туронлар.

Меҳмонлар келар йўлга ёзилди кумуш гилам,
Фасли қиш ўнг-у сўлда банд бўлди юмуш билан.
Халқим яшар кўнгилда хайрли ташвиш билан:
“Барака бор , - деб  – йилда, келди қорли қиш билан!”
Оппоқ қор уммонида ҳаволанди туғёнлар.

Бир ажиб ҳис устувор Янги йил кечасида,
Азалий синоат бор безанган Арчасида.
Ниятлари беғубор кекса-ёш чеҳрасида,
Робия дер, бетакрор куйларнинг жилвасида,
Янги Ўзбекистонга ҳавасланди жаҳонлар.

Робия ЙЎЛДОШЕВА.