Жайхун илҳомлари

Посбон акам
Менинг акам посбондир,
Қўли доим кўксида.
У бир метин қалқондир,
Жанговар қасам ила.

Ватанини, халқини,
Қўриқлайди тун-у кун.
Ўзбекистон тахтини,
Асрайди мисли устун.
Шаҳзодабону Зарифбоева.

Ҳарбийлар
Биз яшармиз тинч юртда,
Ҳаётимиз фаровон.
Тинчлик ортида турган,
Ҳарбийлар, бўлинг омон.

Чегарани қўриқлар,
Мард ва жасур ўғлонлар.
Ёв келса бу йўлда гар,
Кўксин тутар ҳарбийлар.
Оғабек Аминов.

Ҳарбий бўламан
Улғайиб, жасур посбон,
Мен ҳам ҳарбий бўламан.
Дилда қасамёд билан,
Юртга қалқон бўламан.

Қўриқлайман Ватанни,
Хавф-хатардан сақлайман.
Фидо айлаб жон-танни,
Эл ишончин оқлайман.
Шаҳризода
 Тозабоева.

Соғинч
Оппоқ орзуларга тўлдириб дилни,
Юракларга солиб ҳаяжонларни,
Зарлар билан безаб арчажонларни,
Янги йил, биз сени жуда соғиндик.

Шундай инсонлар бор, юракка яқин,
Сўзлари бир олам тилакка яқин.
Қилган яхшилиги Аллоҳга яқин,
Янги йил, биз сени жуда соғиндик.

Аламдан ва ғамдан эгма бошларни,
Дардидан халос эт хаста дилларни.
Ҳаётда йиғлатма ҳеч бир одамни,
Янги йил, биз сени жуда соғиндик.

Оппоқ қоринг тоза қалблардек,
Ниятлар улуғдир покиза, оппоқ.
Олдимизга қўйган режалар ҳам оқ,
Янги йил, биз сени жуда соғиндик.

Барча эзгуликни елкангда кўтар,
Халқимга олиб кел улуғ омадлар.
Ризқини бутун қил, бахтини тўкис,
Янги йил, биз сени жуда соғиндик.
Зуҳра Аҳмедова.

Янги йил кечасида
Соат ўн икки бўлди,
Янги йил кириб келди.
Ҳамма хуш кайфиятда,
Болажонлар ҳайратда.

Осмонларга боқсак гар,
Учиб юрар оқ укпар.
Дераза-ю эшикдан,
Ҳамма томоша қилар.

Янги йилнинг шукуҳи,
Барибир бошқачадир.
Ташрифи халқимизга,
Келтиргай бахт-у қадр.
Ёрқиной Кенжабоева, 11-мактаб ўқувчиси.

ҚОР
Деразадан боқаман,
Ташқарида ёғар қор.
Бир зумда далаларга,
Момиқ тўшак солар қор.

Қор ёғади, наздимда,
Қор эмас, ун сепилар.
Дарахтлар новдасига,
Оппоқ чойшаб ёпилар.

Болакайлар қувнашиб,
Қорбўрон ўйнашади.
Ажабо,  қиш завқини,
Шу болалар билади.

Қор ёғсин, ёғаверсин,
Кун бўйи тўхтамасин.
Она ернинг бағрига,
Момиқ кўрпа тўшасин.
Севинч Тўлибоева,
2-мактаб ўқувчиси.