Jayxun ilhomlari

Posbon akam
Mening akam posbondir,
Qoʻli doim koʻksida.
U bir metin qalqondir,
Jangovar qasam ila.

Vatanini, xalqini,
Qoʻriqlaydi tun-u kun.
Oʻzbekiston taxtini,
Asraydi misli ustun.
Shahzodabonu Zarifboyeva.

Harbiylar
Biz yasharmiz tinch yurtda,
Hayotimiz farovon.
Tinchlik ortida turgan,
Harbiylar, boʻling omon.

Chegarani qoʻriqlar,
Mard va jasur oʻgʻlonlar.
Yov kelsa bu yoʻlda gar,
Koʻksin tutar harbiylar.
Ogʻabek Aminov.

Harbiy boʻlaman
Ulgʻayib, jasur posbon,
Men ham harbiy boʻlaman.
Dilda qasamyod bilan,
Yurtga qalqon boʻlaman.

Qoʻriqlayman Vatanni,
Xavf-xatardan saqlayman.
Fido aylab jon-tanni,
El ishonchin oqlayman.
Shahrizoda
 Tozaboyeva.

Sogʻinch
Oppoq orzularga toʻldirib dilni,
Yuraklarga solib hayajonlarni,
Zarlar bilan bezab archajonlarni,
Yangi yil, biz seni juda sogʻindik.

Shunday insonlar bor, yurakka yaqin,
Soʻzlari bir olam tilakka yaqin.
Qilgan yaxshiligi Allohga yaqin,
Yangi yil, biz seni juda sogʻindik.

Alamdan va gʻamdan egma boshlarni,
Dardidan xalos et xasta dillarni.
Hayotda yigʻlatma hech bir odamni,
Yangi yil, biz seni juda sogʻindik.

Oppoq qoring toza qalblardek,
Niyatlar ulugʻdir pokiza, oppoq.
Oldimizga qoʻygan rejalar ham oq,
Yangi yil, biz seni juda sogʻindik.

Barcha ezgulikni yelkangda koʻtar,
Xalqimga olib kel ulugʻ omadlar.
Rizqini butun qil, baxtini toʻkis,
Yangi yil, biz seni juda sogʻindik.
Zuhra Ahmedova.

Yangi yil kechasida
Soat oʻn ikki boʻldi,
Yangi yil kirib keldi.
Hamma xush kayfiyatda,
Bolajonlar hayratda.

Osmonlarga boqsak gar,
Uchib yurar oq ukpar.
Deraza-yu eshikdan,
Hamma tomosha qilar.

Yangi yilning shukuhi,
Baribir boshqachadir.
Tashrifi xalqimizga,
Keltirgay baxt-u qadr.
Yorqinoy Kenjaboyeva, 11-maktab oʻquvchisi.

QOR
Derazadan boqaman,
Tashqarida yogʻar qor.
Bir zumda dalalarga,
Momiq toʻshak solar qor.

Qor yogʻadi, nazdimda,
Qor emas, un sepilar.
Daraxtlar novdasiga,
Oppoq choyshab yopilar.

Bolakaylar quvnashib,
Qorboʻron oʻynashadi.
Ajabo,  qish zavqini,
Shu bolalar biladi.

Qor yogʻsin, yogʻaversin,
Kun boʻyi toʻxtamasin.
Ona yerning bagʻriga,
Momiq koʻrpa toʻshasin.
Sevinch Toʻliboyeva,
2-maktab oʻquvchisi.