Амударё туманига шу кунгача жами 7 турдаги 211 минг 398 доза вакциналар олиб келинган

Дунёда коронавирус билан боғлиқ вазият янада мураккаблашмоқда. Айни пайтда COVID-19нинг янги “омикрон” штамми қатор мамлакатларда жиддий муаммоларини юзага келтирмоқда. Юртимизда ҳам коронавируснинг “омикрон” штамми аниқлангани сабабли шу кунларда Республика махсус комиссиясининг қарори билан жамоат жойларида ниқоб тақиш, ижтимоий масофани сақлаш, шахсий гигиена қоидаларига қатъий риоя этиш устидан назорат кучайтирилмоқда. Аҳолини COVID-19 инфекциясига қарши вакцина билан эмлаш жараёнлари бутун республикамизда бўлгани каби Амударё туманида ҳам қизғин тарзда олиб борилмоқда.

Карантин қоидаларига тўлиқ риоя этиш, вакцина билан эмланишнинг афзалликлари хусусида асосан туман Санитария эпидемиологик-осойишталик ва жамоат саломатлиги бўлими томонидан аҳоли ўртасида тарғибот-ташвиқот ишлари кенг турда ташкил этилиб, тушунчалар берилмоқда ва белгиланган ёшдаги фуқаролар эмланишга жалб этилмоқда.

Бугунги кунда ушбу ташкилотнинг 8 та бўлинмасида 96 нафар ходим меҳнат қилиб келмоқда. Бўлимда вакциналарни сақлаш учун омборхона мавжуд бўлиб, совутгичлар ва музлаткичлар билан таъминланган. Вакциналарни олиб келиш ва эмлаш пунктларига етказиш учун алоҳида автомашина ажратилган. Электр энергиясида узилишлар бўлган пайтда таъминотнинг узлуксиз ишлаши учун махсус генератор мавжуд.

Эмлаш ишлари асосан туман Тиббиёт бирлашмасига қарашли кўптармоқли марказий поликлинкада ташкил этилган. Шу билан бирга аҳолининг кўп қисмини қамраб олиш мақсадида овуллардаги тиббиёт масканларида ҳам эмлаш жараёнлари давом эттирилмоқда. Касалликдан ҳимояланишнинг энг самарали воситаси эмланиш эканлигини тўғри англаб етган фуқаролар ҳам бу жараёнларда фаол иштирок этишмоқда.

Қангли ва Қипчоқ овулларидаги аҳоли ҳам ўз ҳудудларидаги тиббиёт масканларига келиб, тиббий кўрикдан ўтишмоқда ва вакциналарнинг барча дозаларини ўз вақтда қабул қилишмоқда. Тарғибот-ташвиқот ишлари натижасида етарли маълумотларга эга бўлган овул фуқаролари ўз саломатлигига эътибор билан қараб, коронавирусга қарши эмланиш билан бирга карантин қоидаларига ҳам риоя этишмоқда.

Шу кунгача туманимизга  7 турдаги жами 211 минг 398 доза вакциналар олиб келинган бўлиб, биринчи доза билан 104 минг 92нафар, иккинчи доза билан 69 минг 836 нафар, учинчи доза билан 34 минг 543 нафар фуқаролар эмланди. Эмланган аҳоли организмида ҳосил бўлган иммунитет таранглигини ошириш учун эмланганига 6 ой бўлган фуқароларининг 1 минг 74 нафари бустер доза билан эмланди.

Барча эмлаш пунктлари, оилавий поликлиника ва туман Санитария эпидемиологик-осойишталик ва жамоат саломатлиги бўлими ходимлари томонидан касалликдан ҳимояланишда эмланиш, яъни оммавий иммунитетни ҳосил қилиш, шу билан биргаликда ижтимоий масофани сақлаш, ниқобда юриш, антисептик воситалардан тўғри фойдаланиш, шахсий гигиена қоидаларига риоя қилиш касалликдан сақланишнинг асосий усуллари эканлиги тўғрисида тарғибот-ташвиқот ишлари олиб бормоқда.

Карантин қоидаларига амал қилиш орқали вируснинг кенг тарқалишига чек қўйиш мумкин. Аммо бу билан коронавирус инфекциясини тўхтатиб бўлмайди. COVID-19 инфекциясига қарши курашиш ва унинг тарқалишининг олдини олишнинг энг самарали йўли инфекцияга қарши вакцина билан эмланишдир.

Юртимизнинг ҳар бир фуқароси ўзи ва яқинларини коронавирус инфекциясидан асраш учун қайта-қайта таъкидланаётган ва талаб этилаётган карантин қоидаларига риоя этиши керак. Антисептик ва гигиеник воситалардан мунтазам равишда фойдаланилса, инфекция юқишидан ҳимояланиш мумкин. Бу билан ҳар ким ўзи ва оиласидагиларнинг коронавирус инфекцияси билан зарарланишининг олдини олишга эришади. Энг муҳими, карантин қоидаларига қатъий риоя қилиш, шу билан бирга касалликка қарши тўлиқ эмланиш зарурлигини унутмаслик лозим.

 Г.Тажибоева, туман СЭОва ЖСБ Эпидемиология ва иммунопрофилактика бўлими мудираси.