Amudaryo tumaniga shu kungacha jami 7 turdagi 211 ming 398 doza vaktsinalar olib kelingan

Dunyoda koronavirus bilan bogʻliq vaziyat yanada murakkablashmoqda. Ayni paytda COVID-19ning yangi “omikron” shtammi qator mamlakatlarda jiddiy muammolarini yuzaga keltirmoqda. Yurtimizda ham koronavirusning “omikron” shtammi aniqlangani sababli shu kunlarda Respublika maxsus komissiyasining qarori bilan jamoat joylarida niqob taqish, ijtimoiy masofani saqlash, shaxsiy gigiyena qoidalariga qatʼiy rioya etish ustidan nazorat kuchaytirilmoqda. Aholini COVID-19 infektsiyasiga qarshi vaktsina bilan emlash jarayonlari butun respublikamizda boʻlgani kabi Amudaryo tumanida ham qizgʻin tarzda olib borilmoqda.

Karantin qoidalariga toʻliq rioya etish, vaktsina bilan emlanishning afzalliklari xususida asosan tuman Sanitariya epidemiologik-osoyishtalik va jamoat salomatligi boʻlimi tomonidan aholi oʻrtasida targʻibot-tashviqot ishlari keng turda tashkil etilib, tushunchalar berilmoqda va belgilangan yoshdagi fuqarolar emlanishga jalb etilmoqda.

Bugungi kunda ushbu tashkilotning 8 ta boʻlinmasida 96 nafar xodim mehnat qilib kelmoqda. Boʻlimda vaktsinalarni saqlash uchun omborxona mavjud boʻlib, sovutgichlar va muzlatkichlar bilan taʼminlangan. Vaktsinalarni olib kelish va emlash punktlariga yetkazish uchun alohida avtomashina ajratilgan. Elektr energiyasida uzilishlar boʻlgan paytda taʼminotning uzluksiz ishlashi uchun maxsus generator mavjud.

Emlash ishlari asosan tuman Tibbiyot birlashmasiga qarashli koʻptarmoqli markaziy poliklinkada tashkil etilgan. Shu bilan birga aholining koʻp qismini qamrab olish maqsadida ovullardagi tibbiyot maskanlarida ham emlash jarayonlari davom ettirilmoqda. Kasallikdan himoyalanishning eng samarali vositasi emlanish ekanligini toʻgʻri anglab yetgan fuqarolar ham bu jarayonlarda faol ishtirok etishmoqda.

Qangli va Qipchoq ovullaridagi aholi ham oʻz hududlaridagi tibbiyot maskanlariga kelib, tibbiy koʻrikdan oʻtishmoqda va vaktsinalarning barcha dozalarini oʻz vaqtda qabul qilishmoqda. Targʻibot-tashviqot ishlari natijasida yetarli maʼlumotlarga ega boʻlgan ovul fuqarolari oʻz salomatligiga eʼtibor bilan qarab, koronavirusga qarshi emlanish bilan birga karantin qoidalariga ham rioya etishmoqda.

Shu kungacha tumanimizga  7 turdagi jami 211 ming 398 doza vaktsinalar olib kelingan boʻlib, birinchi doza bilan 104 ming 92nafar, ikkinchi doza bilan 69 ming 836 nafar, uchinchi doza bilan 34 ming 543 nafar fuqarolar emlandi. Emlangan aholi organizmida hosil boʻlgan immunitet tarangligini oshirish uchun emlanganiga 6 oy boʻlgan fuqarolarining 1 ming 74 nafari buster doza bilan emlandi.

Barcha emlash punktlari, oilaviy poliklinika va tuman Sanitariya epidemiologik-osoyishtalik va jamoat salomatligi boʻlimi xodimlari tomonidan kasallikdan himoyalanishda emlanish, yaʼni ommaviy immunitetni hosil qilish, shu bilan birgalikda ijtimoiy masofani saqlash, niqobda yurish, antiseptik vositalardan toʻgʻri foydalanish, shaxsiy gigiyena qoidalariga rioya qilish kasallikdan saqlanishning asosiy usullari ekanligi toʻgʻrisida targʻibot-tashviqot ishlari olib bormoqda.

Karantin qoidalariga amal qilish orqali virusning keng tarqalishiga chek qoʻyish mumkin. Ammo bu bilan koronavirus infektsiyasini toʻxtatib boʻlmaydi. COVID-19 infektsiyasiga qarshi kurashish va uning tarqalishining oldini olishning eng samarali yoʻli infektsiyaga qarshi vaktsina bilan emlanishdir.

Yurtimizning har bir fuqarosi oʻzi va yaqinlarini koronavirus infektsiyasidan asrash uchun qayta-qayta taʼkidlanayotgan va talab etilayotgan karantin qoidalariga rioya etishi kerak. Antiseptik va gigiyenik vositalardan muntazam ravishda foydalanilsa, infektsiya yuqishidan himoyalanish mumkin. Bu bilan har kim oʻzi va oilasidagilarning koronavirus infektsiyasi bilan zararlanishining oldini olishga erishadi. Eng muhimi, karantin qoidalariga qatʼiy rioya qilish, shu bilan birga kasallikka qarshi toʻliq emlanish zarurligini unutmaslik lozim.

 G.Tajiboyeva, tuman SEOva JSB Epidemiologiya va immunoprofilaktika boʻlimi mudirasi.