ХАЛҚ ДЕПУТАТЛАРИ ТУМАН КЕНГАШИНИНГ 46-СЕССИЯСИ ТЎҒРИСИДА АХБОРОТ
9 февраль куни Халқ депутатлари туман Кенгашининг 46-сессияси бўлиб ўтди. Сессия мажлисида Кенгаш раиси, туман ҳокими Султонбой Йўлдашев, туман Кенгаши депутатлари, секторлар раҳбарлари, туман ҳокими ўринбосарлари, ҳокимлик масъул ходимлари, суд-ҳуқуқ соҳаси масъуллари, бўлимлар, тижорат банклари раҳбарлари, фуқароларнинг ўзини ўзи бошқариш органлари раислари ҳамда оммавий ахборот воситалари ходимлари иштирок этди.
Сессия ишида дастлаб туманни ижтимоий-иқтисодий ривожлантириш дастурларини амалга ошириш, янги иш ўринлари барпо этиш, инвестиция лойиҳаларини амалга ошириш, маҳаллий бюджет даромадларининг қўшимча манбаларини шакллантириш, солиқлар ва бошқа мажбурий тўловлар бўйича амалга оширилаётган ишлар тўғрисида туман ҳокимининг инвестиция масалалари бўйича ўринбосари Рашид Салаевнинг ҳисоботи тингланди.
Ҳисоботда туманни ижтимоий иқтисодий-ривожлантириш бўйича 2021 йилда мумий қиймати 58,1 млрд. сўмлик 35 та лойиҳалар ишга туширилганлиги ва 1 минг 904 та янги иш ўринлари яратилганлигини маълум қилинди. Шунингдек, янгидан ишга туширилган лойиҳалар ҳақида кенг турда маълумот бериб ўтилди.
Шундан сўнг депутатлар туман давлат солиқ инспекцияси бошлиғи Айдос Сеитовнинг ҳисоботини тингладилар. Ҳисоботда ДСИ бошлиғи туманни ижтимоий-иқтисодий ривожлантириш дастурларини амалга ошириш, солиқлар ва бошқа мажбурий тўловларни йиғиш ва маҳаллий бюджетга тушумларни ошириш бўйича қилинаётган ишларга батафсил тўхталиб ўтди.
Сессия 2021 йил давомида жиноятчилик ва қонунийликнинг аҳволи ҳамда бу борада туман прокуратураси томонидан амалга оширилган ишлар юзасидан туман прокурори Жавлонбек Муфтуллаевнинг ахбороти тингланди.
Ахборота қайд этилганидек, туманда амалга оширилаётган ишларда асосий эътибор муҳтарам Президентимиз томонидан прокуратура органларига асосий вазифа сифатида юклатилган жиноятчиликнинг олдини олиш, тадбиркорликни қўллаб-қувватлаш, секторлар фаолияти, аҳолининг турмуш даражасини яхшилаш, улардаги мавжуд муаммоларни ўрганиш, “Обод қишлоқ” ва “Обод маҳалла” ҳамда “Ҳар бир оила тадбиркор” каби Давлат дастурларнинг ижросини назорат қилишга қаратилган.
Шунингдек сессия ишида туман Ички ишлар бўлими бошлиғи Улуғбек Худайбергановнинг туманда жиноятчилик ва ҳуқуқбузарликларнинг олдини олиш ҳамда уларнинг профилактикасини ташкил этиш бўйича 2021 йилда амалга оширилган ишлар юзасидан ҳисоботи тингланди. Ҳисоботда тумандаги барча ҳудудлар бўйлаб аниқланган жиноятлар, жиноятчиликнинг олдини олишга қаратилган профилактик тадбирлар ҳақида кенг турда маълумотлар бериб ўтилди.
Шундан сўнг сессияда туман Халқ қабулхонаси мудири Эркин Ражабов маҳаллаларда тадбиркорликни ривожлантириш, аҳоли бандлигини таъминлаш ва камбағалликни қисқартириш бўйича келиб тушаётган мурожаатларни таҳлил қилган ҳолда, ҳоким ёрдамчилари фаолиятининг натижадорлигини ўрганиш тўғрисида ахборот берди. Туман Халқ қабулхонаси мудири депутатларга 2022 йил январь ойида фуқаролар томонидан келиб тушган мурожаатлар бўйича, маҳалладаги ишсиз аҳолини иш билан таъминлаш ва кредит ажратилишида ҳоким ёрдамчилари томонидан амалга оширилаётган ишлар хусусида маълумот берди.
Шунингдек сессияда Амударё туманида 2021 йилда экология ва атроф-муҳитни муҳофаза қилиш соҳасида амалга оширилган ишлар юзасидан Қорақалпоғистон Республикаси экология ва атроф-муҳитни муҳофаза қилиш қўмитасининг Амударё тумани инспекцияси раҳбариятининг ҳисоботи ҳам тингланди. Инспекция бошлиғининг ўринбосари Ғ.Искандаров кун тартибидаги масала бўйича батафсил маълумотлар бериб ўтди.
Бундан ташқари сессия ишида Амударё тумани Халқ таълими бўлимига қарашли 35-сонли мактабда директорлик лавозимига ўтказилган танлов якунлари бўйича номзодга келишим бериш тўғрисидаги масала ҳам кўриб чиқилди. Номзод Бахрам Палванов келгуси 3 йилда мактабда таълим сифатини оширишга қаратилган дастурини депутатлар эътиборига ҳавола қилди. Шундан сўнг очиқ овоз бериш йўли билан номзодга келишим бериш масаласи муҳокамага қўйилди.
Сессия ишида Кенгаш ваколатига кирувчи бошқа масалалар ҳам муҳокама қилиниб, барча масалалар юзасидан тегишли қарорлар қабул қилинди. Шунинг билан сессия ўз ишини якунлади.
Туман ҳокимлигининг ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
