ОИЛАНИНГ МЎЛ ДАРОМАД МАНБАИ
Мамлакатимиз табиий иқлим шароитида 300 кундан ортиқ қуёшли кунларнинг мавжудлиги ҳудудимиз деҳқонлари учун оддий конструкцияли иссиқхоналарда ҳам табиий шароитда турли кўкатлар, исмалоқ ва эртаги экинлар кўчатларини етиштириш имконини беради.
Туманимизда плёнка билан ёпилган иссиқхонада иситиш воситалари ўрнатмасдан, кўкламда эртаги сабзавотлар кўчатлари билан деҳқонларимизни таъминлаб, юртдошларимиз дастурхони тўкинлигига муносиб ҳисса қўшаётганлар талайгина.
Қиличбой овулида истиқомат қилувчи моҳир томорқачи Қўчқорбой Нуримов шуларнинг бири. У ўз томорқасига ўрнатган қўлбола 4 сотихлик иссиқхонасида қиш бўйи турли кўкатлар, барра пиёз, исмалоқ етиштириб, бозорга сотади. Эрта кўкламда эса иссиқхонанинг пиёз, исмалоқдан бўшаган ерларида эртаги экинлар кўчати етиштиради. Уй шароитида эккан бодринг, помидор, бақлажон, булғор қалампири каби рўзғор учун керакли экинлар уруғлари униб чиққач, ҳозирги кунда яшикларга кўчириб ўтқазиб, иссиқхонасида парвариш қилмоқда.
Иссиқхонага кирган киши қуёш нуридан баҳра олиб, дуркун ривожланаётган кўчатларнинг худди ёз пишиқчилигининг ҳидини таратаётганига гувоҳ бўлади, кўзи қувонади.
– Буларнинг бари меҳнат туфайли. Оила аъзоларимиз билан бекор ўтирмай, неча йиллардан бери турли кўкатлар, исмалоқ, эртаги экинлар кўчати етиштирамиз, келгусида замонавий иссиқхона қуриб, фаолиятимизни кенгайтириш ниятимиз бор, – дейди Қўчқорбой Нуримов.
Унинг амалга ошираётган ишлари билан танишган одам агар кўнгилда ният бўлса, оилада ҳам даромад манбаларини яратиш мумкин эканлигига иқрор бўлади.
Асли миришкор деҳқонлар юрти ҳисобланмиш Қиличбойда Қўчқорбой Нуримов каби деҳқончиликдан мўл даромад олиб, оиласи фаровонлигини таъминлаётганлар сафи ортиб бормоқда.
Ойгул РАЖАБОВА.
Суратда: Қиличбой овул фуқаролар йиғини раиси Баҳром Қодиров (чапда)
ва томорқачи Қўчқорбой Нуримовлар экинларни кўздан кечирмоқда.
Маҳмуджон ШОМУРОДОВ
олган сурат.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
