8 март - Халқаро хотин-қизлар куни муносабати билан Амударё туманида байрам тадбири ўтказилди
Аёл! Унинг таърифига сўз мулки ожиз. У аввало фарзандларини меҳри ардоғида авайлаб, юрт корига ярайдиган қилиб вояга етказувчи фидойи она, эл-юртимиз тинчлиги-тотувлиги учун, фаровонлиги учун курашувчи матонатли инсон, оилаларни ва демакки, кўнгилларни нурафшон этувчи муқаддас зот! Шу боисдан улар доимо давлатимиз ғамхўрлигида, эъзозида.
Шу сабабли ҳам мамлакатимизда хотин-қизларнинг ижтимоий-сиёсий фаоллигини ошириш, уларнинг турли соҳа ва тармоқларда ўз қобилият ва имкониятларини рўёбга чиқариши учун шароит яратиш, қонуний ҳуқуқ ва манфаатларини ҳимоя қилиш, қўллаб-қувватлаш, оила институтини мустаҳкамлаш борасида кўламдор ишлар амалга оширилмоқда.
Жамият ҳаётида фаоллик ва ташаббускорлик кўрсатган, ўзларининг самарали меҳнатлари билан оилаларнинг шаклланишига, фаровонлиги ошишига муносиб ҳисса қўшаётган аёллар турли унвонлар ва давлат мукофотлари, кўкрак нишонлари билан тақдирланиб келмоқда. Барча жабҳаларда фидойилик қилаётган аёлларнинг меҳнати муносиб баҳоланмоқда. Шунингдек, уларнинг интеллектуал салоҳиятини юксалтириш, қўллаб-қувватлашга эътибор қаратилаётир.
Ҳар йили мамлакатимизда 8 март – Халқаро хотин-қизлар байрами кенг нишонланади. Сана муносабати билан турли соҳаларнинг илғор аёл-қизларига алоҳида эҳтиро кўрсатилиб, эъзозланади.
7 март куни амударёлик фаол аёл-қизлар учун ҳам “Муқаддас аёл” деб номланган байрам тадбири ташкил қилинди.
Манғит шаҳридаги “Хон” ресторанида бўлиб ўтган адабий-мусиқий тадбирда туманимиздаги турли соҳаларда самарали меҳнат қилаётган аёллар, ўз ҳаётий тажрибаси асосида ёшлар тарбиясига, оилалар мустаҳкамлигига муносиб ҳисса қўшаётган нуроний онахонлар, умидли, иқтидорли қизлар иштирок этдилар.
Йиғилганларни туман ҳокими Султонбой Йўлдашев 8 март – Халқаро хотин-қизлар куни билан қизғин табриклади. “Ҳақиқатан ҳам, гўзаллик ва нафосат, меҳру муҳаббат, вафо ва назокат рамзи бўлган, ўзининг меҳрибонлиги, қалб саховати билан ҳар қайси оилани оила қиладиган, унга файз-у тароват берадиган, фарзандларимиз юрагига ўз она юртига севги ва садоқат туйғусини сингдирадиган аёлларимизнинг бетакрор фазилатлари ҳақида ҳар қанча гапирсак, уларни ҳар қанча эъзозласак, арзийди” деди туманимиз ҳокими табрик нутқида.
Дарҳақиқат, мамлакатимизда аёлларнинг жамиятдаги ўрни ва мавқеига юқори баҳо берилиб, уларнинг ҳуқуқ ва манфаатларини ҳимоя қилиш, хотин-қизларимизнинг билимдон, замонавий мутахассис, малакали касб эгалари бўлишлари ҳамда соғлом ва мустаҳкам оила қуришлари учун зарур шарт-шароитлар яратиш борасида мамлакатимизда кенг кўламли ислоҳотлар олиб борилмоқда. Президентимиз ташаббуслари билан яқиндагина “Хотин-қизлар ва оила ишлари қўмитаси” ташкил этилиши, магистратурада ўқиётган қизларнинг контракт пуллари бюджетдан, эҳтиёжманд оилалар қизларининг контракт пуллари эса маҳаллий бюджетлардан тўлиқ қоплаб берилиши, хусусий секторда расмий ишлаётган аёлларга ҳомиладорлик нафақасини давлат томонидан тўлаб бериш тизими яратилганлиги ва бошқа кўплаб мисоллар фикримизнинг исботидир.
Туманимиз ҳокими меҳнатда ўрнак кўрсатаётган, шунингдек, турли соҳаларда ишлаб, айни кунда кексалик нафақасига чиққан 120 нафар фахрийларни ва фидойи аёл-қизларни қимматбаҳо совғалар билан тақдирлади.
Туман маҳалла ва оилани қўллаб-қувватлаш бўлими бошлиғининг биринчи ўринбосари Гўзал Собирова, “Мўътабар аёл” кўкрак нишони соҳибаси Роҳатой Рейимовалар табригидан сўнг, навбат туман Маданият бўлимига қарашли муассасалар санъаткорларига берилди.
Туман ҳокимлиги ва Маданият бўлими ҳамкорлигида ташкиллаштирилган тадбирда фаол аёл-қизлар тўкин дастурхон атрофида дилтортар қўшиқлар тинглаб, рақслар томоша қилиб, ҳордиқ чиқардилар. Аёл муқаддаслигини, фидойилиги, матонати ва меҳри уммонлигини мадҳ этувчи шеърлар, қўшиқлар уларга жуда манзур бўлди.
“Учқун” ашула ва рақс халқ ансамбли хонандалари ижросидаги “Баҳор вальси” қўшиғи уларнинг кўнгилларига уйғониш, жонланиш фасли қувончини, тароватини ҳадя этди. Байрамга ташриф буюрган аёл-қизлар ушбу байрамона мусиқий дастурни томоша қилиб, ҳар бир инсон кўнглида улуғ зот – Оналарга юксак ҳурмат, эҳтиром жой олганлигини ҳис қилдилар.
“Муқаддас аёл” деб номланган мусиқий дастур томошаси ва ўзларига кўрсатилаётган ҳурмат барча иштирокчиларга олам-олам қувонч ва фахр ҳадя этди.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
