8-mart - Xalqaro xotin-qizlar kuni munosabati bilan Amudaryo tumanida bayram tadbiri oʻtkazildi
Ayol! Uning taʼrifiga soʻz mulki ojiz. U avvalo farzandlarini mehri ardogʻida avaylab, yurt koriga yaraydigan qilib voyaga yetkazuvchi fidoyi ona, el-yurtimiz tinchligi-totuvligi uchun, farovonligi uchun kurashuvchi matonatli inson, oilalarni va demakki, koʻngillarni nurafshon etuvchi muqaddas zot! Shu boisdan ular doimo davlatimiz gʻamxoʻrligida, eʼzozida.
Shu sababli ham mamlakatimizda xotin-qizlarning ijtimoiy-siyosiy faolligini oshirish, ularning turli soha va tarmoqlarda oʻz qobiliyat va imkoniyatlarini roʻyobga chiqarishi uchun sharoit yaratish, qonuniy huquq va manfaatlarini himoya qilish, qoʻllab-quvvatlash, oila institutini mustahkamlash borasida koʻlamdor ishlar amalga oshirilmoqda.
Jamiyat hayotida faollik va tashabbuskorlik koʻrsatgan, oʻzlarining samarali mehnatlari bilan oilalarning shakllanishiga, farovonligi oshishiga munosib hissa qoʻshayotgan ayollar turli unvonlar va davlat mukofotlari, koʻkrak nishonlari bilan taqdirlanib kelmoqda. Barcha jabhalarda fidoyilik qilayotgan ayollarning mehnati munosib baholanmoqda. Shuningdek, ularning intellektual salohiyatini yuksaltirish, qoʻllab-quvvatlashga eʼtibor qaratilayotir.
Har yili mamlakatimizda 8-mart – Xalqaro xotin-qizlar bayrami keng nishonlanadi. Sana munosabati bilan turli sohalarning ilgʻor ayol-qizlariga alohida ehtiro koʻrsatilib, eʼzozlanadi.
7-mart kuni amudaryolik faol ayol-qizlar uchun ham “Muqaddas ayol” deb nomlangan bayram tadbiri tashkil qilindi.
Mangʻit shahridagi “Xon” restoranida boʻlib oʻtgan adabiy-musiqiy tadbirda tumanimizdagi turli sohalarda samarali mehnat qilayotgan ayollar, oʻz hayotiy tajribasi asosida yoshlar tarbiyasiga, oilalar mustahkamligiga munosib hissa qoʻshayotgan nuroniy onaxonlar, umidli, iqtidorli qizlar ishtirok etdilar.
Yigʻilganlarni tuman hokimi Sultonboy Yoʻldashev 8-mart – Xalqaro xotin-qizlar kuni bilan qizgʻin tabrikladi. “Haqiqatan ham, goʻzallik va nafosat, mehru muhabbat, vafo va nazokat ramzi boʻlgan, oʻzining mehribonligi, qalb saxovati bilan har qaysi oilani oila qiladigan, unga fayz-u tarovat beradigan, farzandlarimiz yuragiga oʻz ona yurtiga sevgi va sadoqat tuygʻusini singdiradigan ayollarimizning betakror fazilatlari haqida har qancha gapirsak, ularni har qancha eʼzozlasak, arziydi” dedi tumanimiz hokimi tabrik nutqida.
Darhaqiqat, mamlakatimizda ayollarning jamiyatdagi oʻrni va mavqeiga yuqori baho berilib, ularning huquq va manfaatlarini himoya qilish, xotin-qizlarimizning bilimdon, zamonaviy mutaxassis, malakali kasb egalari boʻlishlari hamda sogʻlom va mustahkam oila qurishlari uchun zarur shart-sharoitlar yaratish borasida mamlakatimizda keng koʻlamli islohotlar olib borilmoqda. Prezidentimiz tashabbuslari bilan yaqindagina “Xotin-qizlar va oila ishlari qoʻmitasi” tashkil etilishi, magistraturada oʻqiyotgan qizlarning kontrakt pullari byudjetdan, ehtiyojmand oilalar qizlarining kontrakt pullari esa mahalliy byudjetlardan toʻliq qoplab berilishi, xususiy sektorda rasmiy ishlayotgan ayollarga homiladorlik nafaqasini davlat tomonidan toʻlab berish tizimi yaratilganligi va boshqa koʻplab misollar fikrimizning isbotidir.
Tumanimiz hokimi mehnatda oʻrnak koʻrsatayotgan, shuningdek, turli sohalarda ishlab, ayni kunda keksalik nafaqasiga chiqqan 120 nafar faxriylarni va fidoyi ayol-qizlarni qimmatbaho sovgʻalar bilan taqdirladi.
Tuman mahalla va oilani qoʻllab-quvvatlash boʻlimi boshligʻining birinchi oʻrinbosari Goʻzal Sobirova, “Moʻʼtabar ayol” koʻkrak nishoni sohibasi Rohatoy Reyimovalar tabrigidan soʻng, navbat tuman Madaniyat boʻlimiga qarashli muassasalar sanʼatkorlariga berildi.
Tuman hokimligi va Madaniyat boʻlimi hamkorligida tashkillashtirilgan tadbirda faol ayol-qizlar toʻkin dasturxon atrofida diltortar qoʻshiqlar tinglab, raqslar tomosha qilib, hordiq chiqardilar. Ayol muqaddasligini, fidoyiligi, matonati va mehri ummonligini madh etuvchi sheʼrlar, qoʻshiqlar ularga juda manzur boʻldi.
“Uchqun” ashula va raqs xalq ansambli xonandalari ijrosidagi “Bahor valsi” qoʻshigʻi ularning koʻngillariga uygʻonish, jonlanish fasli quvonchini, tarovatini hadya etdi. Bayramga tashrif buyurgan ayol-qizlar ushbu bayramona musiqiy dasturni tomosha qilib, har bir inson koʻnglida ulugʻ zot – Onalarga yuksak hurmat, ehtirom joy olganligini his qildilar.
“Muqaddas ayol” deb nomlangan musiqiy dastur tomoshasi va oʻzlariga koʻrsatilayotgan hurmat barcha ishtirokchilarga olam-olam quvonch va faxr hadya etdi.
Oygul RAJABOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
