Халқ депутатлари Амударё туман Кенгашининг 47-сессияси тўғрисида ахборот
2022 йил 25 март куни Халқ депутатлари Амударё туман Кенгашининг 47-сессияси бўлиб ўтди. Сессия ишида туман Кенгаши депутатлари, секторлар раҳбарлари, ҳоким ўринбосарлари, ҳокимлик масъул ходимлари, ҳуқуқ-тартибот органлари, бўлимлар, жамоат ташкилотлари раҳбарлари ҳамда оммавий ахборот воситалари вакиллари иштирок этишди.
Сессия ишини туман ҳокими, Халқ депутатлари туман Кенгаши раиси Султонбой Йўлдашев очди ва олиб борди.
Сессия котиблигига 28-Дарё бўйи сайлов округидан депутат Акбар Ражапов сайланди.
Сессияда дастлаб Жиноят ишлари бўйича Амударё туман судининг 2022 йилнинг ўтган даври мобайнида одил судловни амалга ошириш бўйича фаолияти ҳақида суд раиси Жасур Ўразбаевнинг ҳисоботи тингланди. Ҳисоботда жорий йилнинг ўтган даври мобайнида одил судловни амалга ошириш сифатини янада яхшилаш, фуқаролар ва юридик шахсларнинг бузилган ҳуқуқлари ва қонуний манфаатларининг суд йўли билан ҳимоя қилиниши тўлақонли таъминлаш бўйича “Ҳаракатлар дастури” асосида амалга оширилаётган ишлар ҳақида батафсил маълумотлар берилди. Шунингдек, фуқароларнинг ҳуқуқий саводхонлигини ошириш, аҳолига ҳар томонлама қулай имкониятлар яратиш мақсадида сайёр судларни ташкил қилиш амалиёти ҳақида ҳам маълумотлар берилди.
Сессия ишида Фуқаролик ишлари бўйича туман суди томонидан одил судловни амалга ошириш борасида 2022 йил 1 январдан 18 мартгача амалга оширилган ишлар ҳам муҳокама қилинди. Ушбу масала юзасидан Фуқаролик ишлари бўйича туман суди раиси Қайрулла Атамуратовнинг ахбороти тингланди. Таъкидланганидек, ҳисобот даврида суд томонидан 683 та иш кўриб тамомланган. Тамомланган ишларнинг 515 таси бўйича ҳал қилув қарорлари чиқарилган бўлиб, шундан 488 та иш бўйича даъво аризалар қаноатлантирилган ва 27 та иш бўйича даъво аризалар рад этилган. 168 та иш бўйича ажримлар чиқарилган бўлиб, 3 та иш юритишдан тугатилган. 165 та ариза эса кўрмасдан қолдирилган.
Сессия кун тартибидаги навбатдаги масала – 2021 йил давомида Амударё тумани Болаларни ҳимоя қилиш масалалари шўъбаси томонидан амалга оширилган ишлар хусусида шўъба мудири Жаҳонгир Холмуродов ҳисобот берди. Ҳисоботда туман бўйича жами аҳолининг 74 минг 200 нафарини вояга етмаганлар ташкил қилиши, туман Болаларни ҳимоя қилиш масалалари комиссияси ҳуқуқни муҳофаза қилувчи органлар томонидан тақдим қилинган, вояга етмаганлар томонидан содир қилинган маъмурий ҳуқуқбузарликлар бўйича ҳужжатларни комиссияда кўриб чиқиб, вояга етмаган ҳуқуқбузарларнинг ота-оналарига нисбатан тегишли тартибда жарималар солинаётгани қайд этилди.
Cессия кун тартибида Ўзбекистон Республикаси Президентининг “Мева-сабзавотчилик ва узумчиликда оилавий тадбиркорликни ривожлантириш, қишлоқ ҳўжалиги маҳсулотларини ишлаб чиқаришида деҳқон хўжаликларининг улушини ошириш чора-тадбирлари тўғрисида”ги қарори ижроси бўйича туман ҳокимининг қишлоқ ва сув хўжалиги масалалари бўйича ўринбосари Исламбек Маткаримовнинг ҳисоботи тингланди.
Ҳисоботда қайд қилинганидек, аҳолининг даромад топишга қаратилган тадбиркорлик ташаббусларини молиявий қўллаб-қувватлаш, аҳолига аграр тармоқда ўз бизнесини ташкил этишга кўмаклашиш, қишлоқ хўжалиги маҳсулотларини етиштиришда деҳқон хўжаликларининг улушини ошириш ҳамда озиқ-овқат хавфсизлигини таъминлаш мақсадида туманда фермер хўжаликларининг фойдаланишидаги паст ҳосилли пахта ва ғалла экинларидан қисқартирилган ер майдонлари ҳисобидан фуқароларга 10 сотихдан 1 гектаргача бўлган ўлчамда жами 2242 гектар экин майдонларини 2022-2025 йилларда босқичма-босқич аҳолига бериш режалаштирилган. Шундан жорий йилда жами 897 гектар ер майдонлари ишсиз аҳолига ажратиб берилади. Ҳисоботда бу борада амалга оширилаётган ишларнинг ҳозирги ҳолати ва келгусидаги режалар ҳақида батафсил маълумотлар берилди.
Шундан сўнг Қорақалпоғистон Республикаси Жўқорғи Кенгеси Президиумининг 2021 йил 22 декабрдаги 555-сонли қарорнинг ижроси бўйича туман Давлат солиқ инспекцияси бошлиғи Айдос Сеитовнинг ҳисоботи тингланди. Депутатлар туманда қишлоқ хўжалигига мўлжалланмаган ерлар учун ягона миқдорларда белгиланган базавий солиқ ставкаларига камайтирувчи коэффициентларни қўллаш масаласини бир овоздан маъқулладилар.
Бундан ташқари сессияда жорий йилнинг май ойида ўтказиладиган фуқаролар йиғинлари раислари сайловига тайёргарлик кўриш ва уни ўтказиш, хусусан, сайловни ўтказишга кўмаклашувчи туман комиссиясини тузиш масаласи ҳамда Кенгаш ваколатига кирувчи бошқа масалалар ҳам кўриб чиқилди.
Кун тартибидаги барча масалалар юзасидан Халқ депутатлари туман Кенгашининг тегишли қарорлари қабул қилинди. Шунинг билан сессия ўз ишини якунлади.
Туман хокимлигининг Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
