Xalq deputatlari Amudaryo tuman Kengashining 47-sessiyasi toʻgʻrisida axborot
2022-yil 25-mart kuni Xalq deputatlari Amudaryo tuman Kengashining 47-sessiyasi boʻlib oʻtdi. Sessiya ishida tuman Kengashi deputatlari, sektorlar rahbarlari, hokim oʻrinbosarlari, hokimlik masʼul xodimlari, huquq-tartibot organlari, boʻlimlar, jamoat tashkilotlari rahbarlari hamda ommaviy axborot vositalari vakillari ishtirok etishdi.
Sessiya ishini tuman hokimi, Xalq deputatlari tuman Kengashi raisi Sultonboy Yoʻldashev ochdi va olib bordi.
Sessiya kotibligiga 28-Daryo boʻyi saylov okrugidan deputat Akbar Rajapov saylandi.
Sessiyada dastlab Jinoyat ishlari boʻyicha Amudaryo tuman sudining 2022-yilning oʻtgan davri mobaynida odil sudlovni amalga oshirish boʻyicha faoliyati haqida sud raisi Jasur Oʻrazbayevning hisoboti tinglandi. Hisobotda joriy yilning oʻtgan davri mobaynida odil sudlovni amalga oshirish sifatini yanada yaxshilash, fuqarolar va yuridik shaxslarning buzilgan huquqlari va qonuniy manfaatlarining sud yoʻli bilan himoya qilinishi toʻlaqonli taʼminlash boʻyicha “Harakatlar dasturi” asosida amalga oshirilayotgan ishlar haqida batafsil maʼlumotlar berildi. Shuningdek, fuqarolarning huquqiy savodxonligini oshirish, aholiga har tomonlama qulay imkoniyatlar yaratish maqsadida sayyor sudlarni tashkil qilish amaliyoti haqida ham maʼlumotlar berildi.
Sessiya ishida Fuqarolik ishlari boʻyicha tuman sudi tomonidan odil sudlovni amalga oshirish borasida 2022-yil 1-yanvardan 18-martgacha amalga oshirilgan ishlar ham muhokama qilindi. Ushbu masala yuzasidan Fuqarolik ishlari boʻyicha tuman sudi raisi Qayrulla Atamuratovning axboroti tinglandi. Taʼkidlanganidek, hisobot davrida sud tomonidan 683 ta ish koʻrib tamomlangan. Tamomlangan ishlarning 515 tasi boʻyicha hal qiluv qarorlari chiqarilgan boʻlib, shundan 488 ta ish boʻyicha daʼvo arizalar qanoatlantirilgan va 27 ta ish boʻyicha daʼvo arizalar rad etilgan. 168 ta ish boʻyicha ajrimlar chiqarilgan boʻlib, 3 ta ish yuritishdan tugatilgan. 165 ta ariza esa koʻrmasdan qoldirilgan.
Sessiya kun tartibidagi navbatdagi masala – 2021-yil davomida Amudaryo tumani Bolalarni himoya qilish masalalari shoʻʼbasi tomonidan amalga oshirilgan ishlar xususida shoʻʼba mudiri Jahongir Xolmurodov hisobot berdi. Hisobotda tuman boʻyicha jami aholining 74 ming 200 nafarini voyaga yetmaganlar tashkil qilishi, tuman Bolalarni himoya qilish masalalari komissiyasi huquqni muhofaza qiluvchi organlar tomonidan taqdim qilingan, voyaga yetmaganlar tomonidan sodir qilingan maʼmuriy huquqbuzarliklar boʻyicha hujjatlarni komissiyada koʻrib chiqib, voyaga yetmagan huquqbuzarlarning ota-onalariga nisbatan tegishli tartibda jarimalar solinayotgani qayd etildi.
Cessiya kun tartibida Oʻzbekiston Respublikasi Prezidentining “Meva-sabzavotchilik va uzumchilikda oilaviy tadbirkorlikni rivojlantirish, qishloq hoʻjaligi mahsulotlarini ishlab chiqarishida dehqon xoʻjaliklarining ulushini oshirish chora-tadbirlari toʻgʻrisida”gi qarori ijrosi boʻyicha tuman hokimining qishloq va suv xoʻjaligi masalalari boʻyicha oʻrinbosari Islambek Matkarimovning hisoboti tinglandi.
Hisobotda qayd qilinganidek, aholining daromad topishga qaratilgan tadbirkorlik tashabbuslarini moliyaviy qoʻllab-quvvatlash, aholiga agrar tarmoqda oʻz biznesini tashkil etishga koʻmaklashish, qishloq xoʻjaligi mahsulotlarini yetishtirishda dehqon xoʻjaliklarining ulushini oshirish hamda oziq-ovqat xavfsizligini taʼminlash maqsadida tumanda fermer xoʻjaliklarining foydalanishidagi past hosilli paxta va gʻalla ekinlaridan qisqartirilgan yer maydonlari hisobidan fuqarolarga 10 sotixdan 1 gektargacha boʻlgan oʻlchamda jami 2242 gektar ekin maydonlarini 2022-2025-yillarda bosqichma-bosqich aholiga berish rejalashtirilgan. Shundan joriy yilda jami 897 gektar yer maydonlari ishsiz aholiga ajratib beriladi. Hisobotda bu borada amalga oshirilayotgan ishlarning hozirgi holati va kelgusidagi rejalar haqida batafsil maʼlumotlar berildi.
Shundan soʻng Qoraqalpogʻiston Respublikasi Joʻqorgʻi Kengesi Prezidiumining 2021-yil 22-dekabrdagi 555-sonli qarorning ijrosi boʻyicha tuman Davlat soliq inspektsiyasi boshligʻi Aydos Seitovning hisoboti tinglandi. Deputatlar tumanda qishloq xoʻjaligiga moʻljallanmagan yerlar uchun yagona miqdorlarda belgilangan bazaviy soliq stavkalariga kamaytiruvchi koeffitsiyentlarni qoʻllash masalasini bir ovozdan maʼqulladilar.
Bundan tashqari sessiyada joriy yilning may oyida oʻtkaziladigan fuqarolar yigʻinlari raislari sayloviga tayyorgarlik koʻrish va uni oʻtkazish, xususan, saylovni oʻtkazishga koʻmaklashuvchi tuman komissiyasini tuzish masalasi hamda Kengash vakolatiga kiruvchi boshqa masalalar ham koʻrib chiqildi.
Kun tartibidagi barcha masalalar yuzasidan Xalq deputatlari tuman Kengashining tegishli qarorlari qabul qilindi. Shuning bilan sessiya oʻz ishini yakunladi.
Tuman xokimligining Axborot xizmati
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
