“ЁШ ЧЕГАРАЧИ” МУСОБАҚАСИНИНГ ТУМАН БОСҚИЧИ ЎТКАЗИЛДИ

Тинч-осойишта ҳаёт тарзи биз билан бир даврда яшаётган неча-неча миллионлаб инсонларнинг орзуси, десак адашмаймиз. Тўйиб овқат ейишга имкони йўқ, юпун, бошпанасиз одамлар, ёмғирдай ёғилаётган ўқлардан, портлашлардан даҳшат ичида яшаётганлар, бирор куни осойишта кечмаётганлар жуда кўп. Шуларни ўйлаганимизда  барча юртдошларимиз ўз оиласи бағрида эмин-эркин, бахтиёр, фаровон яшаётганидан, оилалар ободлиги замирида юртимиз ободлиги, тинч-осойишталигидан кўнгилимиз тоғдай кўтарилади, эртаги кунга ишончимиз янада мустаҳкамланади. Шу баробарида чор-атрофга теран назар ташлаш, ҳушёр ва огоҳ бўлиш лозимлигини англаймиз. Дунёни қайсики, бурчагида уруш-низолар, бузғунчиликлар, ёвуз ниятли кучлар мавжуд экан, улардан шу азиз Ватанимизни кўз қорачиғидай асраш, ҳимоя қилиш масъулияти зиммамизда бўлади.

Бунинг учун миллати, тилидан қатъий назар, ўсиб келаётган ёш авлод кўнглига ватанпарварлик туйғуларини сингдириш, уларни шу азиз Ватанимизнинг корига ярайдиган, ҳимоя қила оладиган ҳақиқий мард, жасур қилиб вояга етказиш муҳим вазифа. Шу мақсадда туман халқ таълими бўлими, Ёшлар ишлари агентлиги туман бўлими, туман Тиббиёт бирлашмаси ва Мудофаа бўлими ҳамкорликда кўпгина саъй-ҳаракатларни амалга оширмоқда.

Яқинда ушбу ташкилотлар туманимиздаги давлат хавфсизлик хизматига қарашли 92-02 ҳарбий қисм хизматчилари билан биргаликда ёшлар қалбида она юртига муҳаббат туйғуларини янада мустаҳкамлаш, уларни чегара хизматига қизиқишларини кучайтириш, чегара қўшинларининг шонли ва жанговар анъаналарининг давомчилари этиб тарбиялаш мақсадида ўқувчи-ёшлар ўртасида “Ёш чегарачи” мусобақасининг туман босқичини ўтказди.

Мусобақада Амударё туманидаги мактабларда таълим олаётган ўқувчилардан  тузилган 5 та жамоа иштирок  этди. Чақирувга қадар бошланғич тайёргарлик фанида миллий Армиямиз ҳақида, Ватанимиз мудофаа қудрати ҳақида билимларга эга бўлган ёшлар шу куни ўзаро куч минашдилар.

Айтиш керакки, жамоаларнинг барчаси ҳарбий билимларни пухта эгаллаган, қурол-аслаҳаларни бўлакларга ажратиш ва йиғиш кўникмаларига эга, юртимиз сарҳадларини қўриқлашни ўзларининг  бурчи деб ҳисоблайдиган ватанпарвар йигитлардан ташкил топган. Бу жамоалар ушбу  мусобақанинг мактаблараро ва ҳудудий босқичларида ғолиб бўлиб, туман босқичида қатнашиш имконини қўлга киритишган эди.

30 март куни бўлиб ўтган “Ёш чегарачилар” мусобақасида иштирокчилар ўзларининг жамоаси тақдимоти, сафда тўғри юриш, белгиланган масофага югуриш, жанговар қуролларни қисмларга ажратиш каби шартлар бўйича беллашдилар.

Қолаверса, иштирокчилар яраланган сафдошига биринчи тиббий ёрдам кўрсатиш бўйича ҳам беллашиб, ўзларининг эпчил, чаққон ва бошланғич ҳарбий билимга эга эканликларини намойиш этдилар.

Уларнинг танлов шартларини қандай бажарганликлари ҳакамлар ҳайъати томонидан одилона баҳолаб борилди.

Натижаларга кўра, 6-сонли мактабнинг “Бургутлар” жамоаси биринчи, 45-сонли мактабнинг “Лочин” жамоаси иккинчи, 48-сонли мактабнинг “Миллий гвардия” жамоаси эса учинчи ўринларни эгаллади.

Мусобақа якунида ғолиб жамоалар ташкилотчилар томонидан рағбатлантирилди.

О.РАЖАБОВА.