“YoSh ChEGARAChI” MUSOBAQASINING TUMAN BOSQIChI OʻTKAZILDI

Tinch-osoyishta hayot tarzi biz bilan bir davrda yashayotgan necha-necha millionlab insonlarning orzusi, desak adashmaymiz. Toʻyib ovqat yeyishga imkoni yoʻq, yupun, boshpanasiz odamlar, yomgʻirday yogʻilayotgan oʻqlardan, portlashlardan dahshat ichida yashayotganlar, biror kuni osoyishta kechmayotganlar juda koʻp. Shularni oʻylaganimizda  barcha yurtdoshlarimiz oʻz oilasi bagʻrida emin-erkin, baxtiyor, farovon yashayotganidan, oilalar obodligi zamirida yurtimiz obodligi, tinch-osoyishtaligidan koʻngilimiz togʻday koʻtariladi, ertagi kunga ishonchimiz yanada mustahkamlanadi. Shu barobarida chor-atrofga teran nazar tashlash, hushyor va ogoh boʻlish lozimligini anglaymiz. Dunyoni qaysiki, burchagida urush-nizolar, buzgʻunchiliklar, yovuz niyatli kuchlar mavjud ekan, ulardan shu aziz Vatanimizni koʻz qorachigʻiday asrash, himoya qilish masʼuliyati zimmamizda boʻladi.

Buning uchun millati, tilidan qatʼiy nazar, oʻsib kelayotgan yosh avlod koʻngliga vatanparvarlik tuygʻularini singdirish, ularni shu aziz Vatanimizning koriga yaraydigan, himoya qila oladigan haqiqiy mard, jasur qilib voyaga yetkazish muhim vazifa. Shu maqsadda tuman xalq taʼlimi boʻlimi, Yoshlar ishlari agentligi tuman boʻlimi, tuman Tibbiyot birlashmasi va Mudofaa boʻlimi hamkorlikda koʻpgina saʼy-harakatlarni amalga oshirmoqda.

Yaqinda ushbu tashkilotlar tumanimizdagi davlat xavfsizlik xizmatiga qarashli 92-02 harbiy qism xizmatchilari bilan birgalikda yoshlar qalbida ona yurtiga muhabbat tuygʻularini yanada mustahkamlash, ularni chegara xizmatiga qiziqishlarini kuchaytirish, chegara qoʻshinlarining shonli va jangovar anʼanalarining davomchilari etib tarbiyalash maqsadida oʻquvchi-yoshlar oʻrtasida “Yosh chegarachi” musobaqasining tuman bosqichini oʻtkazdi.

Musobaqada Amudaryo tumanidagi maktablarda taʼlim olayotgan oʻquvchilardan  tuzilgan 5 ta jamoa ishtirok  etdi. Chaqiruvga qadar boshlangʻich tayyorgarlik fanida milliy Armiyamiz haqida, Vatanimiz mudofaa qudrati haqida bilimlarga ega boʻlgan yoshlar shu kuni oʻzaro kuch minashdilar.

Aytish kerakki, jamoalarning barchasi harbiy bilimlarni puxta egallagan, qurol-aslahalarni boʻlaklarga ajratish va yigʻish koʻnikmalariga ega, yurtimiz sarhadlarini qoʻriqlashni oʻzlarining  burchi deb hisoblaydigan vatanparvar yigitlardan tashkil topgan. Bu jamoalar ushbu  musobaqaning maktablararo va hududiy bosqichlarida gʻolib boʻlib, tuman bosqichida qatnashish imkonini qoʻlga kiritishgan edi.

30-mart kuni boʻlib oʻtgan “Yosh chegarachilar” musobaqasida ishtirokchilar oʻzlarining jamoasi taqdimoti, safda toʻgʻri yurish, belgilangan masofaga yugurish, jangovar qurollarni qismlarga ajratish kabi shartlar boʻyicha bellashdilar.

Qolaversa, ishtirokchilar yaralangan safdoshiga birinchi tibbiy yordam koʻrsatish boʻyicha ham bellashib, oʻzlarining epchil, chaqqon va boshlangʻich harbiy bilimga ega ekanliklarini namoyish etdilar.

Ularning tanlov shartlarini qanday bajarganliklari hakamlar hayʼati tomonidan odilona baholab borildi.

Natijalarga koʻra, 6-sonli maktabning “Burgutlar” jamoasi birinchi, 45-sonli maktabning “Lochin” jamoasi ikkinchi, 48-sonli maktabning “Milliy gvardiya” jamoasi esa uchinchi oʻrinlarni egalladi.

Musobaqa yakunida gʻolib jamoalar tashkilotchilar tomonidan ragʻbatlantirildi.

O.RAJABOVA.