“Обод қишлоқ” дастурига киритилган Аёқчи маҳалласида кенг кўламли қурилиш ва ободонлаштириш ишлари бошланди
Сўнги йилларда юртимиз бўйлаб “Обод қишлоқ” ва “Обод маҳалла” дастурига киритилган ҳудудларда йўл-транспорт инфратузилмасини яхшилаш, ижтимоий соҳа обектларини қуриш, ободонлаштириш ва кўкаламзорлаштириш, умуман, аҳолининг яшаш шароитини яхшилашга қаратилган кенг кўламли чора-тадбирлар амалга оширилмоқда.
Ўзбекистон Республикаси Президентининг 2022-2026 йилларда “Обод қишлоқ” ва “Обод маҳалла” дастурларини амалга ошириш чора-тадбирлари тўғрисида”ги қарорига асосан, Амударё туманининг Тўлқин овули ва Аёқчи маҳалласи ҳам “Обод қишлоқ” дастурига киритилди.
6 апрель куни Аёқчи маҳалласи ҳудудида дастур доирасида кенг кўламли қурилиш ва ободонлаштириш ишларининг бошланиши муносабати билан табдир бўлиб ўтди. Унда туман ҳокими Султонбой Йўлдашев, секторлар раҳбарлари, ҳоким ўринбосарлари, тегишли муассаса, корхона ва ташкилотлар раҳбарлари, фуқаролар йиғини масъуллари ҳамда маҳалла фаоллари иштирок этди.
Дастлаб, туман ҳокими Сўлтонбой Йўлдашев йиғилганларга “Обод қишлоқ” дастурини тез муддатларда ва сифатли тарзда амалга ошириш борасида тавсияларини берди. Шунингдек, дастур доирасида Аёқчи маҳалласи ҳудуди учун ажратилган 10,4 млрд. сўм маблағнинг манзилли ва мақсадли ишлатилиши бўйича мутасаддиларга топшириқлар берди.
Шундан сўнг туман ҳокими ўринбосари Нодирбек Комолов йиғилганларга Аёқчи маҳалласида дастур доирасида амалга ошириладиган ишлар юзасидан кенг турда маълумотлар берди. Тақдимотда келтирилишича, Аёқчи маҳалласи ҳудудидаги 69-сонли умумтаълим мактаб биноси мукаммал реконстукция қилиниб, таъмирлаш ишларига 2 млрд 300 млн. сўм миқдорда маблағ сарфланади.
Шунингдек, Аёқчи маҳалла фуқаролар йиғини биносини таъмирлаш ишларига 360 млн. сўм миқдорида пул маблағлари ажратилиб, мукаммал таъмирлаш ишлари олиб борилади.
Қолаверса, маҳалла ҳудудида пиёдалар йўлакчасини қуриш, янги турдаги чиқинди контейнерини, тунги ёритгич чироқларини ўрнатиш ҳамда якка тартибдаги уй-жойларини таъмирлаш, алоқа линияларини тортиш ишлари ҳам амалга оширилиб, жорий ишларга 616 млн. сўм миқдорда маблағлар сарфланади.
Дастур доирасида аҳолини тоза ичимлик суви билан таъминлаш мақсадида 2 млрд. сўм маблағ эвазига 4 та сув иншооти барпо этиш ҳамда 1 млрд 550 млн. сўм эвазига бозор инфратузилмаларини бунёд қилиш кўзда тутилган.
Тақдимот ниҳосига етгач туман ҳокими Султонбой Йўлдашев ҳар бир йўналиш бўйича амалга ошириладиган ишлар юзасидан соҳа масъулларининг фикрларини тинглади ҳамда дастур ижросини ўз вақтида ва сифатли таъминлаш бўйича топшириқлар берди.
Шундан сўнг тадбир қатнашчилари “Яшил макон” акцияси доирасида Аёқчи маҳалла фуқаролар йиғини биноси олдида барпо этилаётган яшил майдонга мевали ва манзарали дарахт кўчатларини экишди.
Экилган ҳар бир ниҳол вақти келиб улкан дарахт бўлади ва обод қишлоққа айланаётган Аёқчи маҳалласи кўркига кўрк ва чирой бағишлайди.
Туман ҳокимлигининг Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
