Амударё туманида Ўзбекистон Республикаси Ички ишлар вазирлиги ашула ва рақс ансамблининг концерт дастури бўлиб ўтди

Ҳар бир давлатнинг равнақ топиши ва ривожланиши, ўша давлат фуқароларининг том маънодаги Ватанпарварлиги, ҳалоллиги ва фидойилиги билан чамбарчас боғлиқдир. Зеро, муқаддас ҳадиси шарифда “Ватанни севмоқ иймондандир” деб бежиз айтилмаган.

Шу сабабли, мамлакатимизда ёш авлодни Ватанпарварлик руҳида тарбиялаш, улар онгида халққа садоқат ила хизмат қилиш ва давлатимиз гуллаб-яшнашига муносиб ҳисса қўшиш каби эзгу фазилатларни сингдириш бўйича кўплаб тадбирлар амалга оширилмоқда.

Ички ишлар вазирининг 2022 йил 25 март кунги 79-сонли фармойишига асосан жорий йилнинг 2 апрель кунидан 2 май кунига қадар барча ички ишлар органларида “Ватанга ва халққа садоқат билан хизмат қилиш – олий бурчимиз!” шиори остида “Маънавият ойлиги” ташкил этилмоқда.

Мақсад – ички ишлар органлари ходимлари қалбида миллий маданият ва қадриятларга ҳурмат ва эҳтиром ҳис-туйғуларини янада мустаҳкам қарор топтириш, Ўзбекистон халқининг бой тарихи, маданияти, анъаналари ва урф-одатларини янада чуқур ҳис қилишлари, миллий маданиятимизнинг энг яхши намуналарини улар онгига янада чуқур сингдиришдан иборатдир.

Қолаверса, мазкур ойлик доирасида ички ишлар органларида хизмат қилиб хизмат вазифасини ўташ мобайнида ҳалок бўлган соҳа ходимларининг оила аъзоларига моддий ва маънавий кўмак кўрсатиш, ёрдамга муҳтож бўлган ички ишлар органлари фахрийларини, ҳамда хизмат чоғида ногирон бўлиб қолган ходимларни қўллаб-қувватлашдек эзгу ва хайрли ишлар амалга оширилади.

13 апрель куни Амударё туманининг Дўстлик маҳалласи ҳудудида жойлашган Болалар ва ўсмирлар спорт мактабида ҳам Ўзбекистон Республикаси Ички ишлар вазирлиги “Ашула ва рақс” ансамблининг концерт дастури бўлиб ўтди.

Унда туманимизнинг фаол ёшлари билан биргаликда Ички ишлар бўлими шахсий таркиби ҳамда уларнинг оила аъзолари, хизмат чоғида вафот этган соҳа ходимларининг яқинлари ҳам иштирок этишди.

Ўтказилган концерт дастурида Ўзбекистонда хизмат кўрсатган элимизнинг хушовоз санъаткор хонандалари ҳамда сўз усталари томонидан ижро этилган куй қўшиқлар, дилтортар наволар ва ҳангомалар концерт дастурига ташриф буюрган томошабинларнинг олқишига сазовор бўлди.

Тадбир қатнашчилари ушбу концерт дастури орқали маънавий озуқа олиш билан биргаликда ўз қалбларида Ватанга садоқат ва ҳурмат хиссини чуқур ҳис қилдилар. Тадбир якунида ички ишлар органлари сафида мардонавор хизмат қилиб, хизмат вазифасини бажариш вақтида вафот этган соҳа ходимларнинг оила аъзоларига эхтиром кўрсатилди.

 Айни кунларда “Манавият ойлиги” доирасида Республикамизнинг барча ҳудудларида китобхонлик, театр хафталиклари, концерт дастурлари шунингдек буюк аждодларимизнинг таваллуд кунлари муносабати билан маънавий-маърифий тадбирлар бўлиб ўтмоқда.

Ф. Эшимбетова.