Amudaryo tumanida Oʻzbekiston Respublikasi Ichki ishlar vazirligi ashula va raqs ansamblining kontsert dasturi boʻlib oʻtdi

Har bir davlatning ravnaq topishi va rivojlanishi, oʻsha davlat fuqarolarining tom maʼnodagi Vatanparvarligi, halolligi va fidoyiligi bilan chambarchas bogʻliqdir. Zero, muqaddas hadisi sharifda “Vatanni sevmoq iymondandir” deb bejiz aytilmagan.

Shu sababli, mamlakatimizda yosh avlodni Vatanparvarlik ruhida tarbiyalash, ular ongida xalqqa sadoqat ila xizmat qilish va davlatimiz gullab-yashnashiga munosib hissa qoʻshish kabi ezgu fazilatlarni singdirish boʻyicha koʻplab tadbirlar amalga oshirilmoqda.

Ichki ishlar vazirining 2022-yil 25-mart kungi 79-sonli farmoyishiga asosan joriy yilning 2-aprel kunidan 2-may kuniga qadar barcha ichki ishlar organlarida “Vatanga va xalqqa sadoqat bilan xizmat qilish – oliy burchimiz!” shiori ostida “Maʼnaviyat oyligi” tashkil etilmoqda.

Maqsad – ichki ishlar organlari xodimlari qalbida milliy madaniyat va qadriyatlarga hurmat va ehtirom his-tuygʻularini yanada mustahkam qaror toptirish, Oʻzbekiston xalqining boy tarixi, madaniyati, anʼanalari va urf-odatlarini yanada chuqur his qilishlari, milliy madaniyatimizning eng yaxshi namunalarini ular ongiga yanada chuqur singdirishdan iboratdir.

Qolaversa, mazkur oylik doirasida ichki ishlar organlarida xizmat qilib xizmat vazifasini oʻtash mobaynida halok boʻlgan soha xodimlarining oila aʼzolariga moddiy va maʼnaviy koʻmak koʻrsatish, yordamga muhtoj boʻlgan ichki ishlar organlari faxriylarini, hamda xizmat chogʻida nogiron boʻlib qolgan xodimlarni qoʻllab-quvvatlashdek ezgu va xayrli ishlar amalga oshiriladi.

13-aprel kuni Amudaryo tumanining Doʻstlik mahallasi hududida joylashgan Bolalar va oʻsmirlar sport maktabida ham Oʻzbekiston Respublikasi Ichki ishlar vazirligi “Ashula va raqs” ansamblining kontsert dasturi boʻlib oʻtdi.

Unda tumanimizning faol yoshlari bilan birgalikda Ichki ishlar boʻlimi shaxsiy tarkibi hamda ularning oila aʼzolari, xizmat chogʻida vafot etgan soha xodimlarining yaqinlari ham ishtirok etishdi.

Oʻtkazilgan kontsert dasturida Oʻzbekistonda xizmat koʻrsatgan elimizning xushovoz sanʼatkor xonandalari hamda soʻz ustalari tomonidan ijro etilgan kuy qoʻshiqlar, diltortar navolar va hangomalar kontsert dasturiga tashrif buyurgan tomoshabinlarning olqishiga sazovor boʻldi.

Tadbir qatnashchilari ushbu kontsert dasturi orqali maʼnaviy ozuqa olish bilan birgalikda oʻz qalblarida Vatanga sadoqat va hurmat xissini chuqur his qildilar. Tadbir yakunida ichki ishlar organlari safida mardonavor xizmat qilib, xizmat vazifasini bajarish vaqtida vafot etgan soha xodimlarning oila aʼzolariga extirom koʻrsatildi.

 Ayni kunlarda “Manaviyat oyligi” doirasida Respublikamizning barcha hududlarida kitobxonlik, teatr xaftaliklari, kontsert dasturlari shuningdek buyuk ajdodlarimizning tavallud kunlari munosabati bilan maʼnaviy-maʼrifiy tadbirlar boʻlib oʻtmoqda.

F. Eshimbetova.