ЎЗБЕКИСТОН РЕСПУБЛИКАСИ ПЕДИАТРИЯ ИЛМИЙ АМАЛИЙ МАРКАЗИ ДИРЕКТОРИ, ПРОФЕССОР ДИЛОРОМ АҲМЕДОВА АМУДАРЁЛИК ПЕДИАТР-ШИФОКОРЛАР ФАОЛИЯТИ БИЛАН ТАНИШДИ

Президентимиз тиббиёт соҳаси вакиллари билан бўлган учрашувида миллатнинг бардавомлиги, халқнинг саломатлиги тиббиёт соҳаси ходимларининг фидойилигига кўп жиҳатдан боғлиқлигини, том маънода халқимизни соғломлаштириш, уларнинг ижтимоий ва маънавий фаоллигини ошириш она ва боланинг реподуктив саломатлигини муҳофаза этишга, болага ҳали у дунёга келмасдан зарур ғамхўрлик кўрсатишга боғлиқлигини қайта-қайта таъкидладилар. Шу билан бирга Президентимиз томонидан соҳани ривожлантиришга ҳамда шифокорларнинг моддий манфаатдорлигини оширишга қаратилган Қарор ва Фармонлар имзоланди.

Хусусан, Президентимизнинг “Репродуктив ёшдаги аёллар, ҳомиладорлар ва болаларга кўрсатиладиган тиббий ёрдам сифатини ошириш ва кўламини янада кенгайтириш тўғрисида”ги ҳамда “2022-2026 йилларда оналик ва болаликни муҳофаза қилишни кучайтириш тўғрисида”ги Қарорлари репродуктив аёллар ва ҳомиладорларни аниқ режалаштирилган  тизим асосида рўйхатга олиш, репродуктив  ёшдаги аёллар, ҳомиладорлар ва болаларга кўрсатиладиган тиббий ёрдам сифатини талаблар даражасида амалга ошириш ҳамда кўламини янада кенгайтириш имконини берди.

Президентимизнинг 2022 йил 25 апрелдаги Қарори ҳамда ушбу Қарор ижросини таъминлашга қаратилган Ўзбекистон Республикаси Соғликни сақлаш вазирлигининг буйруғига асосан Амударё туман Тиббиёт бирлашмаси ҳузуридаги кўптарммоқли Марказий поликлиникада жорий йилнинг 1 май санасида янгидан болалар бўлими ташкил этилиб, бўлимда болалар тор соҳа мутассислари, қизлар саломатлик маркази, педиатр, иммунолог, мактаб ва боғча шифокорлари  ҳамда эмлаш хонаси ўз фаолиятини бошлади.

Мазкур бўлим болаларга стационар ёрдам кўрсатиш учун зарур тиббий-услубий қўлланмалар, клиник  стандарт протоколлари, болаларга интеграллашган усулда ёрдам кўрсатиш бўйича ҳамда кейинги кузатув ва маслаҳатлар хусусидаги қўлланмалар билан таъминланган. Янги туғилган чақалоқлар ва 18 ёшгача  бўлган болаларга малакали тиббий хизмат кўрсатаётган 50 ўринга мўлжалланган мазкур бўлимда айни пайтда 49 нафар бемор болалар даволанмоқда.

Жорий йилнинг 14 май санасида Амударё туман Тиббиёт бирлашмаси ҳузуридаги кўптармоқли Марказий поликлиникада ташкил этилган  Болалар бўлими фаолияти билан танишиш мақсадида Ўзбекистон Республикаси Педиатрия илмий амалий Маркази директори, профессор Аҳмедова Дилором  Илҳомовна ташриф буюрди ва мазкур бўлим шифокорлари билан учрашиб, бемор болалар ҳолидан хабар олди.

Профессор Дилором Илҳомовна бўлим фаолия билан танишиш жараёнида бу ерда яратилган шарт-шароитлардан ташқари, Болалар бўлимининг энг зарур дори-дармонлар, тиббий воситалар билан таъминланиш ҳолатини ҳам ўрганди.

Бўлимда 4 та ҳамшира пости ва 2 та муолажа хонаси мавжуд бўлиб, муолажа хоналари энг зарур тиббий волситалар билан тўлиқ таъминланган.

Профессор Дилором Аҳмедова Амударё туман Тиббиёт бирлашмаси ҳузуридаги болалар жонлантириш бўлимини ҳам бориб кўрди. Мазкур бўлимда 2 та шошилинч педиатрия бригадалари фаолият юритмоқда. Дилором Аҳмедова оғир аҳволдаги бемор болаларга малакали тиббий ёрдам кўрсатиш мақсадида бўлимдаги мавжуд 2 та ўпкани сунъий вентиляция қилиш ускунаси, 2 та ўпкани доимий мусбат босим билан сунъий шамоллатиш ускунаси, 4 та оксигенатор, 5 та марказий кислород етказиб бериш нуқталари, вақтидан олдин ёки касал туғилган чақалоқларни жонлантириш учун автоматик кислород билан таъминлайдиган ва оптимал ҳароратни сақлайдиган 1 та очиқ ҳамда 2 та ёпиқ кувез ускуналари, 3 дона монитор, 1 та функционал кароват ва бошқа зарур ускуна ва жиҳозларнинг ҳолатини кўздан кечириб, бўлимдаги мавжуд 6 та койкада даволанаётган бемор болалар ҳолати билан яқиндан танишди.

Профессор Аҳмедова Дилором Илҳомовна ўз ташрифи давомида шифокорлар ва бемор болалар ҳамда уларнинг ота-оналари билан мулоқотда бўлиб, уларнинг муолажа чоралари юзасидан саволларига жавоб берди. Шунингдек, амударёлик педиатр-шифокорлар олдида турган долзарб вазифалар ҳамда тиббиёт сохасидаги инновацион янгиликлар, соҳада амалга оширилаётган ислоҳотлар бўйича ўз таклиф ва тавсияларини берди.

Робия ЙЎЛДОШЕВА.