OʻZBEKISTON RESPUBLIKASI PEDIATRIYa ILMIY AMALIY MARKAZI DIREKTORI, PROFESSOR DILOROM AHMEDOVA AMUDARYoLIK PEDIATR-ShIFOKORLAR FAOLIYaTI BILAN TANIShDI

Prezidentimiz tibbiyot sohasi vakillari bilan boʻlgan uchrashuvida millatning bardavomligi, xalqning salomatligi tibbiyot sohasi xodimlarining fidoyiligiga koʻp jihatdan bogʻliqligini, tom maʼnoda xalqimizni sogʻlomlashtirish, ularning ijtimoiy va maʼnaviy faolligini oshirish ona va bolaning repoduktiv salomatligini muhofaza etishga, bolaga hali u dunyoga kelmasdan zarur gʻamxoʻrlik koʻrsatishga bogʻliqligini qayta-qayta taʼkidladilar. Shu bilan birga Prezidentimiz tomonidan sohani rivojlantirishga hamda shifokorlarning moddiy manfaatdorligini oshirishga qaratilgan Qaror va Farmonlar imzolandi.

Xususan, Prezidentimizning “Reproduktiv yoshdagi ayollar, homiladorlar va bolalarga koʻrsatiladigan tibbiy yordam sifatini oshirish va koʻlamini yanada kengaytirish toʻgʻrisida”gi hamda “2022-2026-yillarda onalik va bolalikni muhofaza qilishni kuchaytirish toʻgʻrisida”gi Qarorlari reproduktiv ayollar va homiladorlarni aniq rejalashtirilgan  tizim asosida roʻyxatga olish, reproduktiv  yoshdagi ayollar, homiladorlar va bolalarga koʻrsatiladigan tibbiy yordam sifatini talablar darajasida amalga oshirish hamda koʻlamini yanada kengaytirish imkonini berdi.

Prezidentimizning 2022-yil 25-apreldagi Qarori hamda ushbu Qaror ijrosini taʼminlashga qaratilgan Oʻzbekiston Respublikasi Sogʻlikni saqlash vazirligining buyrugʻiga asosan Amudaryo tuman Tibbiyot birlashmasi huzuridagi koʻptarmmoqli Markaziy poliklinikada joriy yilning 1-may sanasida yangidan bolalar boʻlimi tashkil etilib, boʻlimda bolalar tor soha mutassislari, qizlar salomatlik markazi, pediatr, immunolog, maktab va bogʻcha shifokorlari  hamda emlash xonasi oʻz faoliyatini boshladi.

Mazkur boʻlim bolalarga statsionar yordam koʻrsatish uchun zarur tibbiy-uslubiy qoʻllanmalar, klinik  standart protokollari, bolalarga integrallashgan usulda yordam koʻrsatish boʻyicha hamda keyingi kuzatuv va maslahatlar xususidagi qoʻllanmalar bilan taʼminlangan. Yangi tugʻilgan chaqaloqlar va 18 yoshgacha  boʻlgan bolalarga malakali tibbiy xizmat koʻrsatayotgan 50-oʻringa moʻljallangan mazkur boʻlimda ayni paytda 49 nafar bemor bolalar davolanmoqda.

Joriy yilning 14-may sanasida Amudaryo tuman Tibbiyot birlashmasi huzuridagi koʻptarmoqli Markaziy poliklinikada tashkil etilgan  Bolalar boʻlimi faoliyati bilan tanishish maqsadida Oʻzbekiston Respublikasi Pediatriya ilmiy amaliy Markazi direktori, professor Ahmedova Dilorom  Ilhomovna tashrif buyurdi va mazkur boʻlim shifokorlari bilan uchrashib, bemor bolalar holidan xabar oldi.

Professor Dilorom Ilhomovna boʻlim faoliya bilan tanishish jarayonida bu yerda yaratilgan shart-sharoitlardan tashqari, Bolalar boʻlimining eng zarur dori-darmonlar, tibbiy vositalar bilan taʼminlanish holatini ham oʻrgandi.

Boʻlimda 4 ta hamshira posti va 2 ta muolaja xonasi mavjud boʻlib, muolaja xonalari eng zarur tibbiy volsitalar bilan toʻliq taʼminlangan.

Professor Dilorom Ahmedova Amudaryo tuman Tibbiyot birlashmasi huzuridagi bolalar jonlantirish boʻlimini ham borib koʻrdi. Mazkur boʻlimda 2 ta shoshilinch pediatriya brigadalari faoliyat yuritmoqda. Dilorom Ahmedova ogʻir ahvoldagi bemor bolalarga malakali tibbiy yordam koʻrsatish maqsadida boʻlimdagi mavjud 2 ta oʻpkani sunʼiy ventilyatsiya qilish uskunasi, 2 ta oʻpkani doimiy musbat bosim bilan sunʼiy shamollatish uskunasi, 4 ta oksigenator, 5 ta markaziy kislorod yetkazib berish nuqtalari, vaqtidan oldin yoki kasal tugʻilgan chaqaloqlarni jonlantirish uchun avtomatik kislorod bilan taʼminlaydigan va optimal haroratni saqlaydigan 1 ta ochiq hamda 2 ta yopiq kuvez uskunalari, 3 dona monitor, 1 ta funktsional karovat va boshqa zarur uskuna va jihozlarning holatini koʻzdan kechirib, boʻlimdagi mavjud 6 ta koykada davolanayotgan bemor bolalar holati bilan yaqindan tanishdi.

Professor Ahmedova Dilorom Ilhomovna oʻz tashrifi davomida shifokorlar va bemor bolalar hamda ularning ota-onalari bilan muloqotda boʻlib, ularning muolaja choralari yuzasidan savollariga javob berdi. Shuningdek, amudaryolik pediatr-shifokorlar oldida turgan dolzarb vazifalar hamda tibbiyot soxasidagi innovatsion yangiliklar, sohada amalga oshirilayotgan islohotlar boʻyicha oʻz taklif va tavsiyalarini berdi.

Robiya YOʻLDOShEVA.