Телекоммуникация хизматларининг сифати назорат қилинмоқда

“Илм, маърифат ва рақамли иқтисодиётни ривожлантириш” Давлат дастурининг бажарилиши юзасидан ахборот ва коммуникацияларни ривожлантириш соҳасида ҳам белгиланган вазифалар изчиллик билан амалга оширилмоқда.

Бугунги кунда Республикамизнинг барча ҳудудларида “Маҳаллабай” ва “Хонадонбай” ишлаш тизими йўлга қўйилган бўлиб, ушбу тизим асосида корхона ва ташкилот мутасаддилари ҳам ҳудудларда бўлиб, овул ва маҳаллаларда мавжуд муаммо ва камчиликларни ўрганиб, уларнинг ижобий ҳал қилинишига эришишмоқда.

Жумладан, Ўзкомназорат давлат инспекцияси Қорақалпоғистон Республиикаси ҳудудий инспекцияси ходимлари туман ва шаҳарларда бўлиб, овул ва маҳаллаларда кўрсатилаётган телекоммуникация хизматларининг сифати, инфраструктура объектлари ва почта-алоқа биноларида ўрганиш ишларини олиб боришмоқда.

Шу ўринда айтиш керакки, мазкур йилда Қорақалпоғистон Республикаси ҳудуди бўйича 200 дан ортиқ маҳалла ва овулларда интернет тармоқларига уланиш бўйича ўрганиш ишлари олиб борилди. Ўрганишлар давомида 465 та камчиликлар аниқланиб, тезкорлик билан бартараф қилинди ва истеъмолчиларнинг сифатли интернет алоқаси олишга бўлган ҳуқуқлари бузилишининг олди олинди.

Ўзкомназорат давлат инспекцияси Қорақалпоғистон Республикаси ҳудудий инспекцияси томонидан халқ таълими бўлими, мактабгача таълим, соғлиқни сақлаш бўлимлари, овул ва маҳалла фуқаролар йиғинлари биноларида яратилган  телекоммуникация инфраструктураси аҳволи, кўрсатилаётган телекоммуникация  хизматлари сифати тизимли равишда назорат қилиб борилмоқда.

Бугунги кунда Қорақалпоғистон Республикасида мавжуд 779 та халқ таълими тасарруфидаги муассасалар, 394 та мактабгача таълим ташкилотлари, 237 та соғлиқни сақлаш муассасалари, 422 та овул ва маҳалла фуқаролар йиғинларида телекоммуникация инфраструктураси яратилган бўлиб, юқори тезликдаги интернет хизматлари кўрсатиб келинмоқда.

Амударё туманидаги Ойбек маҳалла фуқаролар йиғинида телекоммуникация оператори томонидан линия-кабел хўжалигини тартибга келтириш, кўрсатилаётган хизматлар сифатини янада ошириш мақсадида эски мис кабеллар оптик толали алоқа кабеларига алмаштирилмоқда.

Шунингдек, тумандаги 55-сонли умумтаълим мактаби туман телекоммуникация тармоғи томонидан юқори тезликдаги интернет хизматлари билан таъминланди.  

Бундан ташқари, туманда почта-алоқа соҳасида янгидан йўлга қўйилган давлат хизматлари, банк хизматлари ва бошқа турдаги хизмат турларининг аҳолига хизмат кўрсатиш даражасини аниқлаш мақсадида мониторинг ўтказилди. Амударё туманидаги барча почта-алоқа обеъктлари юқори тезликдаги интернет ва замонавий компьютер техникалари билан тўлиқ таъминланган.

 Амударё туманида аҳолига қулайлик яратиш, узоғини яқин қилиш мақсадида почта-алоқа объектларида 34 турдаги давлат хизматлари ишга туширилган. Шунингдек 2 хил турдаги банк хизматлари, коммунал тўловлар ва 100 дан ортиқ бошқа хилдаги тўловлар амалга оширилиб келинмоқда.

Айтиш жоизки, телекоммуникация тармоқларини ривожлантириш ва илғор жаҳон тажрибасига асосланган энг замонавий алоқа хизматларини жорий этиш қисқа вақт ичида “Рақамли Ўзбекистон”га ўтиш учун мустаҳкам замин яратмоқда.

 Туман ҳокимлигининг Ахборот хизмати.